Read Kernewek 1 Kroniklys 13 Bible Online

1 Kroniklys 13 - Kernewek bible

1 Kroniklys 13

¹Myghtern Davydh a omgusulyas gans kaptenyon an milyow ha'n kansow, gans oll an soedhogyon.

²Davydh a leveris dhe oll kuntelles Ysrael, ‘Mar hevel da dhywgh, ha mars yw bodh an ARLOEDH agan Duw, dannvenyn ni kannasow dh'agan breder trigys yn pow Ysrael oll, hag ynwedh dhe'n oferysi ha'n Levysi y'n sitys a's teves peurvaow, may teffons war-barth dhyn.

³Ena dren ni argh agan Duw dhyn arta; rag ny hwilsyn kusul dhiworti yn dydhyow Sowl.’

⁴Oll an kuntelles a assentyas dhe wul yndella, rag an dra o ewn y'n golok oll an bobel.

⁵Ytho Davydh a guntellas oll Ysrael dhiworth Shihor yn Ejyp bys Lebo-hamath, rag dri argh Duw dhiworth Kiryath-yearim.

⁶Davydh hag oll Ysrael eth yn-bann dhe Baala, henn yw, dhe Kiryath-yearim yn tiredh Yuda, dhe dhri yn-bann alena argh Duw, yw henwys re hanow an ARLOEDH neb a esedh war an cherubim.

⁷I a worras argh Duw war gert nowydh, ha'y dri dhiworth chi Abinadab, hag yth esa Uzza hag Ahio ow ledya an kert.

⁸Davydh hag oll Ysrael a lowenhas dherag Duw gans oll aga nerth, gans kanow, ha sowtris, telynnow, tabourigow, symbalys ha hirgern.

⁹Pan dheuthons dhe leur-drushya Kidon, Uzza a ystynnas y leuv dhe dhalghenna an argh, rag an oghen dh'y shakya.

¹⁰Sorr an ARLOEDH a dhewis erbynn Uzza, hag ev a'n weskis dhe'n dor rag ev dhe worra y leuv war an argh; hag ev a verwis ena a-rag Duw.

¹¹Davydh a veu serrys drefenn an ARLOEDH dhe dardha yn-mes erbynn Uzza; hag ev a elwis an tyller na Peres-uzza, dell yw bys y'n jydh hedhyw.

¹²Davydh a borthas own a Dhuw y'n jydh na ha leverel, ‘Fatell allav dri argh Duw tre dhymm?’

¹³Ytho ny gemmeras Davydh an argh ganso a-ji dhe sita Davydh, mes ev a's dug a-denewen dhe ji Obed-edom an Gittyas.

¹⁴Hag yth esa argh Duw trigys gans mayni Obed-edom yn y ji tri mis; ha'n ARLOEDH a vennigas teylu Obed-edom ha pup-tra esa dhodho.