Read Kernewek 2 Myghternedh 2 Bible Online

2 Myghternedh 2 - Kernewek bible

2 Myghternedh 2

¹Pan vynnas an ARLOEDH kemmeres Elias yn-bann dhe nev gans korwyns, yth eth Elias gans Elisha dhiworth Gilgal.

²Elias a leveris dhe Elisha, ‘Gorta omma, my a'th pys, rag an ARLOEDH re'm dannvonas dhe Bethel.’ Elisha a leveris, ‘Dell vew an ARLOEDH, ha dell vew dha enev, ny wrav dha asa.’ Ytho i eth yn-nans dhe Bethel.

³Mebyon an brofoesi yn Bethel a dheuth yn-rag dhe Elisha ha leverel dhodho, ‘A wodhes an ARLOEDH dhe gemmeres dha vester dhiwarnas hedhyw?’ Ev a leveris, ‘Gonn, my a'n goer. Na leverewgh travyth.’

⁴Hag Elias a leveris dhodho, ‘Elisha, gorta omma, my a'th pys; rag an ARLOEDH re'm dannvonas dhe Yeriko.’ Hag ev a leveris, ‘Dell vew an ARLOEDH ha dell vew dha enev, ny wrav dha asa.’ Ytho i a dheuth dhe Yeriko.

⁵Mebyon an brofoesi yn Yeriko a dheuth dhe Elisha ha leverel dhodho, ‘A wodhes an ARLOEDHdhe gemmeres dha vester dhiwarnas hedhyw?’ Hag ev a worthybis, ‘Gonn, my a'n goer. Na leverewgh travyth.’

⁶Ena Elias a leveris dhodho, ‘Gorta, my a'th pys, rag an ARLOEDH re'm dannvonas dhe'n Yordan.’ Mes ev a leveris, ‘Dell vew an ARLOEDH ha dell vew dha enev, ny wrav dha asa.’ Ytho an dhew eth yn-rag.

⁷Hanter-kans gour a vebyon an brofoesi eth ha sevel rag mires a bellder; ha'n dhew a sevis ryb an Yordan.

⁸Elias a gemmeras y vantell hag ev a's rolyas ha frappya an dowrow gensi. An dowr a veu diberthys dhe'n eyl tenewen ha dh'y gila mayth eth an dhew a-dreus war dir sygh.

⁹Pan esens ow mos a-dreus, y leveris Elias dhe Elisha, ‘Lavar dhymm an pyth a allav y wul ragos kyns ow bos kemmerys a-dhiworthis.’ Elisha a leveris ‘My a'th pys, re bo warnav rann dhewblek a'th spyrys.’

¹⁰Hag ev a leveris, ‘Ty re bysis neppyth kales, mes mara'm gwelydh ha my ow pos kemmerys a-dhiworthis, yndella y fydh ragos; poken ny vydh yndella.’

¹¹Hag y hwarva, hag i ow mos yn-rag ha kewsel, otta, charett a dan ha mergh a dan a's dibarthas an eyl dhiworth y gila, hag Elias eth yn-bann gans korwyns a-berth y'n nev.

¹²Elisha a welas henna hag ev a armas, ‘Ow thas! Ow thas! Charett Ysrael ha'y varghogyon’. Ha ny'n gwelas na fella. Ev a dhalghennas y

¹³Ev a guntellas yn-bann mantell Elias a goedhsa a-dhiworto ha dehweles ha sevel ryb glann an Yordan;

¹⁴Ev a gemmeras mantell Elias a goedhsa a-dhiworto ha gweskel an dowr ha leverel, ‘Ple'ma an ARLOEDH, Duw Elias?’ Pan y'n gweskis. an dowr a veu diberthys dhe'n eyl tenewen ha dh'y gila hag Elisha eth a-dreus.

¹⁵Ha pan y'n gwelas mebyon an brofoesi re bia yn Yeriko, i a leveris, ‘Spyrys Elias a drig war Elisha.’ Hag i a dheuth dhe vetya orto hag omblegya dhe'n dor a-ragdho.

¹⁶I a leveris dhodho, ‘Otta lemmyn, yma gans dha wesyon hanter-kans gour krev. Gas dhedha mos, ni a'th pys, rag hwilas dha vester, rag own Spyrys an ARLOEDH re'n synsis yn-bann ha'y dewlel war neb menydh, po yn neb nans.’ Hag ev a leveris, ‘Na's dannvenowgh.’

¹⁷Ha pan ynnisons warnodho bys pan esa meth warnodho, ev a leveris, ‘Dannvenewgh i.’ Ytho i a dhannvonas hanter-kans gour; hag i a hwilas dres tri dydh mes ny'n kavas.

¹⁸Ha pan dheuthons arta dhodho, drefenn ev dhe wortos yn Yeriko, ev a leveris dhedha, ‘A ny leveris dhywgh, “Na gewgh”?’

¹⁹Gwer an sita a leveris dhe Elisha, ‘Mir, teg yw desedhans an sita ma, dell wel ow arloedh: mes drog yw an dowr ha difroeth yw an tir.’

²⁰Ev a leveris, ‘Drewgh dhymm bolla nowydh, ha gorrewgh hoelan ynno.’ Hag i a'n dros dhodho.

²¹Ev eth yn-mes dhe fenten an dowr ha tewlel hoelan ynni ha leverel, ‘Yndellma y lever an ARLOEDH, “My re burhas an dowr ma; ny vydh a-dhiworta mernans na difroethter na fella.” ’

²²An dowr re beu pur bys y'n jydh ma, herwydh lavar Elisha a leveris ev.

²³Ev eth yn-bann alena dhe Bethel. Hag ev ow mos war an fordh, y teuth mebyon vyghan yn-mes a'n sita ha'y skornya, ha leverel dhodho, ‘Ke yn-bann, ty benn-blogh! Ke yn-bann, ty benn-blogh!’

²⁴Ev a dreylyas a-dro ha mires orta ha'ga milliga yn hanow an ARLOEDH. Hag y teuth diw orses mes a'n koes ha skwardya dew flogh ha dew-ugens anedha.

²⁵Ev eth alena dhe venydh Karmel, hag alena ev a dhehwelis dhe Samaria.