Read Kernewek 2 Samuel 9 Bible Online

2 Samuel 9 - Kernewek bible

2 Samuel 9

¹Davydh a wovynnas, ‘Eus hwath nebonan yw gesys a ji Sowl, may hallav diskwedhes dhodho tregeredh drefenn Yonathan?’

²Lemmyn yth esa gwas a ji Sowl, ha'y hanow Siba, hag ev a veu gelwys dhe Davydh, ha'n myghtern a leveris dhodho, ‘Osta Siba?’ Hag ev a worthybis, ‘Dha was!’

³Yn-medh an myghtern, ‘A nyns eus hwath gour gesys a ji Sowl, may hallav diskwedhes tregeredh Duw dhodho?’ Ha Siba a worthybis, ‘Yma hwath gesys mab Yonathan; evredhek yw yn y dhewdroes.’

⁴An myghtern a leveris dhodho, ‘Ple'ma ev?’ Siba a worthybis dhe'n myghtern, ‘Yma ev yn chi Makir mab Ammiel, yn Lo-debar.’

⁵Ena myghtern Davydh a dhannvonas ha'y dhri dhiworth chi Makir mab Ammiel, yn Lo-debar.

⁶Mefibosheth mab Yonathan mab Sowl a dheuth dhe Davydh, hag ev a goedhas war y fas, hag omblegya. Ha Davydh a leveris, ‘Mefibosheth!’ Ev a worthybis, ‘Ottavy, dha was!’

⁷Davydh a leveris dhodho, ‘Na borth own, rag my a dhiskwa tregeredh dhis rag Yonathan dha das; ha my a dhaskorr dhis oll tir a Sowl dha das, ha ty a dheber boes orth ow moes pup-prys.’

⁸Ev a omblegyas ha gorthybi, ‘Pandr'yw dha was, may firsys war gi marow kepar ha my?’

⁹Ena an myghtern a elwis Siba, gwas Sowl, ha leverel dhodho, ‘Pup-tra esa dhe Sowl ha dhe oll y ji my re ros dhe vab dha vester.’

¹⁰Ty ha'th vebyon ha'th wesyon a wonedh an dor ragdho, ha ty a dhre an askorr, may hyll mab dha vester kavoes boes dhe dhybri; mes Mefibosheth mab dha vester a dheber boes pup-prys orth ow moes. Lemmyn yth esa dhe Siba pymthek mab hag ugens gwas.

¹¹Ena Siba a leveris dhe'n myghtern, ‘War-lergh pup-tra a wra ow arloedh an myghtern y erghi dh'y was, yndella y hwra dha was.’ Ha Mefibosheth a dhybri orth moes Davydh, avel onan a vebyon an myghtern.

¹²Yth esa dhe Mefibosheth mab yowynk, ha'y hanow Mika. Hag oll an re trigys yn chi Siba eth ha bos gwesyon Mefibosheth.

¹³Ytho yth esa Mefibosheth trigys yn Yerusalem, rag ev a dhybri pup-prys orth moes an myghtern. Evredhek o yn y dhewdroes.