Read Kernewek 2 Myghternedh 3 Bible Online

2 Myghternedh 3 - Kernewek bible

2 Myghternedh 3

¹Yehoram, mab Ahab, a dhallathas reynya war Ysrael yn Samaria y'n etegves blydhen a Yehoshafat myghtern Yuda, hag a reynyas dewdhek blydhen.

²Ev a wrug drog yn golok an ARLOEDH, mes nyns o kepar dell wre y das ha'y vamm. Ev a dhileas peulven Baal re wrussa y das.

³Byttegyns ev a lenas orth peghosow Yeroboam mab Nebat, a wrug dhe Ysrael pegha, ha ny dreylyas dhiworta.

⁴Mesha myghtern Moab o mager a dheves, ha res o dhodho provia dhe vyghtern Ysrael kans mil oen ha kans mil hordh anknyvys.

⁵Mes pan verwis Ahab, myghtern Moab a rebellyas erbynn myghtern Ysrael.

⁶Ytho myghtern Yehoram eth yn-mes a Samaria y'n termyn na ha kuntelles war-barth oll Ysrael.

⁷Ev eth ha dannvon messaj dhe Yehoshafat myghtern Yuda, ow leverel, ‘Myghtern Moab re rebellyas er ow fynn. A vynnydh mos genev dhe werrya erbynn Moab?’ Ev a leveris, ‘My a vynn mos. Yth ov kepar ha ty, ow fobel kepar ha dha bobel, ow mergh kepar ha dha vergh.’

⁸Ev a wovynnas, ‘War by fordh a wren ni mos?’ Hag ev a worthybis, ‘Dre fordh gwylvos Edom.’

⁹Ytho myghtern Ysrael eth gans myghtern Yuda, ha myghtern Edom. Wosa kerdh gwius a seyth dydh nyns esa dowr na rag an lu na rag an chatel a'n siwyas.

¹⁰Ena yn-medh myghtern Ysrael, ‘Ellas! Ny wrug an ARLOEDH agan gelwel, an tri myghtern ma, marnas may hwrella agan ri yn leuv Moab.’

¹¹Mes Yehoshafat a leveris, ‘A nyns eus omma profoes an ARLOEDH may hyllyn dredho hwilas dhiworth an ARLOEDH?’ Ena onan a wesyon myghtern Ysrael a worthybis, ‘Yma Elisha mab Shafat, omma, neb a dhiveri dowr war dhiwla Elias.’

¹²Yehoshafat a leveris, ‘Yma ger an ARLOEDH ganso.’ Ytho myghtern Ysrael ha Yehoshafat ha myghtern Edom eth yn-nans dhodho.

¹³Elisha a leveris dhe vyghtern Ysrael, ‘Pyth eus yntredhon ni? Ke dhe brofoesi dha das ha dhe brofoesi dha vamm.’ Mes myghtern Ysrael a leveris dhodho, ‘Na, rag y feu an ARLOEDH neb a elwis an tri myghtern ma dh'aga delivra yn leuv Moab.’

¹⁴Elisha a leveris, ‘Dell vew ARLOEDH an luyow, may savav a-ragdho, mar ny ve my dhe wul vri a lok Yehoshafat myghtern Yuda, ny virsen orthis na dha weles.

¹⁵Mes lemmyn, dro telynnyer dhymm.’ Hag y hwarva, pan esa an telynnyer ow seni, leuv an ARLOEDH a dheuth warnodho.

¹⁶Hag ev a leveris, ‘Yndellma y lever an ARLOEDH, “My a wra dhe'n nans ma bos leun a bollow.”

¹⁷Rag yndellma y lever an ARLOEDH, “Ny wrewgh gweles gwyns na ny wrewgh gweles glaw; mes an nans na a vydh lenwys a dhowr may hyllowgh eva, hwi ha'gas chatel ha'gas bestes.”

¹⁸Ha nyns yw hemma marnas tra skav yn golok an ARLOEDH, rag ev a re Moab yn agas leuv.

¹⁹Hwi a wysk pub sita gerys, ha pub sita dhewisys, ha treghi pub gwydhenn dha, ha stoppya pub fenten a dhowr, ha diswul pub splatt a dir da gans meyn.’

²⁰Ternos, a-dro dhe termyn an offrynn greun, otta, dowr a dheuth a-dhiworth Edom, ha'n pow a veu lenwys a dhowr.

²¹Pan glewis oll an Moabysi an vyghternedh dhe dhos rag omladh er aga fynn, i a guntellas pubonan a allas doen arvow hag i a sevis yn-bann war an or.

²²Pan sevsons myttin a-varr, yth esa an howl ow splanna war an dowr; an Moabysi a welas an dowr a-dal dhedha mar rudh avel goes.

²³Yn-medhons, ‘Hemm yw goes; an vyghternedh re omladhsons ha ladha an eyl y gila. Ytho lemmyn, Moab, dhe'n preydh!’

²⁴Mes pan dheuthons dhe gamp Ysrael, an Ysraelysi a sevis yn-bann ha gweskel an Moabysi, may fisons dhe'n fo a-ragdha. I eth yn-rag ow kweskel an Moabysi.

²⁵Hag i a dhomhwelas an sitys, ha pub gour a dewlis men war bub splatt a dir da ha'y lenwel; hag i a stoppyas pub fenten a dhowr, ha treghi pub gwydhenn dha, bys pan na veu gesys marnas Kir-hareseth gans hy meyn yn aga le, mes tus ervys gans towlbrennyer a's kyrghynnas hag omsettya er hy fynn.

²⁶Pan welas myghtern Moab bos krev an gas er y bynn ev a gemmeras ganso seyth kans kledhevor rag herdhya yn-rag dhe vyghtern Edom. Mes ny yllens.

²⁷Ytho ev a gemmeras y vab kynsa-genys a vedha ow reynya a'y wosa, ha'y offrynna avel offrynn leskys war an fos. Y teuth sorr bras war Ysrael: i a gildennas ha dehweles dh'aga thir aga honan.