Read Kernewek 2 Myghternedh 10 Bible Online

2 Myghternedh 10 - Kernewek bible

2 Myghternedh 10

¹Ahab a'n jevo deg mab ha tri-ugens yn Samaria. Ha Yehu a skrifas lytherow ha'ga dannvon dhe Samaria, dhe rewloryon Yezreel, dhe'n henavogyon, ha dhe withysi mebyon Ahab, ow leverel,

²‘Kettell dheu an lyther dhywgh, rag bos mebyon agas mester genowgh, ha rag bos genowgh charettow ha mergh, sita gerys hag arvow,

³dewisiwgh mab agas mester hag yw an gwella ha'n moyha abel, ha'y settya war dron y das, ha batalyas a-barth chi agas mester.’

⁴Mes yth esa own dres eghenn dhedha, hag i a leveris, ‘Otta, ny allas an dhew vyghtern sevel orto; fatell yllyn ni sevel orto?’

⁵Ytho menystrer an palys, governour an sita, an henavogyon ha'n withysi, a dhannvonas messaj dhe Yehu, ow leverel, ‘Dha wesyon on, ha ni a wra pup-tra a bysydh. Ny wren dhe dhenvyth bos myghtern; gwra an pyth yw ewn y'th tewlagas.’

⁶Ena ev a skrifas nessa lyther dhedha, ow leverel, ‘Mars owgh a-barth dhymm, ha mars owgh parys dhe woslowes orth ow lev, kemmerewgh pennow mebyon agas mester ha dos dhymm yn Yezreel a-vorow dhe'n eur ma.’ Hag yth esa mebyon an myghtern, deg den ha tri-ugens, gans ugheloryon an sita esa orth aga maga.

⁷Pan dheuth an lyther dhedha, i a gemmeras mebyon an myghtern ha'ga ladha; i a worras aga fenn yn kanstellow ha'ga dannvon dhe Yezreel.

⁸Y teuth kannas, hag ev a dherivas dhodho, ow leverel, ‘I re dhros pennow mebyon an myghtern.’ Ena ev a leveris, ‘Gorrewgh i yn dew gals orth entrans an yet bys myttin.’

⁹Ternos yth eth ev yn-mes, ha sevel ha leverel dhe'n bobel oll, ‘Ankablus owgh; otta, my a vrasas erbynn ow mester ha'y ladha; mes piw a ladhas oll an re ma?

¹⁰Godhvydhewgh lemmyn na goedh dhe'n dor travyth a er an ARLOEDH, a gewsis an ARLOEDH a-dro dhe ji Ahab; rag an ARLOEDH re wrug an pyth a leveris der y was Elias.’

¹¹Ytho Yehu a ladhas peub o gesys a ji Ahab yn Yezreel, hag oll y dus veur, ha'y gerens, ha'y oferysi, bys pan ny asas ev dhodho denvyth ow skapya.

¹²Ena ev a sevis ha diberth, ha dos dhe Samaria. War an fordh, hag ev yn Beth-eked a'n Vugeledh,

¹³Yehu a vetyas orth breder Ahazia myghtern Yuda, ha leverel, ‘Piw owgh hwi?’ Hag i a worthybis, ‘Breder Ahazia on; yth eson ow mos yn-nans dhe salusi mebyon an myghtern ha mebyon an vyghternes.’

¹⁴Hag ev a leveris, ‘Kemmerewgh i yn few.’ Hag i a's kemmeras yn few ha'ga ladha orth puth Beth-eked, dew ha dew-ugens oll war-barth; ny sparyas denvyth.

¹⁵Wosa dhiberth alena ev a vetyas orth Yehonadab mab Rekab ow tos dhe vetya orto; ev a'n salusis ha leverel dhodho, ‘Yw dha golonn len, kepar dell yw ow holonn len dhis?’ Yehonadab a worthybis, ‘Yw.’ ‘Mars yw, roy dhymm dha leuv.’ Hag ev a ros dhodho y leuv; hag ev a'n drehevis dhodho y'n charett.

¹⁶Hag ev a leveris, ‘Deus genev ha gweles ow avi rag an ARLOEDH.’ Ytho ev a wrug dhodho marghogeth yn y jarett.

¹⁷Pan dheuth dhe Samaria ev a ladhas peub o gesys dhe Ahab yn Samaria bys pan y's distrusa, herwydh ger an ARLOEDH a gewsis ev dhe Elias.

¹⁸Ena Yehu a guntellas oll an bobel war-barth ha leverel dhedha, ‘Ahab a servyas Baal nebes; mes Yehu a wra y servya yn feur.

¹⁹Lemmyn gelwewgh dhymm oll profoesi Baal, oll y wesyon hag oll y oferysi; na fylles denvyth dos, rag my a'm beus sakrifis bras dhe offrynna dhe Baal; ny wra bewa an re a fyll dos.’ Mes Yehu a'n gwrug gans felder, dhe dhistrui gordhyoryon Baal.

²⁰Yehu a leveris, ‘Sakrewgh kuntelles solem rag Baal.’ Hag i a'n gelwis.

²¹Ena Yehu a dhannvonas messaj der oll Ysrael; oll gordhyoryon Baal a dheuth ma nag esa den gesys na dheuth. I a entras yn tempel Baal, ha leun o tempel Baal dhiworth an eyl penn dh'y gila.

²²Ev a leveris dhe withyas an dhillasva, ‘Doroy an goenyow rag oll gordhyoryon Baal.’ Ytho ev a dhros an goenyow ragdha.

²³Ena Yehu eth gans Yehonadab mab Rekab a-berth yn tempel Baal ha leverel dhe wesyon Baal, ‘Hwilewgh ha gwelewgh nag eus omma genowgh gwesyon an ARLOEDH, mes unnsel gwesyon Baal.’

²⁴Ena i eth a-ji rag gul sakrifisow hag offrynnow leskys. Yehu a settyas peswar-ugens a'y wer tu a-ves ha leverel, ‘An gour a as onan a'n wer a dhrov yn agas diwleuv dhe skapya, y vewnans a vydh yn le bewnans an skapyer.’

²⁵Kettell worfennas gul an offrynn leskys, Yehu a leveris dhe'n korfwithysi ha'n gaptenyon, ‘Kewgh a-ji ha'ga ladha; na skapyes denvyth.’ Hag i a's gweskis gans min an kledha; ha'n withysi ha'n gaptenyon a's tewlis yn-mes. Ena i eth yn sentri pervedhel tempel Baal.

²⁶I a gemmeras yn-mes an peulven[5] esa yn tempel Baal ha'y leski.

²⁷Ena i a vrewis peulven Baal, ha distrui tempel Baal, ha gul anodho kawghti, bys y'n jydh hedhyw.

²⁸Yndella y hwrug Yehu distrui Baal yn-mes a Ysrael.

²⁹Byttegyns ny dreylyas Yehu dhiworth peghosow Yeroboam mab Nebat a wrug dhe Ysrael pegha — an leughi owrek esa yn Bethel hag yn Dan.

³⁰An ARLOEDH a leveris dhe Yehu, ‘Drefenn ty dhe wul yn ta dre gollenwel an pyth yw ewn y'm dewlagas, ha dhe dhyghtya chi Ahab herwydh pup-tra esa y'm kolonn, dha vebyon a'n peswora henedh a esedh war dron Ysrael.’

³¹Mes ny waytyas Yehu siwya lagha an ARLOEDH, Duw Ysrael, a leun golonn. Ny dreylyas dhiworth peghosow Yeroboam a wrug dhe Ysrael pegha.

³²Y'n dydhyow na an ARLOEDH a dhallathas godreghi rannow a Ysrael, ha Hazael a's fethas dre oll oryon Ysrael:

³³dhiworth an Yordan dhe'n howldrevel, oll tiredh Gilead, an Gadysi, ha'n Rewbenysi, ha'n Manassysi, dhiworth Aroer usi ryb nans Arnon, henn yw, Gilead ha Bashan.

³⁴Gweythresow erell Yehu, ha pup-tra a wrug, hag oll y nerth, a nyns yns i skrifys yn lyver kovadhow myghternedh Ysrael?

³⁵Yehu a goskas gans y dasow, hag i a'n ynkleudhyas yn Samaria. Ha Yehoahaz y vab a reynyas yn y le.

³⁶An termyn may reynyas Yehu war Ysrael o eth blydhen warn ugens.