Read Kernewek 2 Kroniklys 17 Bible Online

2 Kroniklys 17 - Kernewek bible

2 Kroniklys 17

¹Y vab Yehoshafat a reynyas yn y le, hag a grevhas y savla erbynn Ysrael.

²Ev a worras kasoryon yn oll an sitys kerys a Yuda hag a worras savleow-gwithysi yn pow Yuda hag y'n sitys a Efraym re beu kemmerys gans y das Asa.

³Yth esa an ARLOEDH gans Yehoshafat drefenn ev dhe gerdhes yn fordhow y das kyns; ny hwilas an Baalim,

⁴mes ev a hwilas Duw y das hag a gerdhas yn y worhemmynnow, a-der fordhow Ysrael.

⁵Yndella an ARLOEDH a fastyas an wlaskor yn y leuv. Oll Yuda a dhros trubyt dhe Yehoshafat, hag ev a'n jevo rychys meur hag enor.

⁶Y golonn o len yn fordhow an ARLOEDH; ha dres henna ev a dhileas an tylleryow ughel ha'n Asherim dhiworth Yuda.

⁷Yn tressa blydhen y reyn ev a dhannvonas y soedhogyon, Ben-hayl, Obadia, Zekaria, Nethanel, ha Mikaya, dhe dhyski yn sitys Yuda.

⁸Gansa yth esa an Levysi, Shemaia, Nethania, Zebadia, Asahel, Shemiramoth, Yehonathan, Adoniya, Tobiya, ha Tob-adoniya, ha gansa an oferysi Elishama ha Yehoram.

⁹I a dhyski yn Yuda ha gansa lyver lagha an ARLOEDH; i e oll a-derdro der oll sitys Yuda ow tyski yn mysk an bobel.

¹⁰Own an ARLOEDH a goedhas war oll gwlaskordhow an tiryow yn kyrghynn Yuda, ha ny vreselsons erbynn Yehoshafat

¹¹Re a'n Filistysi a dhros trubyt dhe Yehoshafat, ha shour a arghans; ha'n Arabyon ynwedh a dhros dhodho seyth kans hordh, ha seyth kans gaver gorow ha seyth mil.

¹²Gyllys o Yehoshafat moy ha moy krev. Ev a dhrehevis dinasow ha sitys-gwithva yn Yuda.

¹³Ev a wrug oberow meur yn sitys Yuda. Ev a'n jevo soudoryon, kasoryon alloesek, yn Yerusalem.

¹⁴Hemm o an rol anedha herwydh chi aga thasow: a Yuda kaslewydhyon milyow: Adna an kaslewydh, gans tri hans mil gasor galloesek,

¹⁵ha nessa dhodho Yehohanan an kaslewydh gans dew kans ha peswar ugens mil,

¹⁶ha nessa dhodho Amasia mab Zikri, bolonjedhek yn servis an ARLOEDH, gans dew kans mil gasor galloesek.

¹⁷A Benyamin: Elyada, kasor galloesek, gans dew kans mil ervys gans gwarak ha skoes,

¹⁸ha nessa dhodho Yehozabad gans kans mil ha peswar ugens parys rag bresel.

¹⁹Yth esa an re ma yn servis an myghtern, ha dres henna an re a worras an myghtern y'n sitys kerys der oll Yuda.