Read Kernewek 1 Myghternedh 21 Bible Online

1 Myghternedh 21 - Kernewek bible

1 Myghternedh 21

¹Wosa hemma y siwyas an hwarvosow ma: Naboth an Yezreelyas a'n jevo gwinlann yn Yezreel, ryb palas myghtern Ahab a Samaria.

²Ahab a leveris dhe Naboth, ‘Ro dhymm dha winlann, ma'm bydh erber, drefenn y vos ogas dhe'm chi; my a re dhis gwinlann well rygdhi; poken, mars yw da genes, my a re dhis hy thalvosogeth yn arghans.’

³Mes Naboth a leveris dhe Ahab, ‘An ARLOEDH a'm difennas a ri dhis eretons ow thasow.’

⁴Ahab a dhehwelis dhe dre yn poes ha digolonnek drefenn an pyth a leveris dhodho Naboth an Yezreelyas; rag ev re leveris, ‘Ny rov dhis eretons ow thasow.’ Ev a wrowedhas war y weli, treylya dhe-ves y fas, ha ny vynna dybri.

⁵Y wreg Yezebel a dheuth dhodho ha leverel, ‘Prag yth os mar dhigolonn ma na vynnydh dybri?’

⁶Ev a leveris dhedhi, ‘Drefenn my dhe gewsel orth Naboth an Yezreelyas ha leverel dhodho, “Ro dhymm dha winlann rag arghans; poken, mars yw gwell genes, my a re dhis ken winlann rygdhi”; mes ev a worthybis, “Ny rov ow gwinlann dhis.” ’

⁷Y wreg Yezebel a leveris dhodho, ‘A ny wovernydh Ysrael? Sav, deber, ha bydh lowenek; my a re dhis gwinlann Naboth an Yezreelyas.’

⁸Ytho hi a skrifas lytherow yn hanow Ahab ha'ga selya gans y sel; hi a dhannvonas an lytherow dhe'n henavogyon ha dhe'n ugheloryon esa trigys gans Naboth yn y sita.

⁹Hi a skrifas y'n lytherow, ‘Gelwewgh penys, ha gorrewgh Naboth dhe benn an kuntelles;

¹⁰settyewgh dew vilen a-dal dhodho dhe dhustunia er y bynn, ow leverel, “Ty re vollethis Duw ha'n myghtern.” Ena degewgh e yn-mes, ha'y labydha bys y'n mernans.’

¹¹Gwer y sita, an henavogyon ha'n ugheloryon esa trigys yn y sita, a wrug dell dhannvonsa Yezebel ger dhedha.

¹²I a elwis penys ha settya Naboth dhe benn an guntelles.

¹³An dhew vilen a dheuth a-ji hag esedha a-dal dhodho; ha'n vilens a dhustunias erbynn Naboth yn lok an bobel, ow leverel, ‘Naboth a vollethis Duw ha'n myghtern.’ Ytho i a'n dug yn-mes a'n sita ha'y labydha bys y'n mernans.

¹⁴Ena i a dhannvonas dhe Yezebel, ow leverel, ‘Naboth re beu labydhys; marow yw.’

¹⁵Kettell glewas Yezebel bos Naboth labydhys ha marow, Yezebel a leveris dhe Ahab, ‘Ke, kemmer perghennogeth a winlann Naboth an Yezreelyas, a naghas hy ri dhis a arghans; rag nyns yw bew Naboth, mes marow.’

¹⁶Kettell glewas Ahab bos Naboth marow, Ahab eth dhe winlann Naboth an Yezreelyas rag kemmeres perghennogeth anodho.

¹⁷Ena ger an ARLOEDH a dheuth dhe Elias an Tishbeyas, ow leverel:

¹⁸Sav, ke ha metya gans Ahab myghtern Ysrael, usi yn Samaria; yma ev lemmyn yn gwinlann Naboth, le mayth eth rag kemmeres perghennogeth.

¹⁹Ty a lever dhodho, ‘Yndellma y lever an ARLOEDH: A ledhsys, hag ynwedh kemmeres perghennogeth?’ Ty a lever dhodho, ‘Yndellma y lever an ARLOEDH: Y'n tyller may lapyas an keun goes Naboth, keun a lap dha woes ynwedh.’

²⁰Ahab a leveris dhe Elias, ‘A'm kevsys, ow eskar?’ Ev a worthybis, ‘My re'th kavas. Drefenn ty dhe wertha dha honan dhe wul an pyth yw drog yn golok an ARLOEDH,

²¹my a dhre terroes warnas; my a'th tistru, ha treghi a-dhiworth Ahab pub gorreydh, keth po rydh, yn Ysrael;

²²ha my a wra dha ji haval dhe ji Yeroboam mab Nebat, ha haval dhe ji Baasha mab Ahiya, drefenn ty dhe'm brovokya dhe sorr ha gul dhe Ysrael pegha.

²³Ynwedh a Yezebel an ARLOEDH a leveris, “An keun a dheber Yezebel ryb fos Yezreel.”

²⁴Neb a verow a deylu Ahab y'n sita an keun a dheber; ha neb a verow y'n pow ydhyn an ebron a dheber.’

²⁵(Yn hwir nyns esa nagonan haval dhe Ahab, a werthas y honan dhe wul an pyth o drog yn golok an ARLOEDH, ynniys gans y wreg Yezebel.

²⁶Ev a faryas yn kasadow owth holya idolyow, par dell wrussa an Amorysi, neb a veu herdhys yn-mes gans an ARLOEDH a-rag an Ysraelysi.)

²⁷Pan glewas Ahab an geryow na, ev a skwardyas y dhillas ha gorra saghlenn war y gig noeth; ev a wrug penys, growedha y'n saghlenn, ha mos a-dro yn foredhek.

²⁸Ena ger an ARLOEDH a dheuth dhe Elias an Tishbeyas:

²⁹‘A welsys fatell uvelhas Ahab y honan a-ragov? Drefenn ev dhe uvelhe y honan a-ragov, ny dhrov terroes yn y dhydhyow; mes yn dydhyow y vab my a dhre terroes war y ji.’