Read Kernewek 2 Kroniklys 23 Bible Online

2 Kroniklys 23 - Kernewek bible

2 Kroniklys 23

¹Mes y'n seythves blydhen Yehoyada a omgrevhas, hag a wrug kevambos gans kaptenyon an kansow, Azaria mab Yeroham, Yshmael mab Yehohanan, Azaria mab Obed, Maaseya mab Adaya ha Elishafat mab Zikri.

²I eth a-dro dre Yuda, hag a guntellas an Levysi dhiworth oll sitys Yuda, ha pennow teyluyow Ysrael, hag i a dheuth dhe Yerusalem.

³Ena an kuntelles dien a wrug kevambos gans an myghtern yn chi Duw. Yehoyada a leveris dhedha, ‘Ottomma mab an myghtern! Reynyes ev, par dell ambosas an ARLOEDH a-dro dhe vebyon Davydh.

⁴Hemm yw an pyth y koedh dhywgh y wul: unn tressa rann ahanowgh hwi oferysi ha Levysi, hag a dheu dh'aga dever y'n sabot, a vydh gwithysi an treudhow,

⁵unn tressa rann a vydh orth chi an myghtern, hag unn tressa rann orth Yet an Sel; hag oll an bobel a vydh yn klosyow chi an ARLOEDH.

⁶Na entres nagonan yn chi an ARLOEDH saw unnsel an oferysi ha'n Levysi usi ow menystra; i a's teves kummyas a entra, rag i yw sans, mes oll an tus erell a with charj an ARLOEDH.

⁷An Levysi a vydh o kyrghynna an myghtern, peub gans y arvow yn y leuv; ha myns a entro an chi a vydh ledhys. Bedhewgh gans an myghtern pan a ev yn-mes ha pan dheu ev a-ji.’

⁸An Levysi hag oll Yuda a wrug herwydh an pyth a worhemmynnis Yehoyada an oferyas; pubonan a gemmeras y wer, an re esa ow talleth aga dever y'n sabot ha'n re esa ow korfenna aga dever y'n sabot; rag ny asas Yehoyada an oferyas dhe rann vyth mos dhe-ves.

⁹Yehoyada an oferyas, a ros dhe gaptenyon an kansow an guwow ha'n skoesow ha'n boklers re bia dhe vyghtern Davydh, esens yn chi Duw;

¹⁰Ev a worras oll an bobel, pub huni gans y arv yn dorn, a-dro dhe'n myghtern dhiworth parth dhyghow dhe barth kledh an chi, ryb an alter ha'n chi.

¹¹Ena i a ledyas mab an myghtern yn-mes, hag a worras an gurun warnodho, hag i a ros dhodho an dustuni, ha'y wul myghtern. Yehoyada ha'y vebyon a'n untyas hag i a armas, ‘Re vewo an myghtern!’

¹²Pan glewas Athalia tros an bobel ow poenya hag ow kormel an myghtern, hi eth dhe'n bobel yn chi an ARLOEDH.

¹³Hi a viras, hag otta an myghtern ow sevel ryb y goloven y'n entrans, ha'n gaptenyon ha'n hirgernysi ryb an myghtern, hag oll pobel an tir ow lowenhe hag ow hwytha hirgern, ha'n ganoryon gans aga daffar menestrouthi ow ledya y'n solempnyans, Athalia a skwardyas hy dillas, hag a grias, ‘Trayson, trayson!’

¹⁴Yehoyada an oferyas a dhannvonas yn-mes kaptenyon an kansow o settys war an lu, ow leverel dhedha, ‘Doro hi yn-mes ynter an renkow; pypynag a's hol yw dhe vos ledhys gans an kledha.’ Rag an oferyas a leveris, ‘Na's ladh yn chi an ARLOEDH.’

¹⁵I a settyas dalghenn ynni; hi a dheuth dhe entrans Yet an Vergh yn chi an myghtern, hag ena i a's ladhas.

¹⁶Yehoyada a wrug kevambos yntredho y honan hag oll an bobel ha'n myghtern may fons pobel an ARLOEDH.

¹⁷Ena oll an bobel eth dhe ji Baal ha'y denna dhe'n dor; y alteryow ha'y imajys a dorrsons yn temmigow, hag i a ladhas Mattan, oferyas Baal, a-rag an alteryow.

¹⁸Yehoyada a ros an charj dhe worvires chi an ARLOEDH dhe'n oferysi ha'n levysi a apoyntyas Davydh yn chi an ARLOEDH dhe offrynna offrynnow leskys dhe'n ARLOEDH, par dell yw skrifys yn lagha Moyses, gans lowena ha gans kana, herwydh gorhemmynn Davydh.

¹⁹Ev a worras an gwithysi yetow chi an ARLOEDH rag na entro nagonan o avlan war neb kor'.

²⁰Ena ev a gemmeras kaptenyon an kanow, an ugheloryon, governours an bobel, hag oll pobel an tir, hag i a dhros an myghtern yn-nans dhiworth chi an ARLOEDH, ow keskerdhes der an Yet Wartha dhe ji an myghtern, ha gorra an myghtern war an tron ryel.

²¹Oll pobel an tir a lowenhas, ha'n sita o kosel wosa bos Athalia ledhys gans an kledha.