Read Kernewek 2 Samuel 3 Bible Online

2 Samuel 3 - Kernewek bible

2 Samuel 3

¹An vresel o hir yntra chi Sowl ha chi Davydh; Davydh eth ha bos kreffa, ha chi Sowl eth ha bos gwanna.

²Mebyon a veu dineythys dhe Davydh yn Hebron: ha'y gynsa-genys o Amnon, a Ahinoam an Yezreelyades;

³ha'y nessa, Kileab, a Abigayl gwreg Nabal a Karmel; ha'n tressa, Absalom mab Maaka myrgh Talmay myghtern Geshur;

⁴ha'n peswora, Adoniya mab Haggith; ha'n pympes, Shefatia mab Abital;

⁵ha'n hweghves, Ithream, a Egla gwreg Davydh. An re ma a veu dineythys dhe Davydh yn Hebron.

⁶Pan esa bresel yntra chi Sowl ha chi Davydh, yth esa Abner ow krevhe y savla yn chi Sowl.

⁷Lemmyn yth esa dhe Sowl iswreg, ha'y hanow Rispa myrgh Aya. Ish-bosheth a leveris dhe Abner, ‘Prag y hwruss'ta mos a-ji dhe iswreg ow thas?’

⁸Abner a dheuth ha bos pur serrys drefenn geryow Ish-bosheth; yn-medh ev, ‘Ov vy penn-ki? My neb a dhiskwa tregeredh dhe Yuda y'n jydh hedhyw, dhe ji Sowl dha das, dh'y vreder, ha dh'y gowetha, ha ny'th telivris yn dorn Davydh; ha hwath ty re settyas an kabel ma warnav a-dro dhe'n venyn ma y'n jydh hedhyw.

⁹Re wrello Duw yndella dhe Abner, ha moy ynwedh. Rag kepar dell dos an ARLOEDH dhe Davydh, an keth henna my a wra ragdho,

¹⁰dhe dreusworra an vyghterneth dhiworth chi Sowl, ha fastya tron Davydh war Ysrael ha war Yuda, dhiworth Dan bys yn Beer-sheba.’

¹¹Ha ny ylli ev gorthybi Abner ger arta, drefenn ev dhe berthi own anodho.

¹²Abner a dhannvonas kannasow dhe Davydh y'n tyller may feu,[4] ow leverel, ‘Dhe biw yw an pow? Gwra dha gevambos genev, hag awotta, ow dorn a vydh genes, dhe dreylya oll Ysrael dhis.’

¹³Ev a leveris, ‘Da yw; my a wra kevambos genes. Mes unn dra a wovynnav orthis: ny welydh ow fas, marnas ty dhe dhri Mikal myrgh Sowl, pan dheudh dhe weles ow fas.’

¹⁴Ena Davydh a dhannvonas kannasow dhe Ish-bosheth mab Sowl, ow leverel, ‘Ro dhymm ow gwreg Mikal neb a dhemmedhis dhymm rag kans kudhgenn Filistysi.’

¹⁵Hag Ish-bosheth a dhannvonas ha'y hemmeres dhiworth hy gour, dhiworth Paltiel mab Laish.

¹⁶Mes hy gour eth gensi owth oela war hy lergh bys yn Bahurim. Ena yn-medh Abner dhodho, ‘Ke, dehwel!’ Hag ev a dhehwelis.

¹⁷Abner a dhannvonas ger dhe henavogyon Ysrael, ow leverel, ‘Rag termyn hir hwi re beu ow hwilas Davydh avel myghtern warnowgh.

¹⁸Lemmyn ytho gwrewgh yndella; rag an ARLOEDH re gewsis dhe Davydh, ha leverel: Dre leuv ow gwas Davydh my a wra sawya ow fobel Ysrael dhiworth leuv an Filistysi, ha dhiworth leuv oll aga eskerens.’

¹⁹Abner a gewsis yn diwskovarn Benyamin ynwedh; ena Abner eth ynwedh dhe dherivas yn diwskovarn Davydh yn Hebron pup-tra a hevelis da yn golok Ysrael, hag yn golok oll chi Benyamin.

²⁰Pan dheuth Abner dhe Davydh yn Hebron, hag ugens gour ganso, Davydh a wrug kevewi rag Abner ha'n wer esa ganso.

²¹Hag Abner a leveris dhe Davydh, ‘Gas vy dhe sevel ha mones, ha my a guntell oll Ysrael dhe'm arloedh an myghtern, may hyllons gul kevambos genes, ha may hyllydh reynya war bup-tra a dhesir dha golonn.’ Ytho Davydh a dhannvonas Abner dhe-ves; hag ev eth yn kres.

²²Hag, awotta, gwesyon Davydh ha Yoab a dhehwelis dhiworth omsettyans, ha dri preydh bras gansa. Mes nyns esa Abner gans Davydh yn Hebron, rag Davydh re'n dannvonsa dhe-ves, hag ev o gyllys yn kres.

²³Pan dheuth Yoab hag oll an lu esa ganso, y feu derivys orth Yoab, ‘Abner mab Ner a dheuth dhe'n myghtern, hag ev re'n dannvonas dhe-ves, hag ev yw gyllys yn kres.’

²⁴Ena Yoab eth dhe'n myghtern ha leverel, ‘Pandr'a wruss'ta? Otta, Abner a dheuth dhis; prag y'n dannvensys dhe-ves, mayth yw ev gyllys glan?

²⁵Ty a woer Abner mab Ner dhe dhos dhe'th toella, ha kavoes godhvos a'th vos yn-mes ha'th tos a-ji, ha dhe wodhvos pup-tra esos orth y wul.’

²⁶Pan dheuth Yoab yn-mes a lok Davydh, ev a dhannvonas kannasow war-lergh Abner, hag i a'n dhros dhe-dre dhiworth puth Sira; mes ny wodhva Davydh.

²⁷Pan dhehwelis Abner dhe Hebron, Yoab a'n kemmeras a-denewen yn kres an yet dhe gewsel ganso yn kosel, hag ev a'n gweskis ena yn y dorr. Ytho ev a verwis rag goes Asahel y vroder.

²⁸Hag a-wosa, pan glewas Davydh anodho, yn-medh ev, ‘My ha'm gwlaskor yw divlam dherag an ARLOEDH bys vykken dhiworth goes Abner mab Ner.

²⁹Re goettho an goes war benn Yoab, ha war oll chi y das; ha bynner re bo chi Yoab heb unn den a'n jeves sygerans, po yw klavorek, po a boes war y lorgh, po a goedh dre an kledha, po a fyll a vara.’

³⁰Ytho Yoab ha'y vroder Abishay a ladhas Abner, drefenn ev dhe ladha aga broder Asahel y'n gas yn Gibeon.

³¹Ena Davydh a leveris dhe Yoab ha dhe oll an bobel esa ganso, ‘Skwardyewgh agas dillas, hag omwrogysiwgh gans yskar, ha kynewgh war Abner.’ Ha myghtern Davydh a holyas an eler.

³²Ytho i a ynkleudhyas Abner yn Hebron: ha'n myghtern a dhrehevis y lev hag oela orth bedh Abner; hag oll an bobel a oelas.

³³Ena an myghtern a gynis war Abner, ha leverel, ‘A goedh Abner merwel kepar dell verow den foll?

³⁴Dha dhiwla, nyns ens kelmys, na dha dhewdroes synsys yn kargharow; kepar dell goedh den dherag mebyon sherewneth ty re goedhas.’ Hag oll an bobel a oelas warnodho arta.

³⁵Ena oll an bobel a dheuth dhe wul dhe Davydh dybri boes pan o hwath dydh; mes Davydh a dos, ha leverel, ‘Yndella re wrello Duw dhymm, ha moy ynwedh, mar plasav bara po neppyth arall kyns an howl dhe sedhi!’

³⁶Oll an bobel a attendyas hemma, ha da o yn aga golok; kepar dell o da pup-tra a wre an myghtern yn golok oll an bobel.

³⁷Oll an bobel hag oll Ysrael a wodhya y'n jydh na nag o der arghadow an myghtern bos Abner mab Ner ledhys.

³⁸Hag yn-medh an myghtern dh'y wesyon, ‘A ny wodhowgh hwi pennsevik ha gour bras dhe goedha y'n jydh ma yn Ysrael?

³⁹Hedhyw my yw difreth, kynth ov untys myghtern; an wer ma, mebyon Seruya, yw re gales ragov. Re attallo an ARLOEDH dhe'n den neb a wra drog herwydh y sherewynsi!’