Read Kernewek 2 Myghternedh 16 Bible Online

2 Myghternedh 16 - Kernewek bible

2 Myghternedh 16

¹Y'n seytegves blydhen a Pekagh mab Remalia, Ahaz mab Yotham myghtern Yuda a dhallathas reynya.

²Ugens bloedh o Ahaz pan dhallathas reynya, hag ev a reynyas hwetek blydhen yn Yerusalem, ha ny wre an pyth o ewn yn golok an ARLOEDH y Dhuw, kepar ha Davydh y das.

³Mes ev a gerdhi yn hynsyow myghternedh Ysrael, hag a wrug dh'y vab tremena dre dan, herwydh gweythresow divlas an kenedhlow a fesyas an ARLOEDH a-rag pobel Ysrael.

⁴Hag ev a sakrifia ha leski offrynnow y'n tylleryow ughel, ha war an breow, hag yn-dann bub gwydhenn las.

⁵Ena Resin myghtern Aram, ha Pekagh mab Remalia myghtern Ysrael, eth yn-bann dhe Yerusalem rag bresel; i a settyas esedhva a-dro dhe Ahaz mes ny yllens y fetha.

⁶Y'n termyn na Resin, myghtern Aram a dhaskavas Elath rag Aram ha fesya an Yedhewon dhiworth Elath; an Edomysi a dheuth dhe Elath, hag i re drigas ena bys y'n jydh hedhyw.

⁷Ahaz a dhannvonas kannasow dhe Tiglath-pileser myghtern Assyria, ow leverel, ‘Dha was ha dha vab ov. Deus yn-bann ha saw vy dhiworth leuv myghtern Aram ha dhiworth leuv myghtern Ysrael a omsett er ow fynn.’

⁸Hag Ahaz a gemmeras an arghans ha'n owr a veu kevys yn chi an ARLOEDH hag yn tresorvaow chi an myghtern, ha'ga dannvon avel ro dhe vyghtern Assyria.

⁹Myghtern Assyria a woslowas orto; myghtern Assyria a geskerdhas erbynn Damaskus, ha'y hemmeres, ow toen hy fobel yn keth dhe Kir; hag ev a ladhas Resin.

¹⁰Ena myghtern Ahaz eth dhe Damaskus rag metya orth Tiglath-pileser myghtern Assyria, hag ev a welas ena an alter esa yn Damaskus. Myghtern Ahaz a dhannvonas dhe'n oferyas Uria patron a'n alter, hag oll manylyon hy drehevyans.

¹¹Ytho Uria an oferyas a dhrehevis alter herwydh pup-tra re dhannvonsa myghtern Ahaz dhiworth Damaskus; hag Uria an oferyas a'n drehevis kyns an myghtern dhe dhos dhiworth Damaskus.

¹²Pan veu an myghtern devedhys dhiworth Damaskus, an myghtern a welas an alter. Ena an myghtern a dheuth nes dhe'n alter hag mos yn-bann dhedhi.

¹³Ev a loskas y offrynn leskys ha'y offrynn greun, ha divera y offrynn diwes, ha skoellya goes y offrynnow kres war an alter.

¹⁴Ev a gemmeras an alter a vrons esa a-rag an ARLOEDH dhiworth tal an chi, dhiworth an le ynter an alter nowydh ha chi an ARLOEDH, ha'y gorra orth tu kledhbarth an alter nowydh.

¹⁵Myghtern Ahaz a worhemmynnis dhe Uria an oferyas, ow leverel, ‘War an alter veur losk offrynn leskys an myttin, hag offrynn greun an gorthugher, hag offrynn leskys an myghtern, ha'y offrynn greun, gans offrynn leskys oll pobel an pow, aga offrynn greun, ha'ga offrynn diwes; ena skoell warnedhi oll an goes dhiworth an offrynnow leskys, hag oll an goes dhiworth an sakrifisow; mes an alter a vrons a vydh dhymmo vy rag ow devnydh ow honan.’[8]

¹⁶Yndella y hwrug Uria an oferyas, herwydh pup-tra a worhemmynnis Ahaz.

¹⁷Myghtern Ahaz a droghas dhe-ves pannellow an karrigellow, hag a gemmeras yn-nans an wolghell ha'n mor a-dhiworth an oghen a vrons esa yn-danno, ha'y worra war sel a veyn.

¹⁸Ev a gemmeras dhe-ves an portal gorherys rag devnydh y'n sabot re bia drehevys y'n chi, ha'n entrans rag an myghtern tu a-ves dhe ji an ARLOEDH. Ev a wrug hemma dhe blesya myghtern Assyria.

¹⁹Gweythresow erell Ahaz a wrug, a nyns yns i skrifys yn lyver kovadhow myghternedh Yuda?

²⁰Ahaz a goskas gans y dasow, hag ev a veu ynkleudhys gans y dasow yn sita Davydh. Y vab Hezekia a reynyas yn y le.