Read Kernewek 1 Myghternedh 15 Bible Online

1 Myghternedh 15 - Kernewek bible

1 Myghternedh 15

¹Y'n etegves blydhen a vyghtern Yeroboam mab Nebat, Abiyam a dhallathas reynya war Yuda.

²Ev a reynyas teyr blydhen yn Yerusalem. Hanow y vamm o Maaka myrgh Abishalom.

³Ev a gerdhas yn oll an peghosow re wrussa y das kyns; nyns o y golonn perfydh gans an ARLOEDH y Dhuw, par dell o kolonn y das Davydh.

⁴Byttegyns a-barth Davydh an ARLOEDH y Dhuw a ros dhodho lugarn yn Yerusalem, ow trehevel y vab war y lergh, ha fondya Yerusalem;

⁵drefenn Davydh dhe wul an pyth o ewn yn golok an ARLOEDH ha ny dreylyas a-denewen a dravyth a worhemmynnis dydhyow oll y vewnans, marnas yn mater Uria an Hittyas.

⁶Yth esa bresel yntra Rehoboam ha Yeroboam dydhyow oll y vewnans.

⁷Gwriansow erell Abiyam, ha pup-tra a wrug, a nyns yns i skrifys yn lyver kovadhow myghternedh Ysrael?

⁸Abiyam a goskas gans y thasow, hag i a'n ynkleudhyas yn sita Davydh. Ena y vab Asa a dheuth war y lergh.

⁹Y'n ugensves blydhen a Yeroboam myghtern Ysrael, Asa a dhallathas reynya war Yuda;

¹⁰ev a reynyas unn vlydhen ha dew-ugens yn Yerusalem. Hanow y vamm o Maaka myrgh Abishalom.

¹¹Asa a wrug an pyth o ewn yn golok an ARLOEDH, par dell wrussa y das Davydh.

¹²Ev a worras dhe-ves an horys-tempel worow yn-mes a'n tir, ha dilea oll an idolys re wrussa y dasow.

¹³Ev a wordhellos ynwedh y vamm Maaka dhiworth hy soedh avel mamm-vyghternes, drefenn hi dhe wruthyl imaj kasadow a Ashera; Asa a droghas dhe'n dor hy thra gasadow ha'y leski yn nans Kidron.

¹⁴Mes ny veu an tylleryow ughel kemmerys dhe-ves. Byttegyns kolonn Asa o perfydh gans an ARLOEDH oll y dhydhyow.

¹⁵Ev a dhug a-berth yn chi an ARLOEDH rohow sakrys y das ha'y rohow sakrys y honan, arghans, owr, ha lestri.

¹⁶Yth esa bresel ynter Asa ha Baasha myghtern Ysrael oll aga dydhyow.

¹⁷Baasha myghtern Ysrael eth yn-bann erbynn Yuda, ha drehevel Rama, may lestta nebonan rag mos yn-mes po dos a-ji dhe diredh Asa myghtern Yuda.

¹⁸Ena Asa a gemmeras oll an arghans ha'n owr hag o gesys yn tresorvaow chi an ARLOEDH ha tresorvaow chi an myghtern, ha'ga ri yn leuv y wesyon. Myghtern Asa a's dannvonas dhe vyghtern Ben-hadad mab Tabrimmon mab Hezyon, myghtern Aram, esa trigys yn Damaskus, ow leverel,

¹⁹‘Bedhes kevambos yntra my ha ty, kepar dell veu ynter ow thas ha'th tas jy. Yth esov ow tannvon dhis ro a arghans hag owr; ke, torr dha gevambos gans Baasha myghtern Ysrael, mayth omdenno a-dhiworthiv.’

²⁰Ben-hadad a woslowas orth myghtern Asa, ha dannvon kaslewydhyon y luyow erbynn sitys Ysrael. Ev a fethas Iyon, Dan, Abel-beth-maaka, hag oll Kinneroth, gans tiredh oll Naftali.

²¹Pan glewas Baasha hemma, ev a astelas drehevel Rama ha kildenna dhe Tirsa.

²²Ena myghtern Asa a worhemmynnis dhe Yuda oll, nagonan o gesys yn-mes: i a dhug dhe-ves meyn ha prenn Rama, gansa may fia Baasha ow trehevel ena. Gansa myghtern Asa a dhrehevis Geba yn Benyamin ha Mispa.

²³Oll gweythresow erell Asa, oll y nerth, pup-tra a wrug, ha'n sitys a dhrehevis, a nyns yns i skrifys yn lyver kovadhow myghternedh Yuda? Mes yn y gothni ev a'n jevo kleves yn y dhewdroes.

²⁴Ena Asa a goskas gans y dasow, hag a veu ynkleudhys gans y dasow yn sita y das Davydh. Y vab Yehoshafat a dheuth war y lergh.

²⁵Nadab mab Yeroboam a dhallathas reynya war Ysrael y'n nessa blydhen a Asa myghtern Yuda; ev a reynyas war Ysrael diw vlydhen.

²⁶Ev a wrug an pyth o drog yn golok an ARLOEDH, ow kerdhes yn fordh y das hag y'n pegh a wrug ev dhe Ysrael y wul.

²⁷Baasha mab Ahiya, a ji Yssakar, a vrasas er y bynn; ha Baasha a'n gweskis yn Gibbethon, o perghennys gans an Filistysi; rag yth esa Nadab hag Ysrael oll ow kul esedhva war Gibbethon

²⁸Ytho Baasha a ladhas Nadab y'n tressa blydhen a Asa myghtern Yuda, ha reynya yn y le.

²⁹Pan dheuth ha bos myghtern, ev a ladhas oll teylu Yeroboam; ny asas dhe ji Yeroboam nagonan owth anella, bys pan y'n distrusa, herwydh ger an ARLOEDH a gewsis der y was Ahiya an Shilonyas.

³⁰Hemma a hwarva drefenn an peghosow a wrug Yeroboam hag a wrug dhe Ysrael aga gul, ha drefenn an sorr may frosas an ARLOEDH, Duw Ysrael, dhodho.

³¹Lemmyn gwriansow erell Nadab, ha pup-tra a wrug, a nyns yns i skrifys yn lyver kovadhow myghternedh Ysrael?

³²Yth esa bresel ynter Asa ha myghtern Baasha oll aga dydhyow.

³³Y'n tressa blydhen a Asa myghtern Yuda, Baasha mab Ahiya a dhallathas reynya war Ysrael oll yn Tirsa; ev a reynyas peder blydhen warn ugens.

³⁴Ev a wrug an pyth o drog yn golok an ARLOEDH, ow kerdhes yn fordh Yeroboam hag y'n pegh a wrug dhe Ysrael y wul.