Read Kernewek 1 Myghternedh 5 Bible Online

1 Myghternedh 5 - Kernewek bible

1 Myghternedh 5

¹[3]Hiram myghtern Tyr a dhannvonas y wesyon dhe Solomon, pan glewas i dh'y untya myghtern yn le y das; rag Hiram o pup-prys koweth dhe Davydh.

²Solomon a dhannvonas ger dhe Hiram, ow leverel,

³‘Ty a woer na allas ow thas drehevel chi rag hanow an ARLOEDH y Dhuw drefenn an breselyow gans y eskerens a bub tu, bys pan y's gorras an ARLOEDH yn-dann wodhnow y dreys.

⁴Mes lemmyn an ARLOEDH ow Duw re ros powes dhymm a bub tu; nyns eus na eskar na anfeus.

⁵Ytho my a vynn drehevel chi rag hanow an ARLOEDH ow Duw, dell leveris an ARLOEDH dhe'm tas Davydh, “Dha vab neb a worrav war dha dron y'th le a dhrehav chi rag ow hanow.”

⁶Rakhenna gorhemmynn bos treghys ragov kederwydh a Lebanon. Ow wesyon a vydh gans dha wesyon, ha my a re gobrow dhe'th wesyon herwydh dha hwans; rag ty a woer nag eus denvyth yntredhon a woer treghi gwydh avel an Sidonysi.’

⁷Pan glewas Hiram geryow Solomon ev a lowenhas yn feur, ha leverel, ‘Bedhes bennigys an ARLOEDH hedhyw, re ros dhe Davydh mab fur dhe vos a-ugh an bobel veur ma.’

⁸Hiram a dhannvonas ger dhe Solomon, ‘My re glewas an messaj a dhannvensys dhymm; my a gollenow oll dha vodh a-dro dhe brenn keder ha prenn meryw.

⁹Ow wesyon a's dre war vor dhiworth Lebanon; my a's gorr war-barth avel skathow-kloes dhe vos war vor dhe'n tyller a dhiskwedhydh. My a's digelm ena dhe vos kemmerys genes. Ha ty a gollenow ow edhommow ow provia boes rag ow hoskordh.’

¹⁰Ytho Hiram a brovias pub edhomm Solomon rag prenn keder ha prenn meryw.

¹¹Ha Solomon a ros ugens mil kor[4] a waneth avel boes rag y goskordh, hag ugens kor a oyl pur. Solomon a ros hemma dhe Hiram blydhen ha blydhen.

¹²Ytho an ARLOEDH a ros furneth dhe Solomon, dell ambosas dhodho. Yth esa kres yntra Hiram ha Solomon; ha'ga dew a wrug kevambos.

¹³Myghtern Solomon a gavas lavurysi gonstrynys a Ysrael oll; ha'n niver o deg warn ugens mil wour.

¹⁴Ev a's dannvonas dhe Lebanon, deg mil an mis yn korow; i a spena mis yn Lebanon ha dew vis yn tre; Adoniram a'n jevo charj a'n lavur konstrynys.

¹⁵Solomon a'n jevo ynwedh deg lavuryas ha tri-ugens ha peswar-ugens ser men y'n vro venydhyek,

¹⁶keffrys ha tri mil ha tri kans a bennweythoryon a-ugh an gweyth, yn charj an dus a wre an gweyth.

¹⁷Orth gorhemmynn an myghtern i a vengleudhya meyn kostek meur rag fondya selveyn an chi gans meyn treghys.

¹⁸Yth esa drehevoryon Solomon ha drehevoryon Hiram ha'n Gebalysi ow treghi an veyn ha pareusi an prenn ha'n veyn rag drehevel an chi.