Read Kernewek 1 Kroniklys 16 Bible Online

1 Kroniklys 16 - Kernewek bible

1 Kroniklys 16

¹I a dhros argh Duw, ha'y settya a-ji dhe'n tylda re dhrehavsa Davydh rygdhi; hag i a offrynnas offrynnow leskys hag offrynnow kres dherag Duw.

²Wosa Davydh dhe worfenna offrynna an offrynnow leskys ha'n offrynnow kres, ev a vennigas an bobel yn hanow an ARLOEDH;

³hag ev a lesrannas dhe oll Ysrael, dhe bub gour ha benyn, torth-vara, rann a gig ha tesenn-rappys.

⁴Ev a apoyntyas re a'n Levysi dhe venystra a-rag argh an ARLOEDH, dhe govhe, dhe rassa ha dhe wormel an ARLOEDH, Duw Ysrael.

⁵Asaf o an ledyer, ha nessa dhodho Zekaria; ena Yeiel, Shemiramoth, Yehiel, Mattithia, Eliab, Benaya, Obed-edom, ha Yeiel, gans sowtris ha gans telynnow; Asaf a sonas an symbalys,

⁶ha Benaya ha Yaaziel an oferysi a hwythas hirgern heb hedhi a-rag argh kevambos Duw.

⁷Y'n jydh na Davydh a ordenas rag an kynsa gweyth grasyans dhe vos kenys dhe'n ARLOEDH gans Asaf ha'y vreder.

⁸Grassiwgh dhe'n ARLOEDH, gelwewgh war y hanow, derivewgh y wriansow yn mysk an poblow.

⁹Kenewgh dhodho, kenewgh gormola dhodho, kewsiwgh a'y varthusyon oll.

¹⁰Bostyewgh yn y hanow sans; lowenhes kolonn an re a hwila an ARLOEDH.

¹¹Hwilewgh an ARLOEDH ha'y nerth, hwilewgh y fas pup-prys.

¹²Perthewgh kov a'y varthusyon re wrug, y anethow ha breusow y anow.

¹³A has Ysrael y was, hwi vebyon Yakob, y bobel dewisys.

¹⁴Ev yw an ARLOEDH agan Duw; yma y vreusow yn oll an nor.

¹⁵Perthewgh kov a'y gevambos bynitha, an ger a worhemmynnis dhe vil henedh,

¹⁶an kevambos a wrug gans Abraham, ha'n ti a dos dhe Ysak;

¹⁷ev a'n ros dhe Yakob avel ordenans, ha dhe Ysrael avel kevambos bynitha,

¹⁸ow leverel, ‘Dhiso jy y rov pow Kanan avel kevrenn dha ertach.’

¹⁹Pan ens i hwath boghes aga niver, pur voghes, hag alyons y'n tir,

²⁰ha pan ethons a unn genedhel dhe genedhel arall, a unn wlaskor dhe bobel arall,

²¹ny asas ev denvyth dhe wul kamm dhedha; yn tevri ev a geredhis myghternedh ragdha,

²²ow leverel, ‘Na dochyewgh an re untys genev, ha na bystigewgh ow frofoesi.’

²³Kenewgh dhe'n ARLOEDH, oll an nor. Derivewgh y selwyans a dhydh dhe dhydh.

²⁴Derivewgh y wolewder yn mysk an kenedhlow, y wriansow marthys yn mysk oll an poblow.

²⁵Rag meur yw anARLOEDH, ha pur wiw yw y wormel; res yw perthi own anodho dres oll duwow.

²⁶Rag oll duwow an bobel yw idolys, mes an ARLOEDH a wrug an nevow.

²⁷Yma enor ha meuredh a-dheragdho; yma nerth ha lowena yn y sentri.

²⁸Rewgh dhe'n ARLOEDH, hwi deyluyow a'n poblow, rewgh dhe'n ARLOEDH gordhyans ha nerth.

²⁹Rewgh dhe'n ARLOEDH an gordhyans a dhegoedh dh'y hanow; drewgh offrynn, ha dewgh a-dheragdho. Gordhyewgh an ARLOEDH yn tekter sansoleth;

³⁰kren a-dheragdho, oll an norvys; an bys ynwedh a vydh fast, nevra ny vydh gwayys.

³¹Bedhes an nevow heudhik ha lowenhes an norvys, ha leverens yn mysk an kenedhlow, ‘An ARLOEDH a reyn!’

³²Tarennes an mor, ha myns eus ynno, lowenhes an gwel, ha pup-tra eus ynno.

³³Ena gwydh an koes a gan gans lowena a-rag an ARLOEDH, rag ev a dheu dhe vreusi an norvys.

³⁴Grassiwgh dhe'n ARLOEDH, rag da yw, rag y dregeredh a dhur bys vykken.

³⁵Leverewgh: ‘Salw ni, A Dhuw agan selwyans, ha kuntell ni war-barth ha deliver ni yn-mes a'n kenedhlow, may hwodhven gras dhe'th hanow sans, ha bostya y'th wormola.

³⁶Bennigys re bo an ARLOEDH, Duw Ysrael, trank heb worfenn.’ Hag oll an bobel a leveris, ‘Amen’ ha gormel an ARLOEDH.

³⁷Davydh a asas Asaf ha'y vreder ena a-rag argh kevambos an ARLOEDH dhe venystra heb hedhi a-rag an argh, herwydh edhomm pub dydh.

³⁸Ev a asas Obed-edom mab Yeduthun ha Hosa avel porthoryon. Obed-edom gans y vreder o eth ha tri-ugens.

³⁹Ev a asas Sadok an oferyas ha'y vreder an oferysi a-rag tabernakel an ARLOEDH y'n tyller ughel yn Gibeon,

⁴⁰dhe offra offrynnow leskys dhe'n ARLOEDH war an alter a offrynn leskys heb hedhi myttin ha gorthugher, war-lergh pup-tra yw skrifys yn lagha an ARLOEDH a erghis ev dhe Ysrael.

⁴¹Gansa yth esa Heman ha Yeduthun ha remenant an re a veu dewisys ha henwys yn tiblans dhe rassa dhe'n ARLOEDH, rag y dregeredh dhe dhur bys vykken.

⁴²Heman, ha Yeduthun a'n jevo hirgern ha symbalys rag an menestrouthi ha daffar rag kanow sans. Ha mebyon Yeduthun o desedhys orth an porth.

⁴³Ena oll an bobel a dhibarthas peub dh'y ji, ha Davydh eth tre dhe salusi y vayni.