Read Kernewek 1 Kroniklys 11 Bible Online

1 Kroniklys 11 - Kernewek bible

1 Kroniklys 11

¹Oll Ysrael a omguntellas hag a dheuth dhe Davydh yn Hebron ha leverel, ‘Ni yw dha askorn ha'th kig dha honan.

²Yn termyn passys, hwath pan o Sowl myghtern, yth o ty neb a ledyas Ysrael yn-mes yn batel ha'ga dri tre. An ARLOEDH dha Dhuw a leveris dhis, Ty a vydh bugel ow fobel Ysrael ha ty a vydh rewler war ow fobel Ysrael.’

³Oll henavogyon Ysrael a dheuth dhe'n myghtern yn Hebron, ha Davydh a wrug kevambos gansa yn Hebron a-rag an ARLOEDH, hag i a untyas Davydh myghtern war Ysrael, war-lergh ger an ARLOEDH dre Samuel.

⁴Davydh hag oll Ysrael eth dhe Yerusalem, henn yw Yebus, le mayth esa an Yebusysi, trigoryon an pow.

⁵Trigoryon Yebus a leveris dhe Davydh, ‘Ny entrydh omma.’ Byttegyns Davydh a gemmeras dinas Sion, honn yw, sita Davydh.

⁶Davydh a leveris, ‘Piwpynag a wysk an Yebusysi yn kynsa a vydh penn ha kaslewydh.’ Yoab mab Seruya eth yn-bann yn kynsa, ytho ev a dheuth ha bos penn.

⁷Yth esa Davydh trigys y'n dinas; rakhenna i a's henwis sita Davydh.

⁸Ev a dhrehevis an sita a-derdro, dhiworth an Millo[16] yn kylghenn dien; ha Yoab a ewnhas remenant an sita.

⁹Davydh a dheuth ha bos moy ha moy nerthek, rag yth esa ARLOEDH an luyow ganso.

¹⁰An re ma o pennow kasoryon Davydh, a ri dhodho skoedhyans krev yn y vyghterneth, war-barth hag oll Ysrael, dh'y wul myghtern war-lergh ger an ARLOEDH a-dro dhe Ysrael.

¹¹Hemm yw rol kasoryon Davydh: Yashobeam an Hakmonyas, penn an tri; gans y wuw ev a ladhas tri hans yn unn prysweyth.

¹²Nessa dhodho o Eleazar mab Dodo an Aghoghyas.

¹³Ev a veu gans Davydh yn Pas-dammim pan veu an Filistysi kuntellys ena rag batel. Yth esa splatt dor leun a heydh, ha'n bobol a fias dhiworth an Filistysi.

¹⁴Mes i a synsis aga thir yn kres an splatt, ha'y dhefendya, ha gweskel an Filistysi; ha'n ARLOEDH a ros dhedha trygh bras an jydh na.

¹⁵Tri a'n deg penn warn ugens eth yn-nans dhe'n garrek dhe Davydh yn kav Adullam, pan veu lu an Filistysi ow kampya yn nans Refaim.

¹⁶Yth esa Davydh yn eur na y'n skons; hag yth esa savla-goelyadoryon an Filistysi yn Bethlehem.

¹⁷Davydh a leveris, yn-unn yeuni, ‘Piw a dhre dhymm dowr dhe eva dhiworth puth Bethlehem usi ryb an yet?’

¹⁸Gans henna an tri gour galloesek a dorras dre gamp an Filistysi, ha tenna dowr yn-mes a buth Bethlehem esa ryb an yet, ha'y dhri dhe Davydh. Byttegyns ny vynnas Davydh y eva hag ev a'n dinewis yn-mes dhe'n ARLOEDH,

¹⁹ha leverel, ‘Duw difenn, my dhe wul hemma. A evav goes an wer ma? Rag peryll aga bewnans i a'n dros.’ Rakhenna ny vynnas Davydh y eva. Yndella y hwrug an tri hasor.

²⁰Abishay broder Yoab o penn an deg warn ugens. Hag ev a dhrehevis y wuw erbynn tri hans den ha'ga ladha, ha gwaynya hanow yn mysk an tri.

²¹Ev o an moyha gerys-da a'n deg warn ugens hag ev a dheuth ha bos aga haslewydh; mes ny dheuth ha bos onan a'n tri.

²²Benaya mab Yehoyada, gour kolonnek dhiworth Kabseel, a wrug lies gwrians bras; ev a ladhas dew gampyer a Moab. Ynwedh ev eth yn-nans ha ladha lew yn pytt yn dydh erghek.

²³Ynwedh ev a ladhas Ejyptyan, gour pymp kevelin y ughelder. An Ejyptyan a'n jeva yn y leuv guw kepar ha gwelenn gwiader; mes Benaya a settyas warnodho gans fust, ha kibya an guw yn-mes a leuv an Ejyptyan, ha'y ladha gans y wuw y honan.

²⁴Yndella o gwriansow Benaya mab Yehoyada, gerys-da yn-mysk an deg warn ugens.

²⁵Ev o moy gerys-da es an deg warn ugens erell, mes ny dheuth ha bos onan a'n tri. Davydh a'n gwrug kapten y gorfwithysi.

²⁶An wer alloesek o Asahel broder Yoab, Elhanan mab Dodo a Bethlehem,

²⁷Shammoth an Harodyas, Heles an Pelonyas,

²⁸Ira mab Ikkesh an Tekoyas, Abiezer an Anathothyas,

²⁹Sibbekay an Hushathyas, Ilay an Aghoghyas,

³⁰Maharay an Netofathyas, Heled mab Baana an Netofathyas,

³¹Ithay mab Ribay dhiworth Gibea a'n Benyaminysi, Benaya an Pirathonyas,

³²Huray dhiworth nansow Gaash, Abiel an Arbathyas,

³³Azmaveth an Baharumyas, Elyaghba an Shaalbonyas,

³⁴Hashem an Gizonyas, Yonathan mab Shage an Hararyas,

³⁵Ahiam mab Sakar an Hararyas, Elifal mab Ur,

³⁶Hefer an Mekerathyas, Ahiya an Pelonyas

³⁷Hesro an Karmelyas, Naaray mab Ezbay,

³⁸Yoel broder Nathan, Mibhar mab Hagri,

³⁹Selek an Ammonyas, Naharay an Beerothyas, deger arvow Yoab mab Seruya,

⁴⁰Ira an Ithryas, Gareb an Ithryas,

⁴¹Uria an Hittyas, Zabad mab Aghlay,

⁴²Adina mab Shiza an Rewbenyas, hembrenkyas a'n Rewbenysi ha deg gour warn ugens ganso,

⁴³Hanan mab Maaka, ha Yoshafat an Mithnyas,

⁴⁴Uzzia an Ashterathyas, Shama ha Yeiel mebyon Hotham an Aroeryas,

⁴⁵Yediael mab Shimri, hag Yoha y vroder, an Tisyas,

⁴⁶Eliel an Mahavyas, Yeribay ha Yoshavya, mebyon Elnaam, Ythma an Moabyas,

⁴⁷Eliel, Obed, ha Yaasiel an Mesobayas.