Read Kernewek 2 Myghternedh 8 Bible Online

2 Myghternedh 8 - Kernewek bible

2 Myghternedh 8

¹Elisha a gewsis orth an venyn a dhros ev hy mab arta dhe vewnans, ow leverel, ‘Sav yn-bann ha ke gans dha vayni, ha triga plepynag may hylli triga; rag an ARLOEDH re worhemmynnis divoetter a seyth blydhen, ha re dheuth seulabrys dhe'n tir.

²Ytho an venyn a sevis ha gul herwydh ger gour Duw; hi eth gans hy mayni ha triga yn pow an Filistysi dre seyth blydhen.’

³Orth penn seyth blydhen an venyn a dhehwelis dhiworth pow an Filistysi, ha mos dhe bysi an myghtern a'y chi ha'y thir.

⁴Yth esa an myghtern ow kewsel orth Gehazi, gwas gour Duw, ow leverel, ‘Lavar dhymm, my a'th pys, oll an taklow meur re wrug Elisha.’

⁵Pan esa ev ow leverel dhe'n myghtern fatell dhros ev korf marow arta dhe vewnans, otta, an venyn a dhros ev hy mab arta dhe vewnans a grias dhe'n myghtern a-barth hy chi ha'y thir. Ha Gehazi a leveris, ‘Ow arloedh an myghtern, homm yw an venyn, ha hemm yw hy mab a dhros Elisha arta dhe vewnans.’

⁶Pan wovynnas an myghtern orth an venyn, hi a'n derivas dhodho. Ytho an myghtern a apoyntyas soedhek rygdhi, ow leverel, ‘Asver pup-tra esa dhedhi, hag oll prow an gwel a-dhia'n jydh may hasas hi an tir bys lemmyn.’

⁷Elisha a dheuth dhe Damaskus; ha klav o Ben-hadad, myghtern Aram. Leverys veu dhe'n myghtern, ‘Gour Duw re dheuth omma’,

⁸hag ev a leveris dhe Hazael, ‘Kemmer ro y'th leuv ha ke rag metya orth gour Duw, ha pysi an ARLOEDH dredho, ow leverel, a wrav yaghhe dhiworth an kleves ma?’

⁹Ytho Hazael eth dhe vetya orto ha kemmeres ro ganso, begh a bup-tra da a Damaskus war dhew-ugens kowrvargh. Pan dheuth ev a ha sevys a-ragdho ha leverel, ‘Dha vab, Ben-hadad myghtern Aram, re'm dannvonas dhis, ow leverel, “A wrav yaghhe dhiworth an kleves ma?” ’

¹⁰Elisha a leveris dhodho, ‘Ke ha lever dhodho, “Ty a wra yaghhe yn sur,” mes an ARLOEDH re dhiskwedhas dhymm may hwra ev merwel yn sur.’

¹¹Hag ev a viras stag orto ha lagatta erna borthas meth, ha gour Duw a oelas.

¹²Hazael a wovynnas, ‘Prag yth oelydh, ow arloedh?’ Ev a worthybis, ‘Drefenn my dhe wodhvos an drog a wredh dhe fleghes Ysrael: ty a lesk aga heryow, ty a ladh aga gwer yowynk gans an kledha, ha brewi aga fleghigow, ha skwardya aga benynes hag yw gans flogh.’

¹³Hazael a leveris, ‘Pyth yw dha was, nag yw marnas ki, may hwrello tra a'n par ma?’ Hag Elisha a worthybis, ‘An ARLOEDH re dhiskwedhas dhymm may fydhydh myghtern war Aram.’

¹⁴Ytho, ev a dhibarthas dhiworth Elisha ha dos dh'y vester a leveris dhodho, ‘Pandr'a leveris Elisha dhis?’ Hag ev a worthybis, ‘Ev a leveris dhymm y hwredh yaghhe yn sur.’

¹⁵Mes ternos ev a gemmeras an kywlett, ha'y droghya yn dowr, ha'y lesa war y fas, may ferwis. Ha Hazael a reynyas yn y le.

¹⁶Y'n pympes blydhen a Yoram mab Ahab myghtern Ysrael, pan o Yehoshafat myghtern Yuda, Yehoram mab Yehoshafat myghtern Yuda a dhallathas reynya.

¹⁷Dewdhek bloedh warn ugens o ev pan dhallathas reynya, hag ev a reynyas eth blydhen yn Yerusalem.

¹⁸Ev a gerdhas yn fordhow myghternedh Ysrael, dell wrussa chi Ahab, rag myrgh Ahab o y wreg. Ev a wrug an pyth o drog yn golok an ARLOEDH.

¹⁹Byttegyns ny vynnas an ARLOEDH distrui Yuda a-barth Davydh y was, drefenn ev dhe ambosa dhodho ri lugarn dhodho ha dh'y dhiyskynnysi bys vykken.

²⁰Yn y dhydhyow Edom a rebellyas erbynn Yuda ha gul aga myghtern aga honan warnedha.

²¹Ena Yehoram a dremenas dhe Sair gans oll y jarettow. Ev a ehwias y'n nos ha gweskel Edom esa ow kyrghynna ev ha kaptenyon an charettow; mes y lu a fias tre.

²²Edom re beu ow rebellya erbynn Yuda bys y'n jydh ma. Yn kettermyn Libna ynwedh a rebellyas.

²³Gweythresow Yehoram erell, ha pup-tra a wrug, a nyns yns i skrifys yn lyver kovadhow myghternedh Yuda?

²⁴Yehoram a goskas gans y dasow hag a veu ynkleudhys gans y dasow yn sita Davydh; hag Ahazia y vab a reynyas yn y le.

²⁵Y'n dewdhegves blydhen a Yoram mab Ahab myghtern Ysrael, Ahazia mab Yehoram myghtern Yuda a dhallathas reynya.

²⁶Dew vloedh warn ugens o Ahazia pan dhallathas reynya, hag ev a reynyas unn vlydhen yn Yerusalem. Hanow y vamm o Athalia myrgh Omri myghtern Ysrael.

²⁷Ev a gerdhas yn fordh chi Ahab, hag a wrug drog yn golok an ARLOEDH, kepar dell wrug chi Ahab, rag ev o deuv chi Ahab.

²⁸Ev eth gans Yoram mab Ahab dhe werrya erbynn Hazael myghtern Aram yn Ramoth-gilead; ha'n Aramysi a wolias Yoram.

²⁹Myghtern Yoram a dhehwelis dhe Yezreel rag bos yaghhes dhiworth an goliow a ros dhodho an Aramysi yn Rama, pan vatalyas orth Hazael myghtern Aram. Ena Ahazia mab Yehoram myghtern Yuda eth yn-nans dhe weles Yoram mab Ahab yn Yezreel, drefenn y vos klav.