Read Kernewek 1 Myghternedh 19 Bible Online

1 Myghternedh 19 - Kernewek bible

1 Myghternedh 19

¹Ahab a leveris dhe Yezebel pup-tra re wrussa Elias, ha fatell ladhsa oll an brofoesi gans an kledha.

²Ena Yezebel a dhannvonas kannas dhe Elias, ow leverel, ‘Yndellma re wrello an duwow dhymm, ha moy keffrys, mar ny wrav dha vewnans avel bewnans onan anedha erbynn an termyn ma a-vorow.’

³Ena ev a borthas own; ev a sevis ha fia a-barth y vewnans, ha dos dhe Beer-sheba yn Yuda, hag ev a asas y was ena.

⁴Mes ev y honan eth y'n gwylvos, vyaj unn jydh, ha dos hag esedha yn-dann brenn banadhel. Ev a bysis may farwa: ‘Lowr yw; lemmyn, A ARLOEDH, kemmer ow bewnans, rag nyns ov gwell ages ow thasow.’

⁵Ena ev a wrowedhas yn-dann an vanadhel ha koska. Distowgh el a'n tochyas ha leverel dhodho, ‘Sav yn-bann ha dybri.’

⁶Ev a viras, hag ena orth y benn yth esa tesenn pebys war veyn poeth, ha seth a dhowr. Ev a evas ha dybri, ha growedha arta.

⁷El an ARLOEDH a dheuth an eylweyth, y dochya, ha leverel, ‘Sav yn-bann ha dybri, poken dha vyaj a vydh re ragos.’

⁸Ev a sevis, ha dybri hag eva; ena ev eth yn nerth an boes na dew-ugens dydh ha dew-ugens nos dhe Horeb, menydh Duw.

⁹Ena ev a dheuth dhe vogow, ha spena an nos ena. Ena ger an ARLOEDH a dheuth dhodho, ow leverel, ‘Pandr'a wredh omma Elias?’

¹⁰Ev a worthybis, ‘My re beu pur dhiwysyk rag an ARLOEDH, Duw an luyow, rag an Ysraelysi re eskasas dha gevambos, terri dha alteryow, ha ladha dha brofoesi gans an kledha. Nyns eus nagonan gesys marnas my, hag ymons ow hwilas ow bewnans, dh'y gemmeres dhe-ves.’

¹¹Ev a leveris, ‘Ke ha sevel war an menydh a-rag an ARLOEDH, rag yma an ARLOEDH ow tremena.’ Gwyns krev a dheuth, ow folsa menydhyow ha terri kerrek dhe demmyn a-rag an ARLOEDH, mes nyns esa an ARLOEDH y'n gwyns; ha wosa an gwyns yth esa dorgrys, mes nyns esa an ARLOEDH y'n dorgrys;

¹²ha wosa an dorgrys tan, mes nyns esa an ARLOEDH y'n tan; ha wosa an tan son taw pur.

¹³Pan y'n klewas Elias, ev a vaylyas y fas yn y vantell ha mos ha sevel yn entrans an vogow. Ena y teuth lev dhodho a leveris, ‘Pandr'a wredh omma Elias?’

¹⁴Ev a worthybis, ‘My re beu pur dhiwysyk rag an ARLOEDH, Duw an luyow; rag an Ysraelysi re eskasas dha gevambos, terri dha alteryow, ha ladha dha brofoesi gans an kledha. Nyns eus nagonan gesys marnas my, hag ymons ow hwilas ow bewnans, dh'y gemmeres dhe-ves.’

¹⁵Ena an ARLOEDH a leveris dhodho, ‘Ke, dehwel war dha fordh dhe wylvos Damaskus, ke a-ji dhe'n sita; hag untya Hazael avel myghtern war Aram,

¹⁶hag ynwedh untya Yehu mab Nimshi avel myghtern war Ysrael, hag untya Elisha mab Shafat a Abel-mehola avel profoes yn dha le.

¹⁷Piw pynag a dhienk kledha Hazael, Yehu a ladh; ha piw pynag a dhienk kledha Yehu, Elisha a ladh.

¹⁸Mes my a as seyth mil yn Ysrael, oll an re na blegyas dewlin dhe Baal na amma dhodho.’

¹⁹Ytho ev a dhibarthas alena, ha kavoes Elisha mab Shafat, esa owth aras. Yth esa dewdhek yew a oghen a-ragdho, hag yth esa ev gans an dewdhegves. Elias a'n tremenas ha tewlel y vantell warnodho.

²⁰Ev a asas an oghen, poenya war-lergh Elias, ha leverel, ‘Gas vy dhe amma dhe'm tas ha dhe'm mamm, hag ena my a'th siw.’ Ena Elias a leveris dhodho, ‘Dehwel arta; rag pandr'a wrug vy dhis?’

²¹Ev a dhehwelis a'y siwya, kemmeres yew a'n oghen, ha'ga ladha; ev a vrojyas aga hig gans daffar an oghen, ha'y ri dhe'n bobel, hag i a dhybris. Ena ev a sevis ha mos wosa Elias, ha menystra dhodho.