Read Kernewek 2 Myghternedh 12 Bible Online

2 Myghternedh 12 - Kernewek bible

2 Myghternedh 12

¹Y'n seythves blydhen a Yehu, Yoash a dhallathas reynya, hag ev a reynyas dew-ugens blydhen yn Yerusalem. Hanow y vamm o Sibya a Beer-sheba.

²Yoash a wrug an pyth o ewn yn golok an ARLOEDH dres y dhydhyow oll, drefenn Yehoyada an oferyas dh'y dhyski.

³Mes ny veu an tylleryow ughel kemmerys dhe-ves; an bobel a besyas sakrifia ha leski offrynnow y'n tylleryow ughel.

⁴Yoash a leveris dhe'n oferysi, ‘Oll an arghans yw dres yn chi an ARLOEDH avel rohow sakrys — toll an niveryans, talas ambosow, — hag arghans an offrynnow bodhek dres a-berth yn chi an ARLOEDH,

⁵kemmeres an oferysi an re ma dhiworth an alhwedhor, hag ewnhe an chi plepynag may fo edhomm a ewnheans diskudhys.’

⁶Mes erbynn an tressa blydhen warn ugens a vyghtern Yoash, ny wrussa an oferysi ewnheansow dhe'n chi.

⁷Rakhenna myghtern Yoash a elwis Yehoyada an oferyas gans an oferysi erell ha leverel dhedha, ‘Prag nag esowgh owth ewnhe an chi? Lemmyn, ytho, na dhegemmerowgh arghans moy dhiworth agas alhwedhoryon, mes y dhaskorr rag ewnheans an chi.’

⁸Ytho an oferysi a assentyas na dhegemmerens arghans moy dhiworth an bobel, na ewnhe an chi aga honan.

⁹Yehoyada an oferyas a gemmeras kist ha tardra toll yn hy gorher, ha'y settya ryb an alter, a'n barth dhyghow ow tos a-berth yn chi an ARLOEDH. An oferysi esa ow kwitha an treudhow a worras ynni oll an arghans a veu dres a-berth yn chi an ARLOEDH.

¹⁰Peskweyth may hwelsons bos meur a arghans y'n gist, skrifennyas an myghtern ha'n arghoferyas a dheuth, hag i a gomptyas an arghans a veu kevys yn chi an ARLOEDH ha'y gelmi yn seghyer.

¹¹I a ros an arghans a veu poesys yn leuv an re a worviri an ober yn chi an ARLOEDH; ena i a'n peas dhe'n seri prenn ha'n drehevoryon esa owth oberi yn chi an ARLOEDH,

¹²dhe'n seri men ha'n dreghoryon men, ha rag prena prenn ha men nedhys rag gul ewnheansow dhe ji an ARLOEDH, ha rag oll an kostow rag ewnheansow dhe'n chi.

¹³Byttegyns ny wrussons devnydh a'n arghans dres yn chi an ARLOEDH dhe wul bollow a arghans, gwelsigow-porv, bollow-offrynn, hirgern, lestri a owr po lestri a arghans,

¹⁴rag res veu henna dhe'n weythoryon esa owth ewnhe chi an ARLOEDH ganso.

¹⁵Ny byssons akontys dhiworth an wer a dhelirvsons dhedha an arghans yn aga leuv rag tyli an weythoryon, rag i a dhyghtya yn onest.

¹⁶Ny veu an arghans dhiworth an offrynnow kammweyth ha'n offrynnow pegh dres a-berth y'n chi an ARLOEDH; an oferysi a's pewas.

¹⁷Ena Hazael myghtern Aram eth yn-bann ha batalyas orth Gath ha'y hemmeres. Mes pan settyas y fas rag mos yn-bann erbynn Yerusalem,

¹⁸Yoash myghtern Yuda a gemmeras oll an rohow sans re sakras y ragresygyon Yehoshafat, Yoram hag Ahazia, myghternedh Yuda, hag oll an owr a veu kevys yn tresoryow chi an ARLOEDH hag yn chi an myghtern, ha'ga dannvon dhe Hazael myghtern Aram, hag ev a gildennas dhiworth Yerusalem.

¹⁹Gweythresow erell Yoash, ha pup-tra a wrug, a nyns yns i skrifys yn lyver kovadhow myghternedh Yuda?

²⁰Y wesyon a sevis ha gul bras, ha ladha Yoash yn chi Millo, war an fordh a dhiyskynn dhe Silla.

²¹Yozakar mab Shimeath, ha Yehozabad mab Shomer, y wesyon, a'n ladhas hag ev a verwis. Hag ev a veu ynkleudhys gans y dasow yn sita Davydh; hag Amasia a reynyas yn y le.