Read Kernewek 2 Samuel 6 Bible Online

2 Samuel 6 - Kernewek bible

2 Samuel 6

¹Davydh a guntellas arta oll gwer dhewisys Ysrael, deg mil warn ugens.

²Davydh a sevis, ha mos gans oll an bobel esa ganso dhiworth Baala yn Yuda, dhe dhri yn-bann alena argh Duw, yw henwys war-lergh hanow ARLOEDH an luyow neb a esedh war an cherubim.

³I a worras argh Duw war gert nowydh, ha'y dri dhiworth chi Abinadab, esa yn Gibea. Yth esa Uzza hag Ahio, mebyon Abinadab, ow ledya an kert nowydh.

⁴I a's dros dhiworth chi Abinadab esa yn Gibea hag argh Duw warnodho; hag yth esa Ahio ow kerdhes a-rag an argh.

⁵Davydh hag oll chi Ysrael a lowenhas dherag an ARLOEDH gans oll aga nerth, gans kanow,[7] ha sowtris, telynnow, tabourigow, sistrennow, ha gans symbalys.

⁶Pan dheuthons dhe leur-drushya Nakon, Uzza a ystynnas y leuv war-tu hag argh Duw, ha settya dalghenn ynni, rag an oghen dh'y shakya.

⁷Sorr Duw a dhewis erbynn Uzza; ha Duw a'n gweskis dhe'n dor ena drefenn y volder; hag ev a verwis ena ryb argh Duw.

⁸Davydh a veu serrys drefenn an ARLOEDH dhe dardha yn-mes erbynn Uzza; hag ev a elwis an tyller na Peres-uzza, dell yw bys y'n jydh hedhyw.

⁹Davydh a borthas own a'n ARLOEDH y'n jydh na, ha leverel, ‘Fatell yll argh an ARLOEDH dos dhymm?’

¹⁰Ytho ny vynna Davydh kemmeres argh an ARLOEDH ganso a-ji dhe sita Davydh; mes Davydh a's dug a-denewen dhe ji Obed-edom an Gittyas.

¹¹Hag yth esa argh an ARLOEDH trigys yn chi Obed-edom an Gittyas tri mis; ha'n ARLOEDH a vennigas Obed-edom hag oll y vayni.

¹²Y feu derivys orth Davydh, ‘An ARLOEDH re vennigas chi Obed-edom ha pup-tra eus dhodho, drefenn argh Duw.’ Ytho Davydh eth ha dri yn-bann argh Duw a-dhiworth chi Obed-edom a-ji dhe sita Davydh gans lowena,

¹³ha pan alsa an re esa ow toen an argh hwegh kamm, ev a sakrifias ojyon ha bualyon peskys.

¹⁴Ha Davydh a dhonsyas dherag an ARLOEDH gans oll y nerth; ha Davydh o grogysys gans efod a lien.

¹⁵Ytho Davydh hag oll chi Ysrael a dhros yn-bann argh an ARLOEDH gans garmow, ha gans son an hirgorn.

¹⁶Pan dheuth argh an ARLOEDH a-ji dhe sita Davydh, Mikal myrgh Sowl a viras war-woeles der an fenester, ha gweles myghtern Davydh ow lamma hag ow tonsya dherag an ARLOEDH; ha hi a'n dispresyas yn hy holonn.

¹⁷I a dhros argh an ARLOEDH a-ji, ha'y settya yn hy le, yn kres an tylda re dhrehavsa Davydh rygdhi; ha Davydh a offrynnas offrynnow leskys hag offrynnow kres dherag an ARLOEDH.

¹⁸Wosa Davydh dhe worfenna offrynna an offrynnow leskys ha'n offrynnow kres, ev a vennigas an bobel yn hanow ARLOEDH an luyow.

¹⁹Hag ev a lesrannas dhe oll an bobel, dhe oll routh Ysrael, dhe bub gour ha benyn, unn torth-vara, unn rann a gig, hag unn desenn-rappys. Ena oll an bobel a dhibarthas, pubonan dh'y ji.

²⁰Ena Davydh a dhehwelis dhe venniga y vayni. Mes Mikal myrgh Sowl a dheuth yn-mes dhe vetya Davydh, ha leverel, ‘Assa wrug myghtern Ysrael enora y honan hedhyw, ow tiskudha y honan dherag dewlagas maghtethyon y wesyon, kepar dell dhiskudh den isel y honan!’

²¹Hag yn-medh Davydh dhe Mikal, ‘Yth o dherag an ARLOEDH, neb a'm dewisas yn le dha das, hag oll y ji, dhe'm settya avel rewler war bobel an ARLOEDH, war Ysrael. Ha my a lowenha dherag an ARLOEDH.

²²Ha my a vydh hwath isella es hemma, ha my a vydh uvelhes y'm dewlagas ow honan; mes gans an maghtethyon may kewssys anedha, gansa my a vydh synsys yn enor.’

²³Ha nyns esa dhe Mikal myrgh Sowl flogh vyth bys dydh hy mernans.