Read Kernewek 1 Myghternedh 10 Bible Online

1 Myghternedh 10 - Kernewek bible

1 Myghternedh 10

¹Pan glewas myghternes Sheba a vri Solomon (bri drefenn hanow an ARLOEDH), hi a dheuth dh'y brevi gans govynnow kales.

²Hi a dheuth dhe Yerusalem gans koskordh pur veur, gans kowrvergh ow toen spisyow, ha meur a owr, ha gemmow drudh; ha pan dheuth hi dhe Solomon hi a leveris dhodho pup-tra esa yn hy brys.

³Solomon a worthybis dhe beub a'y govynnow; nyns esa travyth kudhys a'n myghtern na wodhya displegya dhedhi.

⁴Pan welsa myghternes Sheba oll furneth Solomon, an chi re dhrehevsa,

⁵an boes war y voes, rester esedhyans y soedhogyon, an servysi ha'ga gwisk, y hanaforyon, ha'y offrynnow leskys a offrynna yn chi an ARLOEDH, nyns esa spyrys ynni namoy.

⁶Ytho hi a leveris dhe'n myghtern, ‘An derivas o gwir a glewis yn ow thir ow honan a'th wriansow ha'th furneth,

⁷mes ny grysis an geryow bys pan dheuth vy ha gweles gans ow dewlagas ow honan. Ny veu derivys dhymm an hanter; dha furneth ha'th siwena a worbass yn feur an derivas re glewsen.

⁸Gwynnvys dha wer! Gwynnvys an re ma dha wesyon, a sev a-ragos heb hedhi ha klewes dha furneth!

⁹Bennigys re bo an ARLOEDH dha Dhuw a lowenhas ynnos ha'th worra war dron Ysrael! Drefenn an ARLOEDH dhe'th kara bys vykken, ev a'th wrug myghtern dhe wul gwirvreus hag ewnhynseth.’

¹⁰Ena hi a ros dhe'n myghtern hwegh-ugens talent a owr, myns meur a spisyow, ha gemmweyth drudh; bythkweth arta ny dheuth an spisyow yn kemmys palster ages an pyth a ros myghternes Sheba dhe vyghtern Solomon.

¹¹Kekeffrys, lu lestri Hiram, a dhegi owr a Ofir, a dhre myns meur a brenn almug ha gemmow drudh.

¹²An myghtern a wrug devnydh a brenn almug dhe wul peulyow rag chi an ARLOEDH ha rag chi an myghtern, ynwedh telynnow ha sowtris rag an ganoryon; ny veu myns mar veur a brenn almug bythkweth ynperthys a-dhia'n jydh na.

¹³Myghtern Solomon a ros dhe vyghternes Sheba pup-tra a hwansa, pypynag a wovynnas, keffrys ha'n pyth a ros dhedhi a helder ryel Solomon. Ena hi a dhehwelis dh'y thir hy honan gans hy hoskordh.

¹⁴Poester an owr a dheuth dhe Solomon yn unn vlydhen o hwegh kans ha hwegh ha tri-ugens talent a owr,

¹⁵keffrys ha'n tollow a dheuth a'n genwerthoryon hag a negys an varghadoryon, ha trubyt oll myghternedh Arabia ha governours an tir.

¹⁶Myghtern Solomon a wrug dew kans skoes meur a owr mortholys; hwegh kans shekel a owr eth yn pub skoes meur.

¹⁷Ev a wrug tri hans bokler a owr mortholys; tri mina a owr eth yn pub bokler; ha'n myghtern a's gorras yn Chi Koeswik Lebanon.

¹⁸Ynwedh an myghtern a wrug tron meur a dhans-olifans, ha'y worlowna gans owr a'n gwella.

¹⁹An tron a'n jevo hwegh gris. Penn an tron o krenn a-dryv, hag a bub tenewen yth esa breghvaow ha dew lew a'ga sav ryb an breghvaow,

²⁰ha dewdhek lew a'ga sav orth an dhew benn a bubonan a'n hwegh gris. Ny veu gwrys bythkweth travyth haval yn gwlaskor vyth.

²¹Oll lestri eva Solomon o gwrys yn owr, hag oll lestri Chi Koeswik Lebanon a veu a owr pur; nyns esa nagonan yn arghans — y feu reknys avel isel y dalvosogeth yn dydhyow Solomon.

²²An myghtern a'n jevo lu lestri Tarshish dhe vor gans lu lestri Hiram. Unnweyth pub teyr blydhen lu lestri Tarshish a dho tre, ow tri owr, arghans, dans-olifans, apys ha payones.

²³Myghtern Solomon a worbassyas oll myghternedh an bys yn kevoeth hag yn furneth.

²⁴Oll an bys a hwila lok Solomon rag klewes y furneth, re worrsa Duw yn y vrys.

²⁵Pubonan a dhri ro, lestri arghans hag owr, dillas, ethennow hweg, spisyow, mergh ha mulyon, blydhen wosa blydhen.

²⁶Solomon a guntellas war-barth charettow ha mergh; ev a'n jevo mil ha peswar kans charett ha dewdhek mil vargh, hag ev a's gorras y'n sitys-charett ha gans an myghtern yn Yerusalem.

²⁷An myghtern a wrug arghans dhe vos mar gemmyn yn Yerusalem avel meyn, hag ev a wrug kederwydh mar bals avel sykaminwydh y'n Shefela.

²⁸Solomon a wrug mergh dhe vos kyrghys a Ejyp[10] ha Kue,[11] ha kenwerthoryon an myghtern a's degemmeri a Kue a'n pris usadow.

²⁹Yth esa charettow ynperthys dhiworth Ejyp a hwegh kans shekel, ha mergh a unn kans ha hanter-kans. Ynwedh i a's gwertha avel maynoryon dhe oll myghternedh an Hittysi ha dhe vyghternedh Aram.