Read Kernewek 1 Kroniklys 22 Bible Online

1 Kroniklys 22 - Kernewek bible

1 Kroniklys 22

¹Ena Davydh a leveris, ‘Hemma a vydh chi an ARLOEDH Duw ha hemma a vydh alter an offrynn leskys rag Ysrael.’

²Davydh a erghis dhe'n alyons esa trigys yn pow Ysrael bos kuntellys war-barth, hag ev a settyas re anedha dhe vos treghoryon men dhe bareusi meyn rag drehevel chi Duw.

³Ev a brovias kals horn rag an kentrow rag darasow an yetow ha rag an bynsow, keffrys ha kals brons re vras dhe boesa,

⁴ynwedh prennyer keder na allsons bos niverys, rag tus Sidonysi ha Tyr a dhros shour a geder dhe Davydh.

⁵Davydh a leveris, ‘Solomon ow mab yw yowynk ha heb prevyans, ha'n chi a vydh drehevys rag an ARLOEDH a dal bos bras-oberys, gerys-da ha glorifiys der oll powyow; rakhenna my a wra darbar dhodho.’ Ytho Davydh a dharbaris yn hel kyns y vernans.

⁶Ena ev a elwis Solomon y vab hag erghi dhodho drehevel chi rag an ARLOEDH, Duw Ysrael.

⁷Davydh a leveris dhe Solomon, ‘Ow mab, yth esa y'm brys drehevel chi rag hanow an ARLOEDH, ow Duw.

⁸Mes ger an ARLOEDH a dheuth dhymm, ow leverel, “Ty re skoellyas meur a woes ha goestla breselyow bras; ny dhrehevydh chi dhe'm hanow, drefenn ty dhe skoellya kemmys goes a-ragov war an dor.

⁹Awotta, mab a vydh genys dhis; ev a vydh gour a bowes ha my a re dhodho powes dhiworth oll y eskerens a-dhedro. Y hanow a vydh Solomon, ha my a re kres ha diogeledh dhe Ysrael yn y dhydhyow.

¹⁰Ev a dhrehav chi rag ow hanow; ev a vydh mab dhymm ha my a vydh tas dhodho; ha my a fast tron y vyghterneth war Ysrael bys vykken.”

¹¹Lemmyn, ow mab, re bo an ARLOEDH genes, may siwenni ha drehevel chi an ARLOEDH dha Dhuw dell gewsis ev ahanas.

¹²Re wrontyo an ARLOEDH dhis furneth ha konvedhes may hwitthi lagha an ARLOEDH dha Dhuw pan re ev dhis charj war Ysrael.

¹³Ena ty a siwen mar kwaytydh gwitha an ordenansow ha'n breusow a erghis an ARLOEDH dhe Moyses rag Ysrael. Bydh krev, hag a golonn dha. Na borth own, na vydh digolonnek.

¹⁴Otta, dre ow ober kales, my re brovias rag chi an ARLOEDH kans mil dalent a owr, milvil dalent a arghans, ha myns a vrons ha horn na yllir aga foesa; prenn ha men ynwedh my re brovias. Res vydh dhis keworra dhe'n re ma.

¹⁵Ty a'th eus meur a oberwesyon: treghoryon men, seri men, seri prenn ha kreftoryon, skentel yn pub sort a greft

¹⁶yn owr, arghans, brons ha horn, na yllir aga nivera. Sav yn-bann ha dalleth an ober ha re bo an ARLOEDH genes.’

¹⁷Davydh ynwedh a erghis dhe oll hembrenkysi Ysrael gweres Solomon y vab, ow leverel,

¹⁸‘A nyns usi an ARLOEDH agas Duw genowgh? Hag ev re ros powes dhywgh a bub tenewen? Rag ev re dhelivras trigoryon an pow yn ow leuv, hag yma'n pow fethys a-rag an ARLOEDH ha'y bobel.

¹⁹Lemmyn settyewgh agas kolonn ha'gas enev dhe hwilas an ARLOEDH agas Duw. Sevewgh yn-bann ha drehevewgh sentri an ARLOEDH Duw, may fo dres argh kevambos an ARLOEDH ha lestri sans Duw a-berth y'n chi drehevys rag hanow an ARLOEDH.’