Read Kernewek 2 Kroniklys 16 Bible Online

2 Kroniklys 16 - Kernewek bible

2 Kroniklys 16

¹Y'n hweghves blydhen warn ugens a reyn Asa, Baasha myghtern Ysrael eth yn-bann erbynn Yuda, hag ev a dhrehevis Rama ma na alla nebonan mos yn-mes po dos a-ji dhe diredh Asa myghtern Yuda.

²Ena Asa a gemmeras an arghans ha'n owr yn-mes a dresorvaow chi an ARLOEDH, hag a's dannvonas dhe Ben-hadad myghtern Aram, trigys yn Damaskus, ow leverel,

³‘Bedhes kevambos yntra my ha ty, kepar dell veu ynter ow thas vy ha'th tas jy; Yth esov ow tannvon dhis arghans hag owr; ke, torr dha gevambos gans Baasha myghtern Ysrael, rag mayth omdenno a-dhiworthiv.’

⁴Ben-hadad a woslowas orth myghtern Asa, hag a dhannvonas kaslewydhyon y luyow erbynn sitys Ysrael. I a fethas Iyon, Dan, Abel-maym, hag oll sitys-gwithva Naftali.

⁵Pan glewas Baasha hemma, ev a astelas drehevel Rama, hag a asas an ober dhe hedhi.

⁶Ena myghtern Asa a dhros oll Yuda, hag i a dhug dhe-ves meyn ha prenn Rama, gansa may hwrug Baasha dastrehevel Geba ha Mispa.

⁷Y'n termyn na an gwelesydh Hanani a dheuth dhe Asa myghtern Yuda, hag a leveris dhodho, ‘Drefenn ty dhe fydhya yn myghtern Aram, a-der fydhya y'n ARLOEDH dha Dhuw, lu myghtern Aram re dhienkas dhiworthis.

⁸A nyns o an Ethiopysi ha'n Libysi lu bras, gans pur lies charett ha marghoglu? Byttegyns drefenn ty dhe fydhya y'n ARLOEDH, ev re's ros y'th leuv.

⁹Rag dewlagas an ARLOEDH a wander dres oll an norvys rag krevhe an re hag yth yw aga holonn lel dhodho. Ty re wrug tra foll y'n dra ma; rag alemma rag ty a' fydh breselyow.’

¹⁰Ena Asa a sorras orth an gwelesydh, hag a'n gorras y'n stokkys, yn prison, drefenn ev dhe berthi konnar orto rag hemma. Hag Asa a debeldhyghtyas re a'n bobel y'n keth termyn na.

¹¹Gweythresow Asa, a'n kynsa dhe'n diwettha, yw skrifys yn Lyver Myghternedh Yuda hag Ysrael.

¹²Y'n nownsegves blydhen warn ugens a'y reyn, Asa a borthas kleves yn y dhewdroes, ha gyllys sevur o; byttegyns kyn y'n jevo y gleves, ny hwilas an ARLOEDH, mes ev a hwilas gweres gans an vedhogyon.

¹³Ena Asa a goskas gans y dasow, ow merwel y'n kynsa blydhen ha dew-ugens a'y reyn.

¹⁴I a'n ynkleudhyas y'n bedh re droghas ev ragdho y honan yn sita Davydh. I a'n gorras war eler kudhys gans spisys kemmyskys yn konnyk; hag i a wrug tan bras yn y enor.