Read Kernewek 2 Myghternedh 1 Bible Online

2 Myghternedh 1 - Kernewek bible

2 Myghternedh 1

¹Wosa mernans Ahab Moab a rebellyas erbynn Ysrael.

²Lemmyn Ahazia re goedhsa der an lattis yn y jambour y'n soler yn Samaria, hag o klav. Ytho ev a dhannvonas kannasow, ow leverel dhedha, ‘Kewgh ha govynnewgh orth Baal-zebub, duw Ekron, mar kwrav gwellhe dhiworth an kleves ma.’

³Mes el an ARLOEDH a leveris dhe Elias an Tishbeyas, ‘Sav, yskynn dhe vetya orth kannasow myghtern Samaria ha govynn orta, “Yw drefenn nag eus Duw yn Ysrael mayth ewgh dhe wovynn orth Baal-zebub, duw Ekron?”

⁴Lemmyn ytho yndellma y lever an ARLOEDH, “Ny wredh diyskynna dhiworth an gweli res ythys dhodho. Merwel a wredh, yn sur.” ’ Hag Elias a omdennas.

⁵Pan dhehwelis an kannasow dhe'n myghtern, ev a wovynnas orta, ‘Prag y tehwelsowgh?’

⁶‘Den a dheuth dhe vetya orthyn’, a worthybsons, ‘hag ev a leveris dhyn, “Dehwelewgh dhe'n myghtern a'gas dannvonas ha leverewgh dhodho: Yndellma y lever an ARLOEDH: Yw drefenn nag eus Duw yn Ysrael may tannvonydh kannasow dhe wovynn orth Baal-zebub, duw Ekron? Rakhenna ny wredh diyskynna dhiworth an gweli res ythys dhodho. Merwel a wredh, yn sur.” ’

⁷Hag ev a leveris dhedha, ‘Py par gour o hag a dheuth dhe vetya orthowgh ha leverel hemma dhywgh?’

⁸I a worthybis, ‘Gwiskys o yn dillasenn a vlew gans grogys a ledher a-dro dh'y gres.’ An myghtern a leveris, ‘Elias an Tishbeyas o henna.’

⁹Ena an myghtern a dhannvonas dhodho kapten a hanter-kans gans y hanter-kans den. Ev eth trohag Elias, esa owth esedha war benn bre, ha leverel dhodho, ‘Gour Duw, an myghtern a lever, “Diyskynn!” ’

¹⁰Elias a worthybis dhe'n kapten, ‘Mars ov gour Duw, des tan dhiworth an nev ha dha gonsumya, ty ha'th hanter-kans den.’ Ena tan a goedhas dhiworth an nev ha'y gonsumya, ev ha'y dus.

¹¹Arta an myghtern a dhannvonas dhodho kapten arall gans y hanter-kans den. An kapten a leveris dhodho, ‘Gour Duw, an myghtern a lever, “Diyskynn yn skon!” ’

¹²Elias a worthybis, ‘Mars ov gour Duw, des tan dhiworth an nev ha dha gonsumya, ty ha'th hanter-kans den.’ Ena tan Duw a goedhas dhiworth an nev

¹³Arta an myghtern a dhannvonas tressa kapten a hanter-kans. An tressa kapten ma a yskynnas ha mos war dhewlin a-dherag Elias. ‘Gour Duw’, a bysis ev, ‘my a'th pys, re bo drudh ow bewnans ha bewnans an hanter-kans den ma y'th wolok.

¹⁴Otta, tan re goedhas dhiworth an nev ha gonsumya an kynsa dew gapten a hanter-kansow ha'ga hanter-kans den. Mes lemmyn re bo drudh ow bewnans y'th wolok.’

¹⁵Ena el an ARLOEDH a leveris dhe Elias, ‘Diyskynn ganso; na borth own anodho.’ Rakhenna ev a sevis ha diyskynna ganso dhe'n myghtern.

¹⁶Ev a leveris dhodho, ‘Yndellma y lever an ARLOEDH: A-ban dhannvensys kannasow dhe wovynn orth Baal-zebub, duw Ekron, yw drefenn nag eus Duw yn Ysrael? Ny dhiyskynnydh dhiworth an gweli res ythys dhodho. Merwel a wredh, yn sur.’

¹⁷Ytho ev a verwis herwydh ger an ARLOEDH re gewsis Elias. Yoram a reynyas yn y le yn nessa blydhen Yehoram mab Yehoshafat myghtern Yuda, drefenn nag esa mab dhodho.

¹⁸Gweythresow erell Ahazia a wrug, a nyns yns i skrifys y'n lyver kovadhow myghternedh Ysrael?