Read Kernewek 1 Myghternedh 12 Bible Online

1 Myghternedh 12 - Kernewek bible

1 Myghternedh 12

¹Rehoboam eth dhe Shekem, rag Ysrael oll dhe dhos dhe Shekem dh'y wul myghtern.

²Pan glewas hemma Yeroboam mab Nebat, a veu hwath yn Ejyp may fisa ena dhiworth Solomon, Yeroboam a dhehwelis a-dhiworth Ejyp.

³I a dhannvonas ha'y elwel; ha Yeroboam hag oll kuntelles Ysrael a dheuth ha leverel dhe Rehoboam,

⁴‘Dha das a wrug agan yew dhe vos poes. Lemmyn ytho skavha ober kales dha das ha'y yew boes a worras warnan, ha ni a'th serv.’

⁵Ev a leveris dhedha, ‘Kewgh dhe-ves trydydh, ena dewgh dhymm arta.’ Ytho an bobel eth.

⁶Ena myghtern Rehoboam a omgusulyas gans an henavogyon esa yn lys y das Solomon pan esa hwath yn few, ow leverel, ‘Fatell gusulowgh may hworthyppiv dhe'n bobel ma?’

⁷I a worthybis dhodho, ‘Mar pydhydh servont dhe'n bobel ma hedhyw ha'ga servya, ha kewsel geryow teg dhedha pan worthybydh, ena i a vydh dha wesyon bys vykken.’

⁸Mes ev a naghas an gusul a ros dhodho an henavogyon, hag omgusulya gans an wer yowynk re devsa ganso hag esa ow sevel a-ragdho lemmyn.

⁹Ev a leveris dhedha, ‘Pana gusul a rowgh may hworthyppyn dhe'n bobel ma a leveris dhymm, “Skavha an yew a worras dha das warnan”?’

¹⁰An wer yowynk re devsa ganso a leveris dhodho, ‘Yn kettellma y koedh dhis leverel dhe'n bobel a gewsis dhis, “Dha das a wrug agan yew dhe vos poes, mes res yw dhis hy skavhe ragon”; yndellma y koedh dhis leverel dhedha, “Ow bys byghan yw tewa ages diwglun ow thas.

¹¹Kyn hworras ow thas warnowgh yew boes, my a geworr dh'agas yew. Ow thas a'gas kessydhyas gans hwyppys, mes my a'gas kessydh gans skorpyones.” ’

¹²Ytho Yeroboam ha'n bobel oll a dheuth dhe Rehoboam an tressa dydh, dell lavarsa an myghtern, ‘Dewgh dhymm arta y'n tressa dydh.’

¹³An myghtern a worthybis dhe'n bobel yn harow. Ny wrug vri a'n gusul re rosa an henavogyon dhodho

¹⁴mes kewsel dhedha herwydh kusul an wer yowynk, ‘Ow thas a wrug dha yew dhe vos poes, mes my a geworr dh'agas yew; ow thas a'gas kessydhyas gans hwyppys, mes my a'gas kessydh gans skorpyones.’

¹⁵Yndella ny woslowas an myghtern orth an bobel, drefenn bos hemma destnys gans an ARLOEDH, dhe gewera an ger kewsys gans an ARLOEDH dre Ahiya an Shilonyas dhe Yeroboam mab Nebat.

¹⁶Pan welas oll Ysrael oll na vynna an myghtern goslowes orta, an bobel a worthybis dhe'n myghtern, ‘Pana rann a'gan beus yn Davydh? Nyns eus eretons yn mab Yesse. Dh'agas tyldow, Ysrael! Mirewgh dhe'th chi dha honan, Davydh.’ Ytho Ysrael eth dhe-ves dh'aga thyldow.

¹⁷Mes Rehoboam a reynyas war an Ysraelysi esa trigys yn trevow Yuda.

¹⁸Myghtern Rehoboam a dhannvonas Adoram, a'n jevo charj a'n lavur konstrynys, Ysrael oll a'n labydhas dhe'n mernans. Myghtern Rehoboam a yskynnas yn uskis war y jarett ha fia dhe Yerusalem.

¹⁹Yndella Ysrael re beu yn rebellyans erbynn chi Davydh bys y'n jydh hedhyw.

²⁰Pan glewas oll Ysrael Yeroboam dhe dhehweles, i a dhannvonas ha'y elwel dhe'n kuntelles ha'y wul myghtern war oll Ysrael. Nyns esa nagonan a holyas chi Davydh, saw unnsel loeth Yuda.

²¹Pan dheuth Rehoboam dhe Yerusalem, ev a guntellas oll chi Yuda ha loeth Benyamin, kans ha peswar-ugens mil a wer dhewisys rag omladh erbynn chi Ysrael, dhe asver an vyghterneth dhe Rehoboam mab Solomon.

²²Mes ger Duw a dheuth dhe Shemaia, gour Duw:

²³Lavar dhe Rehoboam mab Solomon myghtern Yuda, ha dhe oll ji Ysrael ha Benyamin, ha dhe remenant an bobel,

²⁴‘Yndellma y lever an Arloedh. Ny yskynnowgh dhe werrya erbynn agas breder an Ysraelysi. Es pubonan dhe dre, rag an dra ma yw a-dhiworthiv.’ Ytho i a woslowas orth ger an ARLOEDH ha mos arta dhe dre, herwydh ger an ARLOEDH.

²⁵Ena Yeroboam a dhrehevis Shekem yn bro venydhyek Efraym, ha triga ena; ev eth yn-mes alena ha drehevel Penuel.

²⁶Ena Yeroboam a leveris dh'y honan, ‘Lemmyn an vyghterneth a allsa dehweles dhe ji Davydh.

²⁷Mars a an bobel ma dhe offrynna sakrifisow yn chi an ARLOEDH yn Yerusalem, kolonn an bobel a dreyl arta dh'aga mester, Rehoboam myghtern Yuda.’

²⁸Ytho an myghtern a gemmeras kusul, ha gul dew leugh a owr. Ev a leveris dhe'n bobel, ‘Hwi res eth dhe Yerusalem hir lowr. Ottomma agas duwow, A Ysrael, re'gas dros yn-mes a Ejyp.’

²⁹Ev a settyas an eyl yn Bethel, ha'y gila ev a worras yn Dan.

³⁰Ha hemma a dheuth ha bos pegh, rag an bobel dhe dhos ha gordhya a-rag an eyl yn Bethel, ha bys yn Dan dhe wordhya y gila.

³¹Ynwedh ev a wrug sentris war dylleryow ughel, hag apoyntya oferysi dhiworth an bobel oll, nag ens Levysi.

³²Yeroboam a fondyas goel y'n pymthegves dydh a'n ethves mis kepar ha'n goel yn Yuda, hag ev a offrynnas sakrifisow war an alter; yndella ev a wrug ynwedh yn Bethel, ow sakrifia dhe'n leughi re wrussa. Hag ev a worras yn Bethel oferysi an tylleryow ughel re wrussa.

³³Ev eth yn-bann dhe'n alter re wrussa yn Bethel y'n pymthegves dydh a'n ethves mis; ena yn mis re dhewissa ev y honan, ev a fondyas goel rag an Ysraelysi ha mos yn-bann dhe'n alter rag gul offrynnow.