Read Kernewek 1 Kroniklys 20 Bible Online

1 Kroniklys 20 - Kernewek bible

1 Kroniklys 20

¹Orth treylyans an vlydhen, an termyn mayth a myghternedh yn-mes dhe vatalyas, Yoab a ledyas an lu yn-mes, ha gwastya tir an Ammonysi ha dos hag omsettya a-dro dhe Rabba. Mes myghtern Davydh a wortas yn Yerusalem. Yoab a weskis Rabba ha'y domhwel.

²Davydh a gemmeras kurun aga duw Milkom dhiworth y benn ha kavoes hi dhe boesa talent a owr, hag yth esa ynni men drudh; ha hi a veu gorrys war benn Davydh. Ynwedh ev a dhros myns pur vras a breydh yn-mes a'n sita, myns pur vras.

³Ev a dhros yn-mes an bobel esa ynni, ha'ga settya dhe oberi gans heskennow ha pigellow a horn ha boelyow; yndella Davydh a wrug dhe oll sitys an Ammonysi. Ena Davydh hag oll an bobel a dhehwelis dhe Yerusalem.

⁴Wosa hemma yth esa a bresel gans an Filistysi yn Gezer. Ena Sibbekay an Hushathyas a ladhas Sippay, onan a vebyon an Refaim, ha'n Filistysi a veu fethys.

⁵Yth esa bresel arta gans an Filistysi hag Elhanan mab Yair a ladhas Lahmi broder Goliath an Gittyas, mayth o sheft y wuw o kepar ha gwelenn gwiader.

⁶Hag yth esa batel arall yn Gath mayth esa gour, bras y ughelder, neb a'n jevo hwegh bys war bub leuv ha hwegh bys-troes war bub troes, peswar warn ugens yn niver hag ev ynwedh a veu diyskynnys dhiworth an Refaim.

⁷Pan dhefias Ysrael, Yonathan mab Shimea, broder Davydh, a'n ladhas.

⁸An re ma a veu diyskynnys dhiworth an Refaim yn Gath; hag i a goedhas dre leuv Davydh, ha dre leuv y wesyon.