Read Kernewek 2 Kroniklys 20 Bible Online

2 Kroniklys 20 - Kernewek bible

2 Kroniklys 20

¹Wosa hemma an Moabysi, an Ammonysi, ha gansa re a'n Meunysi, a dheuth erbynn Yehoshafat rag batalyas.

²Kannasow a dheuth hag y lavarsons dhe Yehoshafat, ‘Yma routh vras ow tos er dha bynn dhiworth tu arall an Mor, dhiworth Edom; ymons seulabrys yn Hasason-tamar’ (honn yw En-gedi).

³Yehoshafat a berthi own; ev a erviras hwilas an ARLOEDH, hag ev a ordenas penys der oll Yuda.

⁴Yuda a omguntellas rag hwilas gweres gans an ARLOEDH; dhiworth oll sitys Yuda y teuthons rag hwilas an ARLOEDH.

⁵Yehoshafat a sevis yn kuntelles Yuda ha Yerusalem, yn chi an ARLOEDH, a-rag an klos nowydh,

⁶hag a leveris, ‘A ARLOEDH, Duw agan tasow, a nyns osta Duw y'n nev? A ny rewlydh war oll gwlaskordhow an kenedhlow? Yma y'th leuv galloes ha nerth, bys ma na yll nebonan sevel orthis.

⁷A ny fessys, agan Duw, trigoryon an tir ma a-rag dha bobel Ysrael, ha'y ri bys vykken dhe has Abraham dha goweth?

⁸I re drigas ynno, ha re dhrehevsons ragos sentri ynno rag dha hanow, ow leverel,

⁹Mar teu anfeusi warnan, an kledha, breus,[12] kleves, po divoetter, ni a sev a-rag an chi ma, hag a-ragos, rag yma dha hanow y'n chi ma, ha ni a gri dhis yn agan ahwer, ha ty a glew, ha sawya.

¹⁰Lemmyn, awotta mebyon Ammon, Moab, ha Menydh Seir! Ny essys dhe'n Ysraelysi dos yn aga tiredh pan dheuthons yn-mes a bow Ejyp; ytho i a dreylyas dhiworta heb aga diswul.

¹¹Mir fatell y'gan gobrons dre dhos dh'agan fesya yn-mes a'gan perghennogeth a resys dhyn dh'y erita.

¹²A agan Duw ni, a ny wredh breus warnedha? Rag ni yw dialloes erbynn an routh vras ma, re dheuth er agan pynn. Ny wodhon pyth dhe wul, mes yma agan dewlagas warnas.’

¹³Yth esa oll Yuda ow sevel a-rag an ARLOEDH, gans aga fleghesigow, aga gwragedh, ha'ga mebyon.

¹⁴Ena spyrys an ARLOEDH a dheuth war Yahaziel mab Zekaria mab Benaya mab Yeiel mab Mattania, Levyas a vebyon Asaf, yn kres an kuntelles.

¹⁵Ev a leveris, ‘Goslowewgh oll Yuda ha trigoryon Yerusalem, ha myghtern Yehoshafat: Yndellma y lever an ARLOEDH dhywgh: “Na vedhewgh ownek na digolonnek orth an routh vras ma; rag nyns yw an vatel dhywgh mes dhe'n ARLOEDH.

¹⁶A-vorow kewgh yn-nans er aga fynn; i a dheu yn-bann war leder Sis; hwi a's kyv orth penn an nans, a'n est dhe wylvos Yeruel.

¹⁷Nyns yw an vatel ragowgh hwi dhe omladh; kemmerewgh agas le, sevewgh fyrv ha gwelewgh trygh an ARLOEDH a'gas govis, A Yuda ha Yerusalem.” Na vedhewgh ownek na digolonnek; a-vorow kewgh dh'aga dyerbynna, ha'n ARLOEDH a vydh genowgh.’

¹⁸Ena Yehoshafat a blegyas ha'y fas dhe'n dor, hag oll Yuda ha trigoryon Yerusalem a goedhas dhe'n dor a-rag an ARLOEDH, ow kordhya an ARLOEDH.

¹⁹Ena re a'n Levysi dhiworth an Kohathysi ha'n Koraghysi, a sevis yn-bann rag gormel an ARLOEDH, ha Duw Ysrael, gans lev fest ughel.

²⁰I a sevis ternos myttin ha mos yn-mes dhe wylvos Tekoa; hag i ow mos yn-mes, Yehoshafat a sevis ha leverel, ‘Goslowewgh orthiv, A Yuda ha trigoryon Yerusalem! Trestyewgh y'n ARLOEDH agas Duw ha hwi a vydh fastys; trestewgh yn y brofoesi ha hwi a siwen.’

²¹Wosa omgusulya gans an bobel, ev a apoyntyas kanoryon dhe gana dhe'n ARLOEDH ha'y wormel rag splannder y sansoleth, hag i ow mos yn-mes a-rag an lu, ow kana, ‘Rewgh grasow dhe'n ARLOEDH, rag y dregeredh a dhur bys vykken.’

²²Pan dhallathsons kana ha gormel, an ARLOEDH a gontrewaytyas erbynn mebyon Ammon, Moab, ha menydh Seir, esens ow tos erbynn Yuda, hag i a veu fethys.

²³Rag mebyon Ammon ha Moab a omsettyas erbynn trigoryon menydh Seir, dh'aga diswul yn tien; ha wosa diswul trigoryon Seir, i eth yn-rag ow tistrui an eyl y gila.

²⁴Pan dheuth Yuda dhe'n pennoelva y'n gwylvos, i a viras war-tu ha'n routh; gyllys ens yn korfow a'ga growedh war an dor; ny dhienkas onan vytholl.

²⁵Pan dheuth Yehoshafat ha'y bobel dhe gemmeres an preydh, i a gavas chatel pals, shour a dhaffar, dillas, ha taklow drudh, hag i a's pyllas ragdha aga honan bys pan na's tevo degi moy. Tri dydh yth esens ow pylla an preydh, drefenn y balster.

²⁶Y'n peswora dydh yth omguntellsons yn nans Beraka, hag ena i a vennigas an ARLOEDH; rakhenna an tyller na re beu henwys nans Beraka bys y'n jydh ma.

²⁷Ena oll pobel Yuda ha Yerusalem a dhehwelis dhe Yerusalem, gans Yehoshafat orth aga fenn, gans lowender, rag an ARLOEDH re rosa dhedha lowena dres aga eskerens.

²⁸I a dheuth dhe Yerusalem, gans telynnow ha gans sowtris ha gans hirgern, dhe ji an ARLOEDH.

²⁹Own an ARLOEDH a dheuth war oll gwlaskordhow an tiryow pan glewsons an ARLOEDH dhe omladh erbynn eskerens Ysrael.

³⁰Gwlaskor Yehoshafat o kosel, rag y Dhuw a ros dhodho powes oll a-derdro.

³¹Yndella Yehoshafat a reynyas war Yuda. Ev a veu pymthek bloedh warn ugens pan dhallathas reynya; ev a reynyas pymp blydhen warn ugens yn Yerusalem. Hanow y vamm o Azuba myrgh Shilhi.

³²Ev a gerdhas yn fordh y das Asa ha ny dreylyas dhiworti, ow kul an pyth o ewn yn golok an ARLOEDH.

³³Byttegyns nyns o defendys dhe-ves an tylleryow ughel; ny wrussa an bobel hwath settya aga holonn war Duw aga thasow.

³⁴Gweythresow erell Yehoshafat, a'n kynsa dhe'n diwettha, yw skrifys yn istori Yehu mab Hanani, yw kovadhys yn Lyver Myghternedh Ysrael.

³⁵Wosa hemma Yehoshafat myghtern Yuda a junyas gans an tebelwrier Ahazia myghtern Ysrael.

³⁶Ev a junyas ganso ow trehevel gorholyon rag mos dhe Tarshish; i a dhrehevis an gorholyon yn Esyon-geber,

³⁷Ena Eliezer mab Dodavahu a Maresha a brofoesas orth Yehoshafat, ow leverel, ‘Drefenn ty dhe junya gans Ahazia, an ARLOEDH a dhiswra an pyth re wrussys.’ An gorholyon a veu shyndys ha ny allsons mos dhe Tarshish.