Read Kernewek 2 Samuel 5 Bible Online

2 Samuel 5 - Kernewek bible

2 Samuel 5

¹Ena oll loethow Ysrael a dheuth dhe Davydh yn Hebron ha leverel, ‘Otta, dha askorn ha'th kig on ni.

²Ynwedh yn termyn tremenys, pan o Sowl myghtern warnan, yth o ty neb a hembronka luyow Ysrael yn-mes ha'ga dri a-ji. Ha'n ARLOEDH a leveris dhis, “Ty a vydh bugel ow fobel Ysrael, ha ty a vydh rewler war Ysrael.” ’

³Ytho oll henavogyon Ysrael a dheuth dhe'n myghtern yn Hebron; ha myghtern Davydh a wrug kevambos gansa yn Hebron dherag an ARLOEDH, hag i a untyas Davydh myghtern war Ysrael.

⁴Davydh o deg bloedh warn ugens pan dhallathas reynya, hag ev a reynyas dewgens blydhen.

⁵Yn Hebron ev a reynyas war Yuda seyth blydhen ha hwegh mis; hag yn Yerusalem ev a reynyas war oll Ysrael ha Yuda trydhek blydhen warn ugens.

⁶An myghtern ha'y wer eth dhe Yerusalem erbynn an Yebusysi, trigoryon an tir na, hag i a armas dhe Davydh, ‘Ny yllydh entra omma, rag an dhellyon ha'n re glof a yll dha bellhe.’ Rag i a dybi, ‘Ny yll Davydh entra omma.’

⁷Mes Davydh a gemmeras dinas Sion, yw lemmyn sita Davydh.

⁸Davydh a leveris y'n jydh na, ‘Piwpynag a vynno gweskel an Yebusysi, gwres ev mones yn-bann der an gowfordh-dhowr dhe weskel an dhellyon ha'n re glof, yw kesys gans Davydh.’ Rakhenna leverys yw, ‘Ny wra an dhellyon na'n re glof dos a-ji dhe'n chi.’

⁹Ena Davydh a dhallathas triga y'n dinas, hag ev a'n henwis sita Davydh. Davydh a dhrehevis a-derdro dhiworth an Millo[6] ha war-ji.

¹⁰Ha Davydh eth ha bos brassa ha brassa, rag yth esa an ARLOEDH, Duw an luyow, ganso.

¹¹Myghtern Hiram a Tyr a dhannvonas kannasow dhe Davydh, war-barth gans kederwydh ha seri prenn ha seri men, hag i a dhrehevis chi rag Davydh.

¹²Ena Davydh a gonvedhi an ARLOEDH dh'y fastya avel myghtern war Ysrael, hag ev dhe ughelhe y vyghterneth a-barth y bobel Ysrael.

¹³Ha Davydh a gemmeras ragdho iswragedh ha gwragedh moy yn-mes a Yerusalem, wosa ev dhe dos dhiworth Hebron; ha mebyon ha myrghes moy a veu dineythys dhe Davydh.

¹⁴Ha'n re ma yw henwyn a'n re a veu dineythys dhodho yn Yerusalem: Shammua, Shobab, Nathan, Solomon,

¹⁵Ybhar, Elishua, Nefeg, Yafia,

¹⁶Elishama, Elyada, hag Elifelet.

¹⁷Pan glewas an Filistysi Davydh dhe vos untys avel myghtern war Ysrael, oll an Filistysi a dheuth yn-bann dhe hwilas Davydh; mes Davydh a glewas anodho, ha mos yn-nans dhe'n dinas.

¹⁸Lemmyn an Filistysi a dheuth hag omlesa y'n nans Refaim.

¹⁹Ytho Davydh a wovynnas orth an ARLOEDH, ha leverel, ‘A wrav vy mones yn-bann erbynn an Filistysi? A vynn'ta aga delivra a-berth y'm leuv?’ Ha'n ARLOEDH a leveris dhe Davydh, ‘Ke yn-bann; rag my a vynn yn hwir delivra an Filistysi a-berth y'th leuv.’

²⁰Ytho Davydh a dheuth dhe Baal-perasim, ha Davydh a's fethas ena. Yn-medh ev, ‘An ARLOEDH re dardhas der ow eskerens der ow leuv, kepar dell dardh dowrow.’ Rakhenna ev a elwis an tyller na Baal-perasim.

²¹I a asas aga idolys ena, ha Davydh ha'y wer a's dug dhe-ves.

²²An Filistysi a dheuth yn-bann unnweyth arta, hag omlesa y'n nans Refaim.

²³Ha pan wovynnas Davydh orth an ARLOEDH, ev a leveris, ‘Ny edh yn-bann; ke a-dro a-dryv dhedha, ha deus warnedha a-dal an gwydh balsam.

²⁴Pan glewydh son avel keskerdh yn penn an gwydh balsam, bydh hewoel; rag ena an ARLOEDH res eth yn-mes a-dheragos, dhe weskel lu an Filistysi.’

²⁵Davydh a wrug dell erghis an ARLOEDH dhodho; hag ev a weskis an Filistysi dhiworth Geba bys yn Gezer.