Read Kernewek 2 Myghternedh 25 Bible Online

2 Myghternedh 25 - Kernewek bible

2 Myghternedh 25

¹1 Rakhenna yn nawves blydhen y reyn, y'n degves mis, yn degves dydh an mis, Nebukadnessar, myghtern Babylon a dheuth, ev hag oll y lu, erbynn Yerusalem, hag omsettya orti; hag i a dhrehevis gweyth esedhva er hy fynn war bub tu.

²An esedhva a veu gorrys a-dro dhe'n sita bys y'n unnegves blydhen a vyghtern Sedekia.

³Yn nawves dydh an peswora mis an divoetter eth ha bos mar sevur ma nag esa boes rag bobel an tir.

⁴Ena aswa a veu gwrys yn fos an sita. Oll an soudoryon eth yn-mes[14] y'n nos der an yet yntra diw fos, ogas dhe lowarth an myghtern, ha'n Kaldeanys ow kyrghynna an sita. I eth war an fordh troha'n Araba.

⁵Mes lu an Kaldeanys a helghyas an myghtern, ha'y dremena yn plenys Yeriko; oll y lu a veu keskerys dhiworto.

⁶I a sesyas an myghtern ha'y dhri dhe vyghtern Babylon yn Ribla, ha breus a veu res warnodho.

⁷I a ladhas mebyon Sedekia a-dherag y dhewlagas; ena genna yn-mes dewlagas Sedekia; i a'n golmas yn kargharow a vrons ha'y dhri dhe Babylon.

⁸Y'n pympes mis, y'n seythves dydh a'n mis, hag yw an nownsegves blydhen a vyghtern Nebukadnessar myghtern Babylon, y teuth Nebuzaradan, kapten an gorfwythysi, gwas myghtern Babylon, dhe Yerusalem.

⁹Ev a loskas chi an ARLOEDH, ha chi an myghtern, hag oll chiow Yerusalem; pub chi bras ev a loskas gans tan.

¹⁰Oll lu an Kaldeanys, esa gans kapten an gorfwithysi, a dorras an fosow a-dro dhe Yerusalem.

¹¹Nebuzaradan, kapten an withysi, a dhug yn divroedh remenant an bobel o gesys y'n sita, ha'n gilfowesigyon re gilfisa dhe vyghtern Babylon, oll remenant an routh.

¹²Mes kapten an withysi a asas re a voghosekka tus an tir dhe vos gonedhysi gwinlannow ha gonedhysi tir.

¹³An kolovenyow a vrons esa yn chi an ARLOEDH, ha'n synsellow, ha'n mor a vrons esa yn chi an ARLOEDH, an Kaldeanys a dorras yn temmyn, ha doen oll an brons dhe Babylon.

¹⁴I a gemmeras dhe-ves an kalteryow, an reuvow, an gwelsigow-porv, an basonyow rag ynkys, hag oll an lestri a vrons devnydhys yn gonis an tempel,

¹⁵an padellow-tan, ha'n basonyow. Taklow gwrys a owr kapten an withysi a gemmeras rag an owr, ha taklow gwrys a arghans, rag an arghans.

¹⁶An dhiw goloven, an unn mor, ha'n karrigellow gwrys gans myghtern Solomon rag chi an ARLOEDH — an brons a oll an taklow ma o dres poesa.

¹⁷Ughelder an eyl koloven o etek kevelin, ha warnedhi yth esa penn a vrons; ughelder an penn o tri hevelin; roesweyth ha greunavalow, oll a vrons, a gylghyas penn an goloven. An nessa koloven a's tevo an keth, gans greunavalow.

¹⁸Kapten an withysi a gemmeras Seraya an arghoferyas, Sefania an isarghoferyas, ha tri gwithyas a'n treudhow.

¹⁹A-dhiworth an sita ev a gemmeras unn spadhesik re bia kaslewydh an vreselyoryon, ha pymp gour a gonsel an myghtern a veu kevys y'n sita; ha pennskrifennyas kaslewydh an lu neb a'n jevo charj a elwel pobel an tir yn-bann dhe'n lu; ha tri-ugens gour a bobel an tir a veu kevys a-ji dhe'n sita.

²⁰Nebuzaradan kapten an withysi a's kemmeras, ha'ga dri dhe vyghtern Babylon yn Ribla.

²¹Myghtern Babylon a's gweskis, ha'ga gorra dhe'n mernans yn Ribla yn pow Hamath. Ytho Yuda eth yn divroedh yn-mes a'y dir.

²²Ev a apoyntyas Gedalia mab Ahikam mab Shafan avel governour war an bobel gesys yn pow Yuda gans Nebukadnessar myghtern Babylon.

²³Pan glewas oll kaptenyon an luyow ha'ga gwer myghtern Babylon dhe apoyntya Gedalia avel governour, i a dheuth gans aga gwer dhe Gedalia yn Mispa: Yshmael mab Nethania, Yohanan mab Kareagh, Seraya mab Tanhumeth an Netofathyas, ha Yaazania mab an Maakathyas.

²⁴Gedalia a wrug ti dhedha ha dh'aga gwer, ow leverel, ‘Na borthewgh own a soedhogyon an Kaldeanys; annedhewgh y'n tir, servyewgh myghtern Babylon, hag y fydh da genowgh.’

²⁵Mes y'n seythves mis, Yshmael mab Nethania mab Elishama, a'n teylu ryel, a dheuth gans deg den; i a weskis Gedalia may ferwis, war-barth gans an Yedhewon ha'n Kaldeanys esa ganso yn Mispa.

²⁶Ena oll an bobel, ughel hag isel, ha kaptenyon an luyow eth yn-mes ha mos dhe Ejyp; rag yth esa own dhedha a'n Kaldeanys.

²⁷Y'n seytegves blydhen warn ugens a dhivroedh Yehoyakin myghtern Yuda, y'n dewdhegves mis, y'n pympes dydh warn ugens a'n mis, Evil-merodak myghtern Babylon, y'n vlydhen may tallathas reynya, a livras myghtern Yehoyakin dhiworth prison;

²⁸ev a gewsis dhodho yn kuv, ha ri dhodho esedh a-ugh esedhow an vyghternedh erell esa ganso yn Babylon.

²⁹Ytho Yekoyakin a worras a-denewen y dhillas prison. Pub dydh a'y vewnans ev a dhybri a-dherag an myghtern.

³⁰Rag y ventons, alowans pub-dydhyek a veu res dhodho gans an myghtern hedre ve bew.