Read Kernewek 2 Kroniklys 11 Bible Online

2 Kroniklys 11 - Kernewek bible

2 Kroniklys 11

¹Pan dheuth Rehoboam dhe Yerusalem, ev a guntellas chi Yuda ha Benyamin, kans mil ha peswar-ugens a gasoryon dhewisys, rag omladh erbynn Ysrael, rag daskorr an wlaskor dhe Rehoboam.

²Mes ger an ARLOEDH a dheuth dhe Shemaia gour Duw:

³Lavar dhe Rehoboam mab Solomon myghtern Yuda, ha dhe oll an Ysraelysi yn Yuda ha Benyamin,

⁴‘Yndellma y lever an ARLOEDH: Nyns ewgh yn-bann na batalyas orth dha vreder. Dehweles pub onan dhe dre, rag yma an dra ma ahanav vy.’ Yndella i a woslowas orth ger an ARLOEDH hag a dreylyas dhiworth an eskerdh erbynn Yeroboam.

⁵Yth esa Rehoboam trigys yn Yerusalem, hag ev a dhrehevis dinasow kerys rag defens yn Yuda.

⁶Ev a geras Bethlehem, Etam, Tekoa,

⁷Beth-sur, Soko, Adullam,

⁸Gath, Maresha, Zif,

⁹Adoraym, Lakish Azeka,

¹⁰Sora, Ayyalon, ha Hebron, sitys kerys usi yn Yuda hag yn Benyamin.

¹¹Ev a wrug an keryow krev, hag a worras kaslewydhyon ynna, ha provians a voes, a oyl hag a win.

¹²Ev a worras skoesow ha guwow yn oll an sitys, hag a's gwrug fest krev. Yndella ev a synsis Yuda ha Benyamin.

¹³An oferysi ha'n Levysi der Ysrael oll a dheuth dhodho dhiworth oll aga thiryow.

¹⁴An Levysi re assa aga feurvaow ha'ga ferghennogeth ha re dhothya dhe Yuda ha dhe Yerusalem, drefenn Yeroboam ha'y vebyon re's lettsa a servya avel oferysi an ARLOEDH,

¹⁵ha re apoyntsa y oferysi y honan rag an tylleryow ughel, ha rag an jevanow-gaver, ha rag an leughi re wrussa ev.

¹⁶An re dhiworth pub loeth a Ysrael, re settsa aga holonn dhe hwilas an ARLOEDH, Duw Ysrael, a dheuth war aga lergh dhe Yerusalem, rag sakrifia dhe'n ARLOEDH, Duw aga thasow.

¹⁷I a grevhas gwlaskor Yuda hag i a skoedhyas Rehoboam mab Solomon teyr blydhen, ow kerdhes yn fordh Davydh ha Solomon y'n teyr blydhen na.

¹⁸Rehoboam a gemmeras avel y wreg Mahalath myrgh Yerimoth mab Davydh hag a Abihayl myrgh Eliab mab Yesse.

¹⁹Hi a dhineythis ragdho mebyon: Yeush, Shemaria, ha Zaham,

²⁰War hi lergh ev a gemmeras Maaka myrgh Absalom, ha hi a dhineythis ragdho Abia, Attay, Ziza, ha Shelomith.

²¹Rehoboam a gara Maaka myrgh Absalom moy es dell gara ev y wragedh erell ha'y iswragedh. Ev a'n jevo etek gwreg ha tri-ugens iswreg, hag ev a dhineythis eth mab warn ugens ha tri-ugens myrgh.

²²Rehoboam a apoyntyas Abia mab Maaka avel penn pennsevik yn mysk y vreder, rag y wul myghtern ar lergh.

²³Ev a dhyghtyas yn fur, hag a lesas re a'y vebyon der oll ranndiryow Yuda ha Benyamin, yn oll an sitys kerys. Ev a ros dhedha provians meur, ha kavoes lies gwreg ragdha.