Read Kernewek 1 Myghternedh 3 Bible Online

1 Myghternedh 3 - Kernewek bible

1 Myghternedh 3

¹Solomon a wrug keffrysyans demmedhyans gans Faro myghtern Ejyp, hag ev a gemmeras myrgh Faro ha'y dri dhe sita Davydh, bys pan worfennsa drehevel y balas y honan, ha chi an ARLOEDH, ha'n fos a-dro dhe Yerusalem.

²Yth esa an bobel ow sakrifia y'n tylleryow ughel, drefenn na via chi drehevys hwath dhe hanow an ARLOEDH.

³Solomon a garas an ARLOEDH, ow kerdhes yn ordenansow Davydh y das: saw y hwre ev sakrifia ha leski ynkys y'n tylleryow ughel.

⁴An myghtern eth dhe Gibeon dhe sakrifia, rag bos henna an tyller ughel meur. Solomon a offrynnas milvil offrynn leskys war an alter na.

⁵Yn Gibeon an ARLOEDH a omdhiskwedhas dhe Solomon yn hunros yn nos: ha Duw a leveris, ‘Govynn orthiv an pyth a vynnydh my dhe ri dhis.’

⁶Ha Solomon a leveris, ‘Ty re dhiskwedhas dhe'th was Davydh ow thas tregeredh veur, drefenn ev dhe gerdhes a-ragos yn gwiryonedh, yn lenduri hag ewnhynseth an golonn genes; ha ty re'n gwithas rag an kuvder meur ma, ha ri mab dhodho dhe esedha war y dron hedhyw.

⁷Ha lemmyn, A ARLOEDH ow Duw, ty re wrug dha was myghtern yn le ow thas Davydh, kynth ov marnas flogh byghan; ny wonn fatell ylliv yn-mes na dos a-ji.

⁸Hag yma dha was yn mysk dha bobel re dhewissys, pobel veur, mar niverus ma na yllons bos komptys na niverys.

⁹Ro dhe'th was ytho kolonn a yll konvedhes rag barna dha bobel; rag piw a yll barna dha bobel mar veur ma?’

¹⁰Plegadow o an kows ma dhe'n ARLOEDH, Solomon dhe wovynn an dra ma.

¹¹Ha Duw a leveris dhodho, ‘Drefenn ty dhe wovynn hemma, ha drefenn na wovynnsys dhe'th honan bewnans hir na kevoeth, na bewnans dha eskerens, mes govynn ragos dha honan konvedhes dhe venystra barn,

¹²my a wra lemmyn herwydh dha er. Yn tevri, my a re dhis kolonn fur ha meur hy honvedhes; nyns esa denvyth avellos a-ragos ha ny sev denvyth avellos war dha lergh.

¹³My a re dhis ynwedh an pyth na wovynnsys, kevoeth hag enor oll dha dhydhyow; ny vydh myghtern arall kehevelys orthis.

¹⁴Mar kerdhydh y'm fordhow, ow kwitha ow ordenansow hag ow gorhemmynnow, dell gerdhi dha das Davydh, ena my a ystynn dha dhydhyow.’

¹⁵Ena Solomon a dhifunas; hunros o. Ev a dheuth dhe Yerusalem le may sevis a-rag argh kevambos an ARLOEDH. Ev a offrynnas offrynnow leskys hag offrynnow kres, ha provia gwledh rag oll y wesyon.

¹⁶Ena diw venyn o horys a dheuth dhe'n myghtern ha sevel a-ragdho.

¹⁷An eyl a leveris, ‘Mar pleg, ow ARLOEDH, an venyn ma ha my yw trigys y'n keth chi; ha my a dhineythis flogh pan esa hi y'n chi.

¹⁸Ena y'n tressa dydh wosa my dhe dhineythi, an venyn ma a dhineythis ynwedh. Yth esen ni war-barth; nyns esa denvyth arall genen y'n chi, marnas agan diw y'n chi.

¹⁹Ena mab an venyn ma a verwis y'n nos, drefenn hi dhe wrowedha warnodho.

²⁰Hi a sevis yn kres an nos ha kemmeres ow mab a'm tenewen ha'th vaghteth ow koska. Hi a'n gorras orth hy bronn, ha gorra hy mab marow orth ow bronn.

²¹Pan sevis myttinweyth rag maga ow mab, my a welas y vos marow; mes pan viris gans rach, kler o nag o an mab a dhineythis.’

²²Mes an venyn arall a leveris, ‘Na, an mab bew yw dhymm, ha'n mab marow yw dhis.’ Ha'y ben a leveris, ‘Na, an mab marow yw dhis, ha'n mab bew yw dhymm.’ Yndellma i a gewsis a-rag an myghtern.

²³Ena an myghtern a leveris, ‘An eyl a lever, “Hemm yw ow mab yw bew, ha dha vab marow”; ha'y ben a lever, “Nansi! Dha vab yw marow, ha'm mab vy yw bew.” ’

²⁴Ytho an myghtern a leveris, ‘Drewgh kledha dhymm,’ hag i a gyrghas kledha a-rag an myghtern.

²⁵An myghtern a leveris, ‘Rynnewgh an maw yn diw rann; ena rewgh hanter dhe'n eyl, ha hanter dh'y ben.’

²⁶Mes an venyn, ha dhedhi an mab bew, a leveris dhe'n myghtern — drefenn piteth rag hy mab dhe leski ynni — ‘Mar pleg, ow arloedh, ro dhedhi an maw bew; yn tevri na'n ladh!’ Ha'y ben a leveris, ‘Ny vydh ev na dhymm na dhis; rann e.’

²⁷Ena an myghtern a worthybis: ‘Ro dhe'n kynsa benyn an maw bew; na'n ladh. Hi yw y vamm.’

²⁸Ysrael oll a klewas a'n vreus re rosa an myghtern; hag i a ownas an myghtern, drefenn i dhe weles bos furneth Duw ynno, dhe wul barn.