Read Kernewek 1 Myghternedh 20 Bible Online

1 Myghternedh 20 - Kernewek bible

1 Myghternedh 20

¹Ben-hadad myghtern Aram a guntellas war-barth oll y lu; yth esa dewdhek warn ugens myghtern ganso, keffrys ha mergh ha charettow. Ev eth yn-bann erbynn Samaria ha gorra esedhva warnedhi ha'y gweskel.

²Ena ev a dhannvonas kannasow a-berth y'n sita dhe Ahab myghtern Ysrael, ha leverel dhodho: ‘Yndellma y lever Ben-hadad:

³Dha arghans hag owr yw dhymm; dha wragedh a'n tekka ha fleghes yw dhymm ynwedh.’

⁴Myghtern Ysrael a worthybis, ‘Dell leverydh, ow arloedh, A vyghtern, my yw dhis, ha pup-tra a'm beus.’

⁵An kannasow a dheuth arta ha leverel: ‘Yndellma y lever Ben-hadad: My a dhannvonas dhis, ow leverel, “Deliver dhymm dha arghans hag owr, dha wragedh ha'th fleghes”;

⁶byttegyns, my a dhannvon ow wesyon dhis a-vorow a-dro dhe'n termyn ma, hag i a hwila y'th chi ha chiow dha wesyon, ha gorra aga leuv war bypynag a bleg dhedha, ha'y gemmeres dhe-ves.’

⁷Ena myghtern Ysrael a elwis war oll henavogyon an tir, ha leverel, ‘Gwelewgh fatell usi an gour ma ow hwilas dregynn; rag ev a dhannvonas dhymm rag ow gwragedh, ow fleghes, ow arghans, hag ow owr; ha ny'n neghis.’

⁸Ena oll an henavogyon hag oll an bobel a leveris dhodho, ‘Na woslow, ha na assent.’

⁹Ytho ev a leveris dhe gannasow Ben-hadad, ‘Leverewgh dhe'm arloedh an myghtern: Pup-tra a wovynnsys a'th was yn kynsa my a'n gwra; mes an dra ma ny allav gul.’ An kannasow a dhibarthas ha dri ger dhodho arta.

¹⁰Ben-hadad a dhannvonas dhodho ha leverel, ‘Re wrello an duwow yndellma dhymm, ha moy keffrys, mars eus doust lowr gesys yn Samaria dhe ri dornas dhe bubonan a'n bobel a'm siw.’

¹¹Myghtern Ysrael a worthybis, ‘Leverewgh dhodho: Ny dal neb a wisk arvow bostya avel neb a'n diwisk.’

¹²Pan glewas Ben-hadad an messaj ma — hag ev owth eva gans an vyghternedh y'n skovvaow — ev a leveris dh'y wer, ‘Kemmerewgh agas tylleryow!’ Hag i a gemmeras aga tylleryow erbynn an sita.

¹³Ena y teuth neb unn profoes dhe vyghtern Ahab a Ysrael ha leverel, ‘Yndellma y lever an ARLOEDH, A welsys oll an routh veur ma? Mir, my a's re y'th leuv hedhyw; ha ty a wodhvydh ow bos an ARLOEDH.’

¹⁴Ahab a leveris, ‘Piw ganso?’ Ev a leveris, ‘Yndellma y lever an ARLOEDH, Gans an wer yowynk a serv pennsevigyon an rannvroyow.’ Ena ev a leveris, Piw a dhalleth an vatel? Ev a worthybis, ‘Ty.’

¹⁵Ena ev a guntellas an wer yowynk a serv pennsevigyon an rannvroyow, dew kans dewdhek warn ugens; hag a-wosa ev a guntellas oll an bobel a Ysrael, seyth mil.

¹⁶I eth yn-mes y'n hanter-dydh, ha Ben-hadad owth eva yn fedhow y'n tyldow, ev ha'n dewdhek warn ugens myghtern y geffrysysi.

¹⁷An wer yowynk a serv pennsevigyon an rannvroyow eth yn-mes yn kynsa. Ben-hadad re dhannvonsa aspioryon, hag i a dherivas dhodho, ‘Gwer re dheuth yn-mes a Samaria.’

¹⁸Ev a leveris, ‘Mar teuthons yn-mes yn kres, kemmerewegh i yn few; mar teuthons yn-mes rag bresel, kemmerewgh i yn few.’

¹⁹An wer yowynk a serv pennsevigyon an rannvroyow a dheuth yn-mes a'n sita, ha'n lu a's siwyas.

²⁰Hag i a ladhas peub y wour; Aram a fias hag Ysrael a jasyas war aga lergh, mes Ben-hadad myghtern Aram a dhienkas war vargh gans re a'n varghogyon.

²¹Myghtern Ysrael eth yn-mes, omsettya war an vergh ha'n charettow, ha fethas Aram yn ladhva veur.

²²Ena an profoes a dheuth nes dhe vyghtern Ysrael ha leverel dhodho, ‘Deus, omgrevha, hag ombreder yn ta an pyth a wredh; rag y'n gwenton myghtern Aram a dheu arta er dha bynn.’

²³Gwesyon myghtern Aram a leveris dhodho, ‘Aga duwow yw duwow a'n menydhyow, hag yndellma i o kreffa agesson; mes gas ni dhe vatalyas orta y'n gwastattir, hag yn sur ni a vydh kreffa agessa.

²⁴Ha gwra hemma: gordhyllo an vyghternedh, peub a'y le, ha gorra kaslewydhyon yn aga le;

²⁵ha kuntell lu ervys avel an lu re gellsys, margh rag margh ha charett rag charett; ena ni a omladh er aga fynn y'n gwastattir, hag yn sur ni a vydh kreffa agessa.’ Ev a woslowas orth aga lev, ha gul yndellma.

²⁶Y'n gwenton Ben-hadad a guntellas Aram ha mos bys yn Afek rag batalyas orth Ysrael.

²⁷Wosa bos an Ysraelysi kuntellys ha sosten res dhedha, i eth er aga fynn; pobel Ysrael a gampyas a-dal dhedha avel dew flokk vyghan a ever, hag Aram a lenwis an pow.

²⁸Gour Duw a dheuth ha leverel dhe vyghtern Ysrael, ‘Yndellma y lever an ARLOEDH: Drefenn Aram dhe leverel, “An ARLOEDH yw Duw an menydhyow mes nyns yw Duw an nansow”, ytho my a re oll an routh veur ma y'th leuv, ha hwi a wodhvydh ow bos an Arloedh.’

²⁹I a gampyas an eyl a-dal y gila seyth dydh moy. Ena y'n seythves dydh an vatel a dhallathas; an Ysraelysi a ladhas kans mil droesek a Aram yn unn jydh.

³⁰An remenant a fias dhe Afek, dhe'n tour; ha'n fos a goedhas war an seyth mil warn ugens o gesys. Ben-hadad a fias ynwedh, ha dos a-berth y'n tour hag omgudha a stevell dhe stevell.

³¹Y wesyon a leveris dhodho, ‘Mir, ni re glewas bos tregeredhus myghternedh chi Ysrael; gwren omwiska gans saghlenn a-dro dh'agan kres ha lovonow war agan penn, ha mos yn-mes dhe vyghtern Ysrael; martesen ev a saw dha vewnans.’

³²Ytho i a golmas saghlenn a-dro dh'aga kres, gorra lovonow war aga fenn, mos dhe vyghtern Ysrael, ha leverel, ‘Dha was Ben-hadad a lever, “Gas vy dhe vewa.” ’ Hag ev a leveris, ‘Usi ev hwath yn few? Ev yw ow broder.’

³³An wer a gonvedhas hemma avel koel da; i a's kemmeras yn uskis a-dhiworto ha leverel, ‘Gwir, Ben-hadad yw dha vroder.’ Ena ev a leveris, ‘Ke dh'y gyrghes.’ Ytho Ben-hadad a dheuth yn charett.

³⁴Ben-hadad a leveris dhodho, ‘My a dhaswra an trevow a gemmeras ow thas a-dhiworth dha das; ha ty a yll fondya marghasow ragos dha honan yn Damaskus, par dell wrug ow thas yn Samaria.’ Myghtern Ysrael a worthybis, ‘My a'th tannvon dhe-ves gans an kevambos ma.’ Ytho ev a wrug kevambos ganso ha'y asa dhe vos.

³⁵Orth gorhemmynn an ARLOEDH unn esel a gowetha an brofoesi a leveris dh'y gila, ‘Gwask vy!’ Mes an gour a naghas y weskel.

³⁶Ena ev a leveris dhodho, ‘Drefenn nag es gostydh dhe lev an ARLOEDH, kettell vydhydh diberthys ahanav, lew a'th ladh.’ Ha pan dhibarthas anodho, lew a'n kavas ha'y ladha.

³⁷Ena ev a gavas gour arall ha leverel, ‘Gwask vy!’ Ytho an gour a'n gweskis, hag orth y weskel ev a'n golias.

³⁸Ena an profoes a dhibarthas, ha gortos an myghtern war an fordh, ow tivelebi y semlans gans lystenn war y lagas.

³⁹Pan esa an myghtern ow tremena, ev a grias war an myghtern ha leverel, ‘Dha was eth yn-mes yn kres an vatel; ena souder a dreylyas ha dri gour dhymm, ha leverel, “Gwith an gour ma; mar tienk, dha vewnans a vydh res rag y vewnans, poken ty a be talent a arghans.”

⁴⁰Rag bos dha was bysi omma hag ena, gyllys o.’ Myghtern Ysrael a leveris dhodho, ‘Yndellma y fydh dha vreus; rag ty dha honan a'n erviras.’

⁴¹Ena ev a gemmeras an lystenn yn uskis a'y lagas. Myghtern Ysrael a'n aswonnis avel onan a'y brofoesi.

⁴²Ena ev a leveris dhodho, ‘Yndellma y lever an ARLOEDH, “Drefenn ty dhe asa dhe dhiank an gour neb a apoyntis dhe dhistruans, ytho dha vewnans a vydh rag y vewnans, ha dha bobel rag y bobel.” ’

⁴³Myghtern Ysrael eth dhe dre, poes ha digolonnek, ha dos dhe Samaria.