Read Kernewek 1 Kroniklys 5 Bible Online

1 Kroniklys 5 - Kernewek bible

1 Kroniklys 5

¹Henedh Rewben, kynsa-genys Ysrael. (Ev o an kynsa-genys mes drefenn ev dhe wrowedha gans iswreg y das, y wir genesik o res dhe vebyon Yosep mab Ysrael; ytho nyns yw kovskrifys y'n aghskrif avel an kynsa genys.

²Yuda o krev yn mysk y vroder ha rewler a dheuth anodho, mes yth esa dhe Yosep an gwir genesik.)

³Mebyon Rewben, kynsa-genys Ysrael: Hanok, Pallu, Hesron, ha Karmi.

⁴Mebyon Yoel: Shemaia y vab, Gog y vab, Shimei, y vab,

⁵Mika, y vab, Reaya, y vab, Baal y vab,

⁶Beera y vab, neb a veu degys dhe-ves yn divroedh gans Tiglath-pileser myghtern Assyria; ev o penntern an Rewbenysi.

⁷Y vreder war-lergh aga theyluyow, pan veu reknys aghskrif aga henedhow: Yeiel an penntern, Zekaria,

⁸ha Bela mab Azaz, mab Shema, mab Yoel. Yth esens trigys yn Aroer, bys Nebo ha Baal-meon.

⁹Troha'n est yth esens trigys ynwedh bys amal an difeyth a ystynn dhiworth an avon Ewfrates drefenn aga chatel dhe gressya yn pow Gilead.

¹⁰Yn dydhyow Sowl i a vatalyas orth an Hagrysi, a goedhas der aga leuv; hag yth esens trigys yn aga thyldow dres oll an tiredh a'n est dhe Gilead.

¹¹Yth esa trigys mebyon Gad a-dal dhedha yn pow Bashan bys yn Saleka:

¹²Yoel an penntern, Shafam an nessa, Yaanay, ha Shafat yn Bashan.

¹³Aga breder herwydh chi aga thasow: Mighal, Meshullam, Sheba, Yoray, Yakan, Zia, hag Eber, seyth.

¹⁴An re ma o mebyon Abihayl mab Huri mab Yaroagh mab Gilead mab Mighal mab Yeshishay mab Yaghdo mab Buz;

¹⁵Ahi mab Abdiel mab Guni o penntern chi aga thasow;

¹⁶yth esens trigys yn Gilead, hag yn Bashan, hag yn hy threvow hag yn oll peurvaow Sharon bys yn aga finwethow.

¹⁷Oll an re ma a veu omrolys der aghskrifow yn dydhyow Yotham myghtern Yuda hag yn dydhyow Yeroboam myghtern Ysrael.

¹⁸Mebyon Rewben ha Gad, ha'n hanter-loeth Manasse: aga hasoryon ervys gans skoes ha kledha, aga gwaregoryon ha'n soudoryon dyskys yn gwerryans, peswar mil ha dew-ugens, seyth kans ha tri-ugens, o parys rag batel.

¹⁹I a vatalyas orth an Hagrysi, Yetur, Nafish ha Nodab;

²⁰I a dhegemmeras gweres er aga fynn, rag i a grias dhe Dhuw y'n vatel, ha'n Hagrysi hag oll esa gansa a veu res yn aga leuv, hag ev a wrontyas aga fysadow drefenn i dhe drestya ynno.

²¹I a gemmeras aga chatel, hanter-kans mil kowrvargh, dew kans ha hanter-kans mil dhavas, ha dew vil asen, ha kans mil dhen yn keth.

²²Lies a goedhas ledhys drefenn an vresel dhe vos a Dhuw. Hag yth esens trigys yn aga tiredh bys an divroedh.

²³Yth esa mebyon hanter-loeth Manasse trigys y'n tir dhiworth Bashan bys Baal-hermon, Senir ha menydh Hermon; yth ens i pur niverus.

²⁴An re ma o pennow chi aga thasow: Efer, Yshi, Eliel, Azriel, Yeremia, Hodavya ha Yaghdiel, kasoryon alloesek, gwer a vri, pennow yn chi aga thasow.

²⁵Byttegyns i a gammdremenas erbynn Duw aga thasow ha horya war-lergh duwow poblow an tiredh, re bia distruys gans Duw a-dheragdha.

²⁶Ytho Duw Ysrael a wrug dhe spyrys Pul myghtern Assyria difuna, spyrys Tiglath-pileser myghtern Assyria, ha ev a dhug dhe-ves an Rewbenysi, an Gadysi, ha'n hanter-loeth Manasse, ha'ga dri dhe Halagh, Habor, Hara, ha dhe'n avon Gozan, bys y'n jydh ma.