Read Kernewek 1 Myghternedh 4 Bible Online

1 Myghternedh 4 - Kernewek bible

1 Myghternedh 4

¹Myghtern Solomon o myghtern war oll Ysrael,

²ha'n re ma o y soedhogyon: Azaria mab Sadok o an oferyas;

³Elihoref hag Ahiya mebyon Shisha o skrifennysi; Yehoshafat mab Ahilud o kovadhor;

⁴Benaya mab Yehoyada o kaslewydh an lu; Sadok hag Abiathar o oferysi;

⁵Azaria mab Nathan esa a-ugh an governours; Zabud mab Nathan o oferyas ha koweth an myghtern;

⁶Ahishar a'n jeva charj a'n lys; hag Adoniram mab Abda a'n jeva charj a'n lavur konstrynys.

⁷Solomon a'n jevo dewdhek governour war oll Ysrael, neb a brovia boes dhe'n myghtern ha'y ji; res o dhe beub gul provians rag unn mis y'n vlydhen.

⁸Ottomma aga henwyn: Ben-hur yn bro venydhyek Efraym;

⁹Ben-deker yn Makaz, Shaalbim, Beth-shemesh, hag Elon-beth-hanan;

¹⁰Ben-hesed yn Arubboth — ev a bewo Soko hag oll tiredh Hefer;

¹¹Ben-abinadab yn oll Nafath-dor — Tafath myrgh Solomon o y wreg;

¹²Baana mab Ahilud yn Taanak ha Megiddo, oll Beth-shean ryb Sarethan yn-dann Yezreel, a Beth-shean dhe Abel-mehola, bys y'n tu arall dhe Yokmeam;

¹³Ben-geber yn Ramoth-gilead — dhodho ev yth esa trevow Yair mab Manasse yn Gilead, hag ev a'n jevo ranndir Argob yn Bashan, tri-ugens sita veur gans fosow ha barrys a vrons;

¹⁴Ahinadab mab Iddo yn Mahanaym;

¹⁵Ahimaas yn Naftali — ev re gemmersa Basemath myrgh Solomon avel gwreg;

¹⁶Baana mab Hushay yn Asher hag yn Bealoth;

¹⁷Yehoshafat mab Paruagh yn Yssakar;

¹⁸Shimei mab Ela yn Benyamin;

¹⁹Geber mab Uri yn pow Gilead, pow Sihon myghtern an Amorysi hag Og myghtern Bashan. Ev o an unn governour y'n tir.

²⁰Yuda hag Ysrael o diniver avel tewes an vorlann; i a dhybri hag eva ha lowen ens.

²¹[1]Yth esa Solomon ow rewlya war oll an gwlaskordhow dhiworth an avon Ewfrates bys pow an Filistysi, ha bys yn or Ejyp; i a dhros trubyt ha servya Solomon dydhyow oll y vewnans.

²²Provians Solomon rag unn jydh o deg kor[2] warn ugens a vleus fin, ha tri-ugens kor a vrunyon,

²³deg ojyon tew, hag ugens ojyon a'n beurva, ha kans davas, keffrys ha gavrewiges, ewigow, yergh ha yer tewhes.

²⁴Rag ev a'n jevo mestrynses war oll an ranndir a'n gorlewin dhe'n avon a Tifsagh bys yn Gaza, war oll an vyghternedh a'n gorlewin dhe'n avon; hag ev a'n jevo kres a bub tu.

²⁵Hag yth esa Yuda hag Ysrael trigys yn sawder dydhyow oll Solomon, peub yn-dann y winbrenn hag yn-dann y figbrenn, dhiworth Dan bys yn Beer-sheba.

²⁶Solomon a'n jevo ynwedh dew-ugens mil stall a vergh rag y jarettow ha dewdhek mil varghek.

²⁷Ha'n wovernours a brovias sosten rag myghtern Solomon ha rag pubonan a dho dh'y voes, peub yn y vis; ny fylli travyth dhedha.

²⁸I a dhre heydh ha kalav ynwedh rag an vergh ha vergh an charettow dhe'n tyller ewn, peub herwydh y jarj.

²⁹Duw a ros dhe Solomon furneth veur, konvedhes ha helder kolonn, kepar ha'n tewes war an vorlann,

³⁰may feu furneth Solomon moy es furneth oll pobel an duryen hag oll furneth Ejyp.

³¹Ev o furra ages oll mab-den, furra ages Ethan an Ezraghyas, ha Heman, Kalkol, ha Darda, mebyon Mahol; y vri a lesas der an kenedhlow y'n kyrghynn.

³²Ev a gewsis tri mil henlavar, ha skrifa mil ha pymp kan.

³³Ev a gewsi a wydh, dhiworth an keder usi yn Lebanon bys y'n hyssop a dyv y'n fos; ev a gewsi a enyvales, hag ydhyn, ha kramviles, ha puskes.

³⁴Tus a dho a'n kenedhlow oll rag klewes furneth Solomon; i a dho a vyghternedh oll an nor re glewsa a'y furneth.