Read Kernewek 2 Myghternedh 24 Bible Online

2 Myghternedh 24 - Kernewek bible

2 Myghternedh 24

¹Yn y dhydhyow, Nebukadnessar myghtern Babylon a dheuth yn-bann, ha Yehoyakim eth ha bos y omajer dres teyr blydhen; ena ev a dreylyas ha rebellya er y bynn.

²An ARLOEDH a dhannvonas er y bynn bagasow a Kaldeanys, bagasow a Aramysi, bagasow a Moabysi ha bagasow a Ammonysi; ev a's dannvonas erbynn Yuda rag y distrui, herwydh ger an ARLOEDH a gewsis der y wesyon an brofoesi.

³Yn sur hemma a dheuth war Yuda herwydh gorhemmynn an ARLOEDH, rag aga hemmeres yn-mes dhiworth y wolok, drefenn oll peghosow Manasse a wrug,

⁴ha drefenn an goes gwiryon re skoellsa; rag ev a lanwsa Yerusalem a woes gwiryon, ha ny vynna an ARLOEDH y ava.

⁵Gweythresow erell Yehoyakim ha pup-tra a wrug, a nyns yns i skrifys yn lyver kovadhow myghternedh Yuda?

⁶Ytho Yehoyakim a goskas gans y dasow; ha Yehoyakin, y vab, a reynyas yn y le.

⁷Ny dheuth myghtern Ejyp yn-mes a'y wlas arta, rag myghtern Babylon re gemmersa pup-tra esa dhe vyghtern Ejyp, dhiworth nans Ejyp bys y'n avon Ewfrates.

⁸Yehoyakin o etek bloedh pan dhallathas reynya, hag ev a reynyas tri mis yn Yerusalem. Hanow y vamm o Nehushta, myrgh Elnathan a Yerusalem.

⁹Ev a wrug an pyth o drog yn golok an ARLOEDH, kepar dell wrussa y das.

¹⁰Y'n termyn na gwesyon Nebukadnessar myghtern Babylon a dheuth erbynn Yerusalem, ha'n sita a veu yn-dann esedhva.

¹¹Nebukadnessar myghtern Babylon y honan a dheuth erbynn an sita, ha'y wesyon owth omsettya a-dro dhedhi.

¹²Yehoyakin myghtern Yuda eth yn-mes dhe vyghtern Babylon, ev, ha'y vamm, ha'y wesyon, ha'y bennsevigyon, ha'y soedhogyon; ha myghtern Babylon a'n kemmeras prisner yn ethves blydhen y reyn.

¹³Ev a gemmeras dhe-ves oll tresoryow chi an ARLOEDH, ha treghi dhe demmyn oll an lestri a owr re wrussa Solomon myghtern Ysrael yn tempel an ARLOEDH, dell dharganas an ARLOEDH.

¹⁴Ev a dhug oll Yerusalem yn divroedh, oll an spadhesigyon, oll an vreselyoryon, deg mil dhivres, oll an greftoryon ha'n wovyon: denvyth ny veu gesys, marnas boghosekka pobel an tir.

¹⁵Ev a dhug Yehoyakin dhe-ves yn divroedh dhe Babylon; hag ev a gemmeras yn divroedh ynwedh dhiworth Yerusalem dhe Babylon mamm an myghtern, gwragedh an myghtern, y spadhesigyon, ha gwelhevin an tir.

¹⁶Myghtern Babylon a dhros yn divroedh dhe Babylon oll an soudoryon, seyth mil, an oberoryon ha'n wovyon, unn mil, i oll krev ha gwiw rag bresel.

¹⁷Ha myghtern Babylon a wrug dhe Mattania, ewnter Yehoyakin, bos myghtern yn y le, ha chanjya y hanow dhe Sedekia.

¹⁸Unn bloedh warn ugens o Sedekia pan dhallathas reynya, hag ev a reynyas unnek blydhen yn Yerusalem. Hanow y vamm o Hamutal myrgh Yeremia a Libna.

¹⁹Ev a wrug an pyth o drog yn golok an ARLOEDH, kepar dell wrussa Yehoyakim.

²⁰Dhe wir, kemmys y sorras Yerusalem ha Yuda an ARLOEDH ma's estewlis dhiworth y lok. Sedekia a rebellyas erbynn myghtern Babylon.