Read Kernewek 2 Kroniklys 13 Bible Online

2 Kroniklys 13 - Kernewek bible

2 Kroniklys 13

¹Y'n etegves blydhen a vyghtern Yeroboam, Abia a dhallathas reynya war Yuda

²Ev a reynyas teyr blydhen yn Yerusalem. Hanow y vamm o Mikaya myrgh Uriel a Gibea. Yth esa bresel ynter Abia ha Yeroboam.

³Abia a dhallathas an batel gans lu a gasoryon alloesek, peswar kans mil wour dewisys; ha Yeroboam a arayas y linenn a vatel er y bynn gans eth kans mil gasor alloesek.

⁴Abia a sevis war venydh Semaraym usi yn bro venydhyek Efraym, hag a leveris, ‘Goslowewgh orthiv, Yeroboam hag oll Ysrael!

⁵A ny wodhowgh hwi y ros an ARLOEDH, Duw Ysrael, an myghternses war Ysrael dhe Davydh ha'y vebyon bys vykken dre gevambos a hoelan?

⁶Byttegyns Yeroboam mab Nebat, gwas Solomon mab Davydh a sevis yn-bann hag a rebellyas erbynn y arloedh;

⁷ha bagas a goeg vilens a omguntellas a-dro dhodho hag a dhefias Rehoboam mab Solomon, pan o Rehoboam yowynk ha heb prevyans, ha ny veu krev lowr dhe sevel orta.

⁸‘Lemmyn hwi a dyb y hyllowgh sevel orth gwlaskor an ARLOEDH yn leuv mebyon Davydh, drefenn agas bos gyllys ha bos routh vras ha bos genowgh hwi an leughi a owr a wrug Yeroboam dhe vos duwow ragowgh.

⁹A ny bellhasowgh oferysi an ARLOEDH, mebyon Aron, ha'n Levysi, ha gul oferysi ragowgh agas honan avel poblow a diryow erell? Piw pynag a dheffo dhe omsakra gans tarow yowynk po seyth hordh a yll dos ha bos oferyas a neppyth nag yw duw.

¹⁰Mes ni, an ARLOEDH yw agan Duw, ha ny'n gessyn. Ni a'gan beus oferysi a venyster dhe'n ARLOEDH, mebyon Aron, ha Levysi rag aga servya.

¹¹I a offrynn dhe'n ARLOEDH pub myttin ha pub gorthugher offrynnow leskys hag ynkys hweg, hag araya bara an wolok war an voes lan, hag i a enow an lugern war an kantolbrenn a owr pub gorthugher. Yndella ni a with charj an ARLOEDH agan Duw, mes hwi re'n gasas.

¹²Yma Duw genen orth agan penn, ha'y oferysi a's teves aga hirgern rag seni an galow dhe'n vatel er agas pynn. A vebyon Ysrael, na vatelewgh orth an ARLOEDH, Duw agas tasow, rag ny yllowgh siweni.’

¹³Yeroboam a dhannvonas kontrewaytyans a-dro dhe dhos warnedha a-dhelergh; yndella yth esa y lu a-rag Yuda, hag yth esa an kontrewaytyans a-dryv dhedha.

¹⁴Pan dreylyas Yuda yth esa an vatel a-ragdha hag a-dryv dhedha. I a grias dhe'n ARLOEDH ha'n oferysi a hwythas an hirgern.

¹⁵Ena tus Yuda a grias garm an vatel. Pan armas gwer Yuda, Duw a fethas Yeroboam hag oll Ysrael a-rag Abia ha Yuda.

¹⁶Mebyon Ysrael a fias dhe'n fo a-rag Yuda, ha Duw a's ros yn aga diwleuv.

¹⁷Abia ha'y lu a's fethas gans ladhva veur; pymp kans mil wour dhewisys a Ysrael a goedhas ledhys.

¹⁸Yndella mebyon Ysrael o iselhes y'n termyn na, ha mebyon Yuda a dryghis, drefenn i dhe drestya y'n ARLOEDH, Duw aga thasow.

¹⁹Abia a helghyas Yeroboam, hag a gemmeras sitys dhiworto; Bethel ha'y threvow, Yeshana ha'y threvow, hag Efron ha'y threvow.

²⁰Ny dhaskavas Yeroboam y nell yn dydhyow Abia; an ARLOEDH a'n gweskis dhe'n dor hag ev a verwis.

²¹Mes Abia eth ha bos krev. Ev a gemmeras peswardhek gwreg, ha dineythi dew vab warn ugens ha hwetek myrgh.

²²Gweythresow erell Abia, y fara ha'y wriansow yw skrifys yn lyver-styryans[8] an profoes Iddo.