Read Kernewek 2 Kroniklys 24 Bible Online

2 Kroniklys 24 - Kernewek bible

2 Kroniklys 24

¹Yoash o seyth bloedh pan dhallathas reynya; ev a reynyas dew-ugens blydhen yn Yerusalem. Hanow y vamm o Sibia a Beer-sheba.

²Yoash a wrug an pyth o ewn yn golok an ARLOEDH oll dydhyow Yehoyada an oferyas.

³Yehoyada a gavas diw wreg ragdho, hag ev a dhineythis mebyon ha myrghes.

⁴Neb termyn a-wosa Yoash a erviras daswul chi an ARLOEDH.

⁵Ev a guntellas an oferysi ha'n Levysi hag y leveris dhedha, ‘Kewgh yn-mes dhe sitys Yuda ha kuntellewgh an toll vlydhenyek a Ysrael oll rag ewnhe chi agas Duw.’ Mes ny oberis an Levysi yn skav.

⁶Ytho an myghtern a elwis Yehoyada an penn, ha leverel dhodho, ‘Prag na wrussys dhe'n Levysi dri dhiworth Yuda ha dhiworth Yerusalem an doll a veu tollys gans Moyses, gwas an ARLOEDH, war bobel Ysrael rag tylda an dustuni?’

⁷Rag mebyon Athalia, an debelvenyn na, re entersa yn chi Duw gans nerth, ha devnydhya daffar sakrys chi an ARLOEDH rag an Baalim hogen.

⁸An myghtern a worhemmynnis, hag y feu gwrys kofer, ha gorrys tu a-ves dhe yet chi an ARLOEDH.

⁹Gwarnyans a veu gwrys dre Yuda oll ha dre Yerusalem may fe dres rag an ARLOEDH an doll a dollas Moyses gwas Duw, war Ysrael y'n gwylvos.

¹⁰Oll an ledyoryon hag oll an bobel a lowenhas hag a dhros aga tholl hag a's gorras y'n kofer bys pan o leun.

¹¹Peskweyth may feu an kofer dres dhe soedhogyon an myghtern gans an Levysi, pan welsons bos a-ji dhodho kals a arghans, ena skrifennyas an myghtern ha soedhek an arghoferyas a dho ha gwakhe an kofer ha'y gemmeres ha'y dhaskorr dh'y dyller. Yndella y hwrens dydh wosa dydh, hag i a guntellas arghans yn palster.

¹²An myghtern ha Yehoyada a'n ros dhe'n re a's tevo charj war ober chi an ARLOEDH, hag i a wobrenas seri men ha seri prenn rag nowydhhe chi an ARLOEDH, hag ynwedh oberoryon yn horn hag yn brons rag ewnhe chi an ARLOEDH.

¹³An re esa ow kul an ober a lavurya ha'n ewnheans eth yn-rag yn aga diwla; i a dhaswrug chi an ARLOEDH dh'y studh wiw hag a'n krevhas.

¹⁴Wosa i dhe worfenna, i a dhros remenant an arghans dhe'n myghtern ha Yehoyada ha ganso y feu gwrys lestri rag chi an ARLOEDH, lestri rag an servis ha rag an offrynnow leskys ha skudellow ha lestri a owr hag a arghans. I a offrynna offrynnow leskys yn chi an ARLOEDH heb hedhi oll dydhyow Yehoyada.

¹⁵Gyllys koth o Yehoyada ha leun a dhydhyow, hag ev a verwis. Y feu kans bloedh ha deg warn ugens pan verwis.

¹⁶I a'n ynkleudhyas yn sita Davydh gans an vyghternedh, drefenn ev dhe wul da yn Ysrael, hag a-barth Duw ha'y ji.

¹⁷Wosa mernans Yehoyada pennsevigyon Yuda a dheuth hag a omblegyas dhe'n myghtern. An myghtern a woslowas orta.

¹⁸I a forsakyas chi an ARLOEDH, Duw aga thasow, hag a servya an Asherim ha'n peulveyn. Konnar a dheuth war Yuda ha war Yerusalem drefenn aga hammweyth.

¹⁹Byttegyns ev a dhannvonas profoesi yn aga mysk rag aga dri arta dhe'n ARLOEDH; i a dhug dustuni orta, mes ny woslowsons.

²⁰Ena spyrys Duw a dheuth war Zekaria mab Yehoyada an oferyas; ev a sevis a-ugh an bobel hag a leveris dhedha, ‘Yndellma a lever Duw: Prag yth esowgh diwostydh dhe worhemmynnow an ARLOEDH? Ny siwenowgh. Drefenn hwi dhe forsakya an ARLOEDH ev re'gas forsakyas hwi.’

²¹Mes i a vrasas er y bynn, ha dre arghadow an myghtern i a'n labydhas gans meyn yn klos chi an ARLOEDH.

²²Ny borthas Yoash an myghtern kov a'n tregeredh diskwedhys dhodho gans Yehoyada y das, mes ev a ladhas y vab. Hag ev yn eneworres, ev a leveris, ‘Re wello an ARLOEDH ha diella!’

²³Dhe benn an vlydhen lu Aram a dheuth yn-bann erbynn Yoash. I a dheuth dhe Yuda ha dhe Yerusalem, hag a ladhas oll pennsevigyon an bobel, hag a dhannvonas oll aga freydh dhe vyghtern Damaskus.

²⁴Lu Aram re dhothya gans niver byghan a wer, mes an ARLOEDH a ros ynter aga diwla lu fest bras, drefenn i dhe asa an ARLOEDH, Duw aga thasow. Yndella i a gowlwrug breus war Yoash.

²⁵Pan gildennsons, i a asas Yoash fest goliys. Y wesyon a vrasas er y bynn rag goes mab[14] Yehoyada an oferyas, hag i a'n ladhas war y weli. Yndella y ferwis; hag i a'n ynkleudhyas yn sita Davydh, mes ny'n ynkleudhsons yn bedhow an myghternedh.

²⁶An re a vrasas er y bynn o Zabad mab Shimeath an Ammonyas, ha Yehozabad mab Shimrith an Moabyas,

²⁷Derivadow a-dro dh'y vebyon hag a-dro dhe'n lies profoesans er y bynn, hag a-dro dhe dhastrehevel chi Duw yw skrifys y'n lyver-styryans[15] war Lyver an Myghternedh. Hag Amasia y vab a reynyas yn y le.