Read Kernewek 1 Kroniklys 12 Bible Online

1 Kroniklys 12 - Kernewek bible

1 Kroniklys 12

¹An re ma yw an wer a dheuth dhe Davydh yn Siklag, pan veu stroethys drefenn Sowl mab Kish; kasoryon alloesek ens i, gweresoryon yn batel.

²Gwaregoryon ens, hag i a ylli tenna sethow ha tewlel meyn gans an leuv dhyghow po an leuv gledh; i o Benyaminysi, breder Sowl.

³An penn o Ahiezer, ha Yoash y vroder, mebyon Shemaa an Gibeathyas; Yeziel ha Pelet mebyon Azmaveth, Beraka, Yehu an Anathothyas.

⁴Yshmaia an Gibeonyas, kasor galloesek yn mysk an deg warn ugens ha hembrenkyas a'n deg warn ugens; Yeremia, Yahaziel, Yohanan, Yozabad an Gederathyas,

⁵Eluzay, Yerimoth, Bealia, Shemaria, Shefatia an Harufyas;

⁶Elkana, Ysshia, Azarel, Yoezer ha Yashobeam an Koraghysi;

⁷Yoela ha Zebadia mebyon Yeroham a Gedor.

⁸Rann an Gadysi a gildennas dhe Davydh y'n dinas y'n gwylvos. I o kasoryon alloesek ha dyskys yn batel, konnyk gans skoes ha guw. Aga fas o kepar ha fas lewyon hag i o mar skav avel gavrewiges war an menydhyow.

⁹Ezer an penn, Obadia an nessa, Eliab an tressa,

¹⁰Mishmanna an peswora, Yeremia an pympes,

¹¹Attay an hweghves, Eliel an seythves,

¹²Yohanan an ethves, Elzabad an nawves,

¹³Yeremia an degves, Makbannay unnegves.

¹⁴An Gadysi ma o soedhogyon a'n lu, an lyha anedha o mar galloesek avel kans souder a'n eskar ha'n moyha galloesek o kehaval dhe vil.

¹⁵An re ma yw an wer a dreusis an Yordan y'n kynsa mis, pan esa ow fenna oll hy glannow, hag i a fesyas oll tus an nansow dhe'n howldrehevel ha dhe'n howlsedhes.

¹⁶Re a vebyon Benyamin ha Yuda a dheuth dhe'n dinas dhe Davydh.

¹⁷Davydh eth yn-mes dhe vetya gansa, hag yn-medh ev dhedha, ‘Mar teuvewgh dhymm yn spyrys kres dhe'm gweres, ow holonn a vydh onan genowgh; mes mar teuvewgh dhe'm trayta dhe'm eskerens kyn nag eus drogober y'm diwla, re'gas gwello Duw agan tasow ha'gas keredhi.’

¹⁸Ena an Spyrys a dheuth war Amasay, penn an deg warn ugens, hag ev a leveris, ‘Ni yw dhis, A Davydh, ni yw genes, A vab Yesse! Kres, kres dhis, ha kres dhe'th weresoryon, rag dha Dhuw a'th weres.’ Ena Davydh a's degemmeras ha'ga gul pennow an bagasow.

¹⁹Re a loeth Manasse a gilfias dhe Davydh pan dheuth ev gans an Filistysi rag omladh erbynn Sowl. (Ny's gweresas ev, rag gwahalyethow an Filistysi a omgusulyas ha'y dhannvon dhe-ves ow leverel, ‘Orth peryll dh'agan penn vydh mar kilfi dh'y vester Sowl.’)

²⁰Pan eth Davydh dhe Siklag an re ma a Manasse a gilfias dhodho: Adnagh, Yozabad, Yediael, Mighal, Yozabad arall, Elihu, ha Sillethay, pennow a vilyow yn Manasse.

²¹I a weresas Davydh erbynn bagasow a ravnoryon; rag i oll o kasoryon alloesek ha kaslewydhyon y'n lu.

²²Ytho dydh wosa dydh yth esa gwer ow tos dhe Davydh dh'y weres, bys pan esa lu bras, avel lu Duw.

²³An re ma yw niverow an wer parys rag batel a dheuth dhe Davydh yn Hebron rag treylya myghterneth Sowl dhodho, war-lergh ger an ARLOEDH.

²⁴Mebyon Yuda ow toen skoes ha guw o hwegh mil parys rag batel.

²⁵A'n Simeonysi, kasoryon parys rag bresel, seyth mil unn kans.

²⁶A'n Levysi, peswar mil ha hwegh kans.

²⁷Yehoyada o hembrenkyas an Aronysi ha ganso tri mil ha seyth kans;

²⁸Sadok, gour yowynk, kasor galloesek yn kolonnekter, dew gapten warn ugens a ji y das.

²⁹A'n Benyaminysi, breder Sowl, tri mil, may pessa an rann vrassa anedha lel dhe ji Sowl.

³⁰A'n Efraymysi, ugens mil hag eth kans, kasoryon gerys-da yn chi aga thasow.

³¹A'n hanter-loeth Manasse, etek mil, re bia henwys dhe dhos ha dhe wul Davydh myghtern.

³²A vebyon Yssakar, gwer a gonvedhi an termynyow ha godhvos an pyth a dhalvia dhe Ysrael y wul, dew kans penn, hag oll aga breder yn-dann aga arghadow.

³³A Zebulun, hanter kans mil souder prevys, parys rag batel gans oll arvow bresel, dhe weres a leun golonn.

³⁴A Naftali, unn vil gapten ha gansa seytek mil warn ugens souder ervys gans skoes ha guw.

³⁵A'n Danysi, eth warn ugens mil hwegh kans, parys rag vatel.

³⁶A Asher, dew-ugens mil souder prevys, parys rag batel.

³⁷A'n Rewbenysi ha'n Gadysi ha'n hanter-loeth Manasse war du arall an Yordan, unn kans ha dew-ugens mil ervys gans pub eghenn arvow bresel.

³⁸Oll an gasoryon ma, arayys rag batel, a dheuth dhe Hebron a leun golonn dhe wul Davydh myghtern war oll Ysrael; keffrys oll remenant Ysrael o unnver dhe wul Davydh myghtern.

³⁹I a spenas tri dydh ena gans Davydh, ow tybri hag owth eva, rag aga breder re dharbarsa dhedha.

⁴⁰Ynwedh aga hentrevogyon mar bell dhe-ves avel Yssakar, Zebulun ha Naftali a dhros boes war asenes, war gowrvergh, war vulyon ha war oghen. Yth esa palster a vleus, tesennow a figys, tesennow a rappys ha gwin hag oyl, oghen ha deves, rag yth esa lowena yn Ysrael.