Read Kernewek 2 Kroniklys 26 Bible Online

2 Kroniklys 26 - Kernewek bible

2 Kroniklys 26

¹Ena oll pobel Yuda a gemmeras Uzzia, o hwetek bloedh, hag a'n gwrug myghtern yn le y das Amasia.

²Ev a dhastrehevis Eloth ha'y daskorr dhe Yuda, wosa an myghtern dhe goska gans y dasow.

³Hwetek bloedh o pan dhallathas reynya, hag ev a reynyas dewdhek blydhen ha dew-ugens yn Yerusalem. Hanow y vamm o Yekolia a Yerusalem.

⁴Ev a wrug an pyth o ewn yn golok an ARLOEDH, par dell wrussa y das Amasia.

⁵Yth esa ow hwilas mynnas Duw yn dydhyow Zekaria, neb a'n dyskas yn own Duw. Hedre ve ow hwilas mynnas an ARLOEDH, Duw a wrug dhodho siweni.

⁶Ev eth yn-mes hag a werryas erbynn an Filistysi, hag ev a dorras dhe'n dor fos Gath ha fos Yabne ha fos Ashdod; ev a dhrehevis sitys yn tiredh Ashdod hag yn tylleryow erell yn mysk an Filistysi.

⁷Duw a'n gweresas erbynn an Filistysi, hag erbynn an Arabyon trigys yn Gur-baal, hag erbynn an Meunysi.

⁸An Ammonysi a ros trubyt dhe Uzzia, ha'y vri a lesas bys or Ejyp, rag gyllys fest krev ova.

⁹Dres henna Uzzia a dhrehevis touryow yn Yerusalem, orth Yet an Gornell, orth Yet an Nans, hag orth an elin, hag ev a's keras.

¹⁰Ev a dhrehevis touryow y'n gwylvos hag ev a balas lies dowrargh, rag ev a'n jevo greow bras, keffrys y'n Shefela hag y'n plen. Hag ev a'n jevo tiogyon ha gonedhysi gwinlannow y'n vro venydhyek hag y'n tiryow feyth, rag ev a garas an dor.

¹¹Dres henna Uzzia a'n jevo lu a gasoryon, dyskys yn batel, parys yn rannow herwydh an niverow y'n komptyans gwrys gans an skrifennyas Yeiel ha'n soedhek Maaseya, yn-dann gevarwoedhyans Hanania, onan a gaslewydhyon an myghtern.

¹²An niver kowal a bennow teyluyow ha dhedha kasoryon alloesek o dew vil ha hwegh kans.

¹³Yth esa yn-dann aga leuv lu a dri hans mil ha seyth, ha pymp kans, hag a werrya gans nerth meur, rag gweres an myghtern erbynn an eskar.

¹⁴Uzzia a brovias rag oll an lu, skoesow, guwow, basnettow, kaspowsyow, gwaregow, ha meyn rag tewlel.

¹⁵Yn Yerusalem ev a dhrehevis jynnow re bia devisys gans ynjinoryon sleygh, war an touryow hag orth an kornellow rag tewlel sethow ha meyn bras. Y vri a lesas pell, rag ev o marthys gweresys, bys pan o gyllys krev.

¹⁶Mes pan ova gyllys krev, gyllys goethus o ynwedh, bys dh'y dhiswrians. Ev o dislen dhe'n ARLOEDH y Dhuw, hag yth entras yn tempel an ARLOEDH dhe offrynna war alter an ynkys.

¹⁷Mes Azaria an oferyas eth a-ji war y lergh, gans peswar ugens oferyas an ARLOEDH, gwer grev.

¹⁸I a sevis orth myghtern Uzzia hag a leveris dhodho, ‘Ny dhelledh ty dhe offrynna dhe'n ARLOEDH, mes y telledh an oferysi, mebyon Aron, yw sakrys dhe offrynna. Ke yn-mes a'n sentri; rag ty re wrug drog, ha ny dheg henna enor dhis a'n ARLOEDH Duw.’

¹⁹Ena Uzzia a sorras. Ev a'n jevo ynkyslester yn y dhorn rag leski ynkys; mes pan esa ow serri orth an oferysi kleves lovrek a omdhiskwedhas war y dal a-rag an oferysi yn chi an ARLOEDH, ryb alter an ynkys.

²⁰Pan welas Azaria an arghoferyas hag oll an oferysi orto, ev dhe vos lovrek yn y dal, i a fyskas orth y worra yn-mes. Hag ev y honan a fyskas ow mos yn-mes, rag an ARLOEDH dh'y blagya.

²¹Myghtern Uzzia o lovrek bys yn dydh y vernans. Yth esa trigys yn chi dibarth, lovrek, eskeys a ji an ARLOEDH. Y vab Yotham a'n jevo charj a ji an myghtern, ow koverna pobel an pow.

²²Gweythresow erell Uzzia, a'n kynsa dhe'n diwettha, a veu skrifys gans an profoes Ysay mab Amos.

²³Uzzia a goskas gans y dasow; i a'n ynkleudhyas gans y dasow yn ynkleudhva an vyghternedh, rag y lavarsons, ‘Ev yw lovrek.’ Y vab Yotham a reynyas yn y le.