Read Kernewek 1 Myghternedh 7 Bible Online

1 Myghternedh 7 - Kernewek bible

1 Myghternedh 7

¹Trydhek blydhen yth esa Solomon ow trehevel y ji y honan, hag ev a worfennas y ji kowal.

²Ev a dhrehevis Chi Koeswik Lebanon kans kevelin y hys, hanter-kans kevelin y les, ha deg kevelin warn ugens y ughelder, drehevys gans peder res a golovenyow keder, gans kebrow keder war an kolovenyow.

³An to a veu gwrys a gederwydh war an pymp keber ha dew-ugens, pymthek yn pub rew, esa war an kolovenyow.

⁴Yth esa teyr res a fenestri, an eyl a-dal hy ben yn teyr res.

⁵Oll an darasow ha'n postow-daras a's tevo framyow pedrek; yth esa fenester a-dal fenester, an eyl erbynn y gila y'n teyr res.

⁶Ev a wrug hel a golovenyow hanter-kans kevelin hy hys ha deg kevelin warn ugens hy les. Yth esa portal a-rag, gans kolovenyow ha nenlenn.

⁷Ev a wrug hel an tron, hel an vreus, le may vedha ow ri barn, pannellys gans prenn keder a'n leur dhe'n styllyow.[5]

⁸Y ji y honan le mayth esa trigys, yn klos arall a-dryv an hel, o drehevys yn kehaval. Solomon a wrug ynwedh chi haval dhe'n hel ma rag myrgh Faro, re gemmersa yn priosoleth.

⁹Oll an re ma o gwrys yn meyn kostek, treghys herwydh musur, heskennysys gans heskennow a-ji hag a-ves, a'n selveyn dhe amal an to, ha dhiworth klos an chi bys y'n klos meur.

¹⁰An selveyn o yn meyn kostek, meyn a eth po a dheg kevelin.

¹¹Yth esa meyn kostek a-ugh, treghys herwydh musur, ha prenn keder.

¹²An klos meur a'n jevo teyr res a veyn treghys oll a-dro, hag unn res a gebrow keder treghys; yndellma yth o ynwedh yn klos pervedhel chi an ARLOEDH ha portal an chi.

¹³Myghtern Solomon a dhannvonas dhe Tyr ha kyrghes Hiram.

¹⁴Ev o mab gwedhwes a loeth Naftali, ha'y das, gour a Tyr, re bia krefter brons; ev o leun a sleyghneth, poell ha skentoleth yn pub eghenn a ober yn brons. Ev a dheuth dhe Solomon hag a wrug oll y ober.

¹⁵Ev a volas dew goloven a vrons. An eyl o etek kevelin hy ughelder, ha linenn a dhewdhek kevelin a veu musur hy hompas; kow o, ha'y dewder o peswar bys. An goloven arall o an keth.[6]

¹⁶Ev a wrug ynwedh dew benn-koloven a vrons teudh dhe settya war wartha an kolovenyow; ughelder an unn penn-koloven o pymp kevelin, ha ughelder y gila o pymp kevelin.

¹⁷Ev a wrug roesweyth plethys gans tergh a gadonweyth rag an pennow-koloven war wartha an kolovenyow, seyth rag pub koloven.

¹⁸Hag ev a wrug greunavalow yn diw res ow kylghya pub roesweyth, dhe afina an penn-kolovenyow war wartha an kolovenyow. Ev a wrug an keth rag pub penn-koloven.

¹⁹An pennow-koloven esa war wartha an kolovenyow y'n portal o yn furv lilis, peswar kevelin yn ughelder.

²⁰War an pennow-koloven war wartha an dhiw goloven, ynwedh a-ugh an balek krenn esa ryb an roesweyth, yth esa dew kans greunaval yn resyow oll a-dro.

²¹Ev a settyas an kolovenyow yn-bann yn portal an tempel. Ev a dhrehevis an goloven dhyghow ha'y henwel Yakin, hag ev a dhrehevis an goloven gledh ha'y henwel Boaz.

²²War benn an kolovenyow yth esa gweyth lili. Yndellma y feu gorfennys ober an kolovenyow.

²³Ev a wrug an mor teudh; krenn o, deg kevelin y vusur a-dreus, ha deg kevelin yn ughelder. Linenn a dheg kevelin warn ugens a vusuras y hompas.

²⁴Yn-dann y amal yth esa pompyons oll a-dro, deg warn ugens kevelin ow kyrghynna an mor; yth esa an pompyons yn diw res, molys gans an mor pan veu molys.

²⁵Ev a sevi war geyn dewdhek ojyon, tri ow mires dhe'n gogledh, tri ow mires dhe'n howlsedhes, tri ow mires dhe'n dyghow, ha tri ow mires dhe'n duryen; an mor a veu settys warnedha, ha'ga fedrennow war-tu ha'n pervedh.

²⁶Dornva o y dewder; y amal a veu gwrys avel amal hanaf po bleujenn lili; ev a synsi dew vil vath.[7]

²⁷Ev a wrug ynwedh an deg karrigell a vrons; pub karrigell o peswar kevelin hy hys, peswar kevelin hy les, ha tri hevelin hy ughelder.

²⁸Hemm o gwrians an karrigellow: i a's tevo emlow; yth esa an emlow a-ji dhe'n framyow;

²⁹war an emlow hag o settys y'n framyow yth esa lewyon, oghen ha cherubim. War an framyow, hag a-ugh hag yn-dann an lewyon ha'n oghen, yth esa garlontow a ober mortholys.

³⁰Pub karrigell a's tevo peder ros a vrons hag aghlow a vrons; dhe'n peder korn yth esa treys rag golghell. An treys a veu gwrys yn gweyth teudh gans plethennow a bub tenewen.

³¹An ganow rag an wolghell a veu a-ji dhe gurun, unn kevelin hy ughelder; an ganow o kylghyek, dell yw sel gwrys, kevelin ha hanter. A-dro dh'y ganow yth esa gravyans; pannellow an karrigellow o pedrek a-der kylghyek.

³²Yth esa an peder ros yn-dann an pannellow; yth esa aghlow an rosow stegys dhe'n karrigellow; ughelder pub ros o kevelin ha hanter.

³³An rosow a veu gwrys avel ros charett; aga aghlow, aga bothow, aga asennow, ha'ga hammogow a veu gwrys yn gweyth teudh.

³⁴Yth esa peswar dornla dhe'n peder kornell a bub karrigell; an dornleow o unn darn gans an garrigell.

³⁵War benn an garrigell yth esa bond kylghyek, hanter kevelin y ughelder; war benn an garrigell hy latthys ha'y fannellow o unn rann gensi.

³⁶War an estyll, henn yw an pannellow, ev a gervyas cherubim, lewyon ha palmwydh, war-lergh an spas rag pubonan, ha plethow oll a-dro.

³⁷Y'n fordh ma ev a wrug an deg karrigell; i oll a's teva unn molans, an keth myns ha'n keth furv.

³⁸Ev a wrug deg golghell a vrons, pub golghell ow synsi dew-ugens bath, ha peswar kevelin hy musur a-dreus; yth esa golghell rag pubonan a'n deg karrigell.

³⁹Ev a worras pymp karrigell orth tenewen dyghow an chi ha pymp orth tenewen kledh an chi; ev a settyas an mor orth kornell dhyghow-duryen an chi.

⁴⁰Hiram a wrug ynwedh an pottow, an reuvow ha'n bollow. Ytho Hiram a worfennas oll an ober a wrug rag Solomon yn chi an ARLOEDH:

⁴¹an dhiw goloven, dhew volla an penn-kolovenyow war wartha an kolovenyow, an dhew roesweyth rag kudha dhew volla an penn-kolovenyow war wartha an kolovenyow;

⁴²an peswar kans greunaval rag an dhew roesweyth, diw res a reunavalow rag pub roesweyth, rag kudha bolla an penn-kolovenyow war wartha an kolovenyow;

⁴³an deg karrigell, ha'n deg golghell war an karrigellow;

⁴⁴an unn mor, ha'n dewdhek ojyon yn-dann an mor.

⁴⁵An pottow, an reuvow, ha'n bollow, oll an lestri ma gwrys gans Hiram rag myghtern Solomon rag chi an ARLOEDH o a vrons lentrus.

⁴⁶Yn plen an Yordan an myghtern a's molas y'n dor pri yntra Sukkoth ha Sarethan.

⁴⁷Solomon a asas oll an lestri heb aga foesa, rag i dhe vos mar lies; ny yllys musura an poes.

⁴⁸Solomon a wrug oll an lestri esa yn chi an ARLOEDH; an alter a owr, an voes a owr rag bara an wolok,

⁴⁹an golowbrennyer a owr pur, pymp dhe'n dyghow ha pymp dhe'n kledh, a-rag an sentri pervedhel; an bleujennow, an lugern, ha'n gevelyow, a owr;

⁵⁰an hanafow, an gwelsigow-porv, an bollow, an skudellow rag ynkys, ha'n padellow-tan, a owr pur; ha pannellow darasow an chi pervedhel, an tyller an moyha sans, ha rag darasow chi an tempel, a owr.

⁵¹Yndellma oll an ober a wrug myghtern Solomon rag chi an ARLOEDH o gorfennys. Solomon a dhros an taklow re bia sakrys gans y das Davydh, an arghans, an owr, ha'n lestri, ha'ga gwitha yn tresorvaow chi an ARLOEDH.