Read Kernewek 2 Myghternedh 21 Bible Online

2 Myghternedh 21 - Kernewek bible

2 Myghternedh 21

¹Manasse o dewdhek bloedh pan dhallathas reynya, hag ev a reynyas pymp blydhen ha hanter-kans yn Yerusalem. Hefsiba o hanow y vamm.

²Ev a wrug an pyth o drog yn golok an ARLOEDH, ow siwya gweythresow kasadow an kenedhlow a fesyas an ARLOEDH yn-mes a-dherag pobel Ysrael.

³Ev a dastrehevis an tylleryow ughel a dhistruis y das Hezekia; ev a dhrehevis alteryow dhe Baal, ev a wrug Ashera, dell wrussa Ahab myghtern Ysrael, gordhya oll lu nev, ha'ga servya.

⁴Ev a dhrehevis alteryow yn chi an ARLOEDH, may lavarsa an ARLOEDH anedha, ‘Yn Yerusalem y hworrav ow hanow.’

⁵Ev a dhrehevis alteryow rag oll lu an nev y'n dhew klos chi an ARLOEDH.

⁶Ev a wre dh'y vab tremena dre dan; ev a wre dewinieth ha pystri, ha dyghtya nygromons ha pystrioryon. Ev a wrug meur a dhrog yn golok an ARLOEDH, orth y brovokya dhe sorr.

⁷Ev a settyas an imaj gravys a Ashera re wrussa y'n chi may leveris an ARLOEDH anodho dhe Davydh ha dh'y vab Solomon, ‘Y'n chi ma hag yn Yerusalem, re dhewisis mes a oll kordhow Ysrael, my a worr ow hanow bys vykken.

⁸Ny wrav vy arta diannedhi treys Ysrael yn-mes a'n wlas a res dh'aga thasow, mar kwaytyons gul herwydh pup-tra re worhemmynnis dhedha, ha herwydh oll an lagha a worhemmynnis ow gwas Moyses dhedha.’

⁹Mes ny woslowsons; Manasse a's kammledyas may hwrussons moy drog ages an kenedhlow a dhistruis an ARLOEDH a-dherag tus Ysrael.

¹⁰An ARLOEDH a leveris der y wesyon an brofoesi,

¹¹‘Drefenn Manasse, myghtern Yuda, dhe wul an taklow kasadow ma, ha dhe wul taklow gweth ages pup-tra a wrug an Amorysi esa kyns, ha gul dhe Yuda pegha ynwedh gans y idolys,

¹²rakhenna yndellma y lever an ARLOEDH, Duw Ysrael, My a dhre war Yerusalem ha Yuda kemmys droktra may hwra kosa diwskovarn pubonan a glew anodho.

¹³My a ystynn dres Yerusalem an gordenn-vusura usys rag Samaria, ha'n plemmik usys rag chi Ahab; my a rut Yerusalem glan kepar dell rutir skudell glan, orth hy rutya glan ha'y threylya penn a-woeles.

¹⁴My a forsak remenant ow ertach, ha'ga gorra yn leuv aga eskerens; i a wra mos ha bos preydh ha pyth ravnys gans aga eskerens oll,

¹⁵drefenn i dhe wul an pyth yw drog y'm golok ha dhe'm provokya dhe sorr, a-dhia'n jydh may teuth aga thasow yn-mes a Ejyp, hwath bys y'n jydh ma.’

¹⁶Hag ynwedh Manasse a skoellyas meur a woes gwiryon, bys pan lenwis ev Yerusalem a'n eyl penn dh'y gila, war-barth gans an pegh may hwrug ev dhe Yuda y begha, ow kul an pyth o drog yn golok an ARLOEDH.

¹⁷Gweythresow erell Manasse, pup-tra a wrug, ha'n pegh a wrug, a nyns yns i skrifys yn lyver kovadhow myghternedh Yuda?

¹⁸Manasse a goskas gans y dasow, hag a veu ynkleudhys yn lowarth y ji, yn lowarth Uzza. Hag Amon y vab a reynyas yn y le.

¹⁹Dew vloedh warn ugens o Amon pan dhallathas reynya, hag ev a reynyas diw vlydhen yn Yerusalem. Hanow y vamm o Meshullemeth, myrgh Harus a Yotba.

²⁰Ev a wrug an pyth o drog yn golok an ARLOEDH, kepar dell wrussa y das Manasse.

²¹Ev a gerdhas yn oll an fordh may kerdhas y das, ha servya an imajys a servyas y das, ha'ga gordhya.

²²Ev a asas an ARLOEDH, Duw y dasow, ha ny gerdhas yn fordh an ARLOEDH.

²³Gwesyon Amon a vrassa er y bynn, ha ladha an myghtern yn y ji.

²⁴Mes pobel an pow a ladhas pubonan re vrassa erbynn myghtern Amon, ha pobel an pow a wrug dhe Yosia y vab bos myghtern yn y le.

²⁵An gweythresow erell a wrug Amon, a nyns yns i skrifys yn lyver kovadhow myghternedh Yuda?

²⁶Ev a veu ynkleudhys yn y vedh yn lowarth Uzza: ha Yosia y vab a reynyas yn y le.