Read Kernewek 2 Myghternedh 19 Bible Online

2 Myghternedh 19 - Kernewek bible

2 Myghternedh 19

¹Pan glewas myghtern Hezekia hemma, ev a skwardyas y dhillas, omgwetha yn yskar, ha dos yn chi an ARLOEDH.

²Ev a dhannvonas Elyakim, governour an palys, ha Shebna an pennskrifennyas, ha henavogyon an oferysi, kwethys yn yskar, dhe Ysay an profoes, mab Amos.

³Yn-medhons dhodho, ‘Hezekia a lever hemma: An jydh ma yw dydh a alar ha keredh ha bismer; rag mebyon re dheuth bys min konna an brys, mes nyns eus nerth dhe dhineythi.

⁴Martesen an ARLOEDH dha Dhuw a glew oll geryow an Rabshake, a wrug y vester, myghtern Assyria dannvon dhe wul ges a'n Duw bew, hag ev a geredh drefenn an geryow re glewas an ARLOEDH dha Dhuw. Rakhenna drehav pysadow rag an remenant yw gesys.’

⁵Pan dheuth gwesyon myghtern Hezekia dhe Ysay,

⁶Ysay a leveris dhedha, ‘Yndella y hwrewgh leverel dh'agas mester, “Yndellma y lever an ARLOEDH: Na berthewgh own a'n geryow re glewsowgh, ma'm milligas gansa gwesyon myghtern Assyria.

⁷Ottavy ow korra ynno spyrys, ha pan glew kyhwedhel ev a dhehwel dh'y bow y honan; ha my a wra dhodho koedha der an kledha yn y bow y honan.” ’

⁸An Rabshake a dhehwelis, ha klewes y hwrug myghtern Assyria omdenna dhiworth Lakish, hag yth esa ow patalyas orth Libna.

⁹An myghtern a glewas y teuth Tirhaka myghtern Kush yn-mes dhe vatalyas orto. Ytho ev a dhannvonas kannasow dhe Hezekia arta, ow leverel,

¹⁰‘Kewsiwgh yndellma dhe Hezekia myghtern Yuda: Na wres dha Dhuw a drestydh ynno dha doella, owth ambosa na vydh Yerusalem res yn leuv myghtern Assyria.

¹¹Ty re glewas an pyth re wrug myghternedh Assyria dhe oll an powyow, orth aga leun dhistrui. Ha ty, a vydhydh delivrys?

¹²A wrug duwow an kenedhlow aga delivra, an kenedhlow a wrug ow thasow aga distrui, Gozan, Haran, Resef, ha mebyon Eden esa yn Telassar?

¹³Ple'ma myghtern Hamath, ha myghtern Arpad, ha myghtern an sita[11] Sefarvaym, Hena, hag Ivva?’

¹⁴Hezekia a gemmeras an lyther dhiworth leuv an kannasow ha'y redya; ena Hezekia eth yn-bann dhe ji ARLOEDH ha'y lesa a-rag an ARLOEDH.

¹⁵Ha Hezekia a bysis a-dherag an ARLOEDH, ow leverel, ‘A ARLOEDH. Duw Ysrael, a esedh war an cherubim, ty yw Duw, ty dha honan, dhe oll gwlaskordhow an norvys; ty re wrug nev ha nor.

¹⁶Pleg dha skovarn yn-nans, A ARLOEDH, ha klew, igor dha dhewlagas, A ARLOEDH, ha gwel; klew geryow Sennagherib, re dhannvonas dhe skornya an Duw bew.

¹⁷Gwir yw, A ARLOEDH, myghternedh Assyria dhe dhistrui an kenedhlow ha'ga thiryow,

¹⁸ha re dewlis aga duwow y'n tan. I a's distruis, rag ny vons duwow, mes gweyth diwla den, prenn ha men.

¹⁹Lemmyn, A ARLOEDH agan Duw, my a'th pys, saw ni yn-mes a'y leuv, may hwodhvo oll gwlaskordhow an norvys ty dha honan, A ARLOEDH, dhe vos Duw.’

²⁰Ena Ysay mab Amos a dhannvonas dhe Hezekia, ow leverel, ‘Yndellma y lever an ARLOEDH, Duw Ysrael: My re glewas dha bysadow dhymm a-dro dhe Sennagherib myghtern Assyria.

²¹Hemm yw an ger re gewsis an ARLOEDH er y bynn: Hi a'th tispres, hi a'th skorn — an wyrghes, myrgh Sion; myrgh Yerusalem re shakyas hy fenn war dha lergh.

²²‘Piw a skornsys ha milliga? Piw yth trehevsys dha lev er y bynn ha drehevel dha dhewlagas yn woethus? Erbynn an Sans a Ysrael!

²³Dre leuv dha gannasow ty re skornyas an Arloedh ha leverel, “Gans ow lies charett my res eth yn-bann dhe dopp an menydhyow, dhe bella rannow Lebanon; My re droghas an hirra a'y gederwydh, an gwella a'y veryw. My re dheuth dh'y fenn pella, dhe brysk y goeswik.

²⁴My re balas puthow hag eva dowrow estren, my re dhesyghas dre wodhen ow throes oll goverow Ejyp.”

²⁵‘A ny glewsys jy? Nans yw pell my a ordenas hemma. Yn dydhyow koth my a'n tewlis; lemmyn my re wrug dhodho hwarvos, rag may fydhydh ow tifeythya sitys kerys yn kalsow a radell.

²⁶Aga annedhysi, isel aga nerth, o digolonnek ha penndegys; i re dheuth ha bos avel plansow an gwel, kepar ha gwels bleudh, kepar ha gwels war dohow goleskys gans gwyns an est.[12]

²⁷‘Mes my a woer pan sevydh ha pan esedhydh, pan edh yn-mes ha pan dheudh a-ji, ha fatell gonnerydh er ow fynn.

²⁸Rag ty dhe gonneri er ow fynn ha'th valghder dhe dhos dhe'm diwskovarn, my a worr ow hig y'th troen, ha'm genva y'th tiwweus, ha my a wra dhis dehweles war an fordh may teuthys warnedhi.

²⁹‘Ha hemma a vydh an arwoedh ragos: Y'n vlydhen ma an pyth a dyv y honan a vydh dybrys, hag y'n nessa blydhen an pyth yw honan-hesys; mes y'n tressa blydhen hesiwgh, mysiwgh, plensiwgh gwinlannow ha dybrewgh aga frutys.

³⁰An remenant gesys a ji Yuda a wreydh war-nans, ha doen frut war-vann;

³¹rag remenant a yn-mes dhiworth Yerusalem, ha diankoryon dhiworth menydh Sion. Avi ARLOEDH an luyow a wra hemma.

³²‘Rakhenna yndellma y lever an ARLOEDH a-dro dhe vyghtern Assyria: Ny dheu a-ji dhe'n sita ma, na tenna seth ena; ny dheu er hy fynn gans skoes, na krugya gweyth-esedhva er hy fynn.

³³War an fordh may teuth, war an keth honna ev a dhehwel; ny dheu a-ji dhe'n sita ma, yn-medh an ARLOEDH.

³⁴My a vydh skoes dhe'n sita ma dh'y sawya a-barth dhymmo vy hag a-barth Davydh ow gwas.’

³⁵Y'n nos na el an ARLOEDH eth yn-mes, ha gweskel pymp ha naw-ugens a vilyow yn kamp Assyria; ha pan sevis tus ternos, otta, korfow marow ens i oll.

³⁶Ena Sennagherib myghtern Assyria a omdennas, mos tre ha triga yn Nineve.

³⁷Hag y hwarva, pan esa ow kordhya yn chi y dhuw Nisrok, y vebyon Adrammelek ha Shareser a'n ladhas gans an kledha, hag i a skapyas dhe bow Ararat. Hag Esarhaddon y vab a reynyas yn y le.