Read Kernewek 2 Kroniklys 18 Bible Online

2 Kroniklys 18 - Kernewek bible

2 Kroniklys 18

¹Yehoshafat a'n jevo rychys meur hag enor; ev a wrug kevambos a dhemmedhyans gans Ahab.

²Wosa nebes blydhynyow ev eth yn-nans dhe Ahab yn Samaria. Ahab a ladhas kals a dheves hag a oghen ragdho ha rag an bobel esa ganso, hag a ynnias warnodho mayth ella yn-bann erbynn Ramoth-gilead.

³Ahab myghtern Ysrael a leveris dhe Yehoshafat myghtern Yuda, ‘A vynnydh mos genev dhe Ramoth-gilead?’ Ev a wovynnas dhodho, ‘Yth esov genes, ow fobel yw dha bobel. Ni a vydh genes y'n vresel.’

⁴Mes Yehoshafat a leveris ynwedh dhe vyghtern Ysrael, ‘Hwila yn kynsa ger an ARLOEDH.’

⁵Ena myghtern Ysrael a guntellas an brofoesi war-barth, peswar kans anedha hag a leveris dhedha, ‘A wren ni mos dhe vatalyas orth Ramoth-gilead, po a skonyav a wul yndella?’ I a worthybis, ‘Ke yn-bann; rag Duw a's re yn leuv an myghtern.’

⁶Mes Yehoshafat a leveris, ‘A nyns eus omma neb profoes arall a'n ARLOEDH, may hwovynnyn anodho?’

⁷Myghtern Ysrael a leveris dhe Yehoshafat, ‘Yma hwath nebonan arall ganso may hyllyn govynn a'n ARLOEDH, Mikaya mab Imla, mes my a'n kas, rag nevra ny brofoes da yn ow hever, mes anfeusi heb ken.’ Yehoshafat a leveris, ‘Na leveres an myghtern tra a'n par na.’

⁸Ena myghtern Ysrael a elwis soedhek hag a leveris, ‘Doro dihwans Mikaya mab Imla.’

⁹Yth esa myghtern Ysrael ha myghtern Yehoshafat a'ga esedh war aga thronys, gwiskys yn aga goenyow, orth an leur-drushya ryb entrans yet Samaria; hag yth esa oll an profoesi ow profoesa a-ragdha.

¹⁰Sedekia mab Kenaana a wrug ragdho y honan kern a horn, hag ev a leveris, ‘Yndella y lever an ARLOEDH, Gans an re ma ty a wan Aram bys may fons diswrys.’

¹¹Yth esa oll an brofoesi ow profoesa an keth tra hag ow leverel, ‘Ke yn-bann dhe Ramoth-gilead ha trygh, an ARLOEDH a's re yn leuv an myghtern.’

¹²An gannas neb eth dhe elwel Mikaya a leveris dhodho, ‘Mir, geryow an brofoesi gans unn akord yw a-barth an myghtern, bedhes dha er dhejy avel ger onan anedha, ha kows dader.’

¹³Mes Mikaya a leveris, ‘Dell vew an ARLOEDH, pypynag a lavarro ow Duw, henna a lavarav.’

¹⁴Pan veu devedhys dhe'n myghtern, an myghtern a leveris dhodho, ‘A Mikaya, en ni dhe Ramoth-gilead rag batalyas, po nyns en?’ Ev a worthybis, ‘Ke yn-bann ha trygh; i a vydh gorrys y'th leuv.’

¹⁵Mes an myghtern a leveris dhodho, ‘Pygemmys prys y tegoedh dhymmo gul dhis ti na leverri travyth marnas an gwiryonedh yn hanow an ARLOEDH?’

¹⁶Ena Mikaya a leveris, ‘My a welas oll Ysrael skattrys war an menydhyow, avel deves heb bugel, ha'n ARLOEDH a leveris, “Ny's teves mester, es pub onan tre yn kres.” ’

¹⁷Myghtern Ysrael a leveris dhe Yehoshafat, ‘A ny leveris vy na brofoesa travyth da ragov, mes anfeusi heb ken.’

¹⁸Ena Mikaya a leveris, ‘Ytho klewewgh ger an ARLOEDH: My a welas an ARLOEDH esedhys war y dron gans oll lu nev a'ga sav a'n barth dhyghow dhodho hag a'n barth kledh dhodho.

¹⁹Ha'n ARLOEDH a leveris, “Piw a dhyn myghtern Ahab a Ysrael, rag mayth ello yn-bann, ha koedha yn Ramoth-gilead?” Ena onan a leveris unn dra hag onan a leveris ken tra,

²⁰bys pan dheuth spyrys yn-rag hag a sevis a-rag an ARLOEDH, ow leverel, “My a wra y dhynya.” Ha'n ARLOEDH a wovynnas orto, “Fatla?”

²¹Ev a worthybis, “Yth av yn-mes, ha my a vydh spyrys gowek yn ganow oll y brofoesi.” Ena an ARLOEDH a leveris, “Ty a'n dyn, ha ty a siwen; ke yn-rag ha'y wul.”

²²Yndella y hwelydh, an ARLOEDH re worras spyrys gowleveryas yn ganow an re ma, dha brofoesi; an ARLOEDH re worhemmynnis anfeusi ragos.’

²³Ena Sedekia mab Kenaana a dheuth dhe Mikaya, ha'y hwettyas war an vogh, hag a leveris, ‘Py fordh warnedha y tremenas spyrys an ARLOEDH dhiworthiv dhe gewsel dhis?’

²⁴Mikaya a worthybis, ‘Ty a'n goer y'n jydh mayth eth dhe omgudha a stevell dhe stevell.’

²⁵Ena myghtern Ysrael a erghis, ‘Kemmer Mikaya ha'y dhaskorr dhe Amon, governour an sita ha dhe Yoash mab an myghtern,

²⁶ha lavar, “Yndella a lever an myghtern: gorr an polat ma y'n prison, ha'y vaga orth boghes ewnrannow a vara ha dowr bys pan dhehwelliv yn kres.” ’

²⁷Mikaya a leveris, ‘Mar tehwelydh yn kres, ny gewsis an ARLOEDH dredhov.’ Hag y leveris, ‘Klewewgh, hwi boblow oll!’

²⁸Yndella myghtern Ysrael ha Yehoshafat myghtern Yuda eth yn-bann dhe Ramoth-gilead.

²⁹Myghtern Ysrael a leveris dhe Yehoshafat, ‘My a doellwisk ow honan ha mos dhe'n vatel, mes ty, omwisk y'th woenyow.’ Yndella myghtern Ysrael a doellwiskas y honan, hag yth ethons i dhe'n vatel.

³⁰Lemmyn myghtern Aram re worhemmynnsa dhe gaslewydhyon y jarettow, ‘Na omledhewgh orth byghan na bras, saw unnsel gans myghtern Ysrael.’

³¹Pan welas kaslewydhyon an jarettow Yehoshafat, i a leveris, ‘Myghtern Ysrael ywa.’ Yndella i a dreylyas dhe omladh orto; ha Yehoshafat a grias, ha'n ARLOEDH a'n gweresas. Duw a's tennas dhiworto,

³²rag pan welas kaslewydhyon an charettow nag o myghtern Ysrael, i a gildennas a'y helghya.

³³Mes neb gour a dennas y warak ha heb y wodhvos, ev a weskis myghtern Ysrael yntra platyow y arvwisk ha'n lurik. Ev a leveris dh'y jaretter, ‘Treyl a-dro, ha'm doen yn-mes a'n vatel, rag goliys ov.’

³⁴Gyllys o an vatel toemm y'n jydh na, hag yth esa myghtern Ysrael a-dal Aram, skoedhys yn-bann yn y jarett; yndella y feu bys y'n gorthugher, ena orth howlsedhes ev a verwis.