Read Kernewek 2 Kroniklys 29 Bible Online

2 Kroniklys 29 - Kernewek bible

2 Kroniklys 29

¹Hezekia a dhallathas reynya pan o pymp bloedh warn ugens, hag ev a reynyas naw blydhen warn ugens yn Yerusalem. Hanow y vamm o Abia myrgh Zekaria.

²Ev a wrug an pyth o ewn yn golok an ARLOEDH, kepar dell wrug Davydh y das.

³Yn kynsa blydhen y reyn, y'n kynsa mis, ev a igoras darasow chi an ARLOEDH ha'ga ewnhe.

⁴Ev a dhros an oferysi ha'n Levysi ha'ga huntelles yn plen an howldrehevel.

⁵Ev a leveris dhedha, ‘Goslowewgh orthiv Levysi! Omsakrewgh hwi, ha sakrewgh chi an ARLOEDH, Duw agas tasow, ha degewgh yn-mes an avlander dhiworth an tyller sans.

⁶Rag agan tasow re beu dislel hag i a wrug an pyth o drog yn golok an ARLOEDH. I a'n forsakyas, hag a dreylyas aga fas dhiworth trigva an ARLOEDH, ha treylya aga heyn.

⁷Ha moy es henna i a dhegeas darasow an portal ha difeudhi golow an lugern; ny offrynnsons ynkys, na ny wrussons offrynnow leskys y'n tyller sans dhe Dhuw Ysrael.

⁸Yndella konnar an ARLOEDH a dheuth war Yuda ha war Yerusalem, hag ev a's gwrug tra a euth, a skruth, hag a hwiban, dell welowgh gans agas dewlagas agas honan.

⁹Agan tasow re goedhas gans an kledha ha'gan mebyon ha'gan myrghes haga yma agan gwragedh yn kethneth drefenn henna.

¹⁰Yndella yma y'm kolonn gul kevambos gans an ARLOEDH Duw Ysrael, rag may treyllyo y sorr dhiworthyn.

¹¹Ow mebyon, na vedhewgh logh lemmyn, rag an ARLOEDH re'gas dewisas dhe sevel a-ragdho ha'y servya, ha dhe vos y venystoryon, ha dhe leski offrynnow dhodho.’

¹²Ena an Levysi a sevis, Mahath mab Amasay, ha Yoel mab Azaria, a vebyon an Kohathysi; a vebyon Merari, Kish mab Abdi, hag Azaria mab Yehallelel; hag a'n Gershonysi, Yoagh mab Zimma, hag Eden mab Yoagh;

¹³a vebyon Elisafan, Shimri ha Yeuel; hag a vebyon Asaf, Zekaria ha Mattania;

¹⁴a vebyon Heman, Yehuel ha Shimei; hag a vebyon Yeduthun, Shemaia hag Uzziel.

¹⁵I a guntellas aga breder hag a omsakras aga honan; ena i a entras, par dell re worhemmynnsa an myghtern, herwydh geryow an ARLOEDH rag glanhe chi an ARLOEDH.

¹⁶An oferysi eth a-berth yn pervedh chi an ARLOEDH rag y lanhe. I a dhros yn-mes oll an avlander a gavsons yn sentri an ARLOEDH, dhe glos chi an ARLOEDH; ha'n Levysi a'n kemmeras ha'y dhoen yn-mes dhe nans Kidron.

¹⁷I a dhallathas an sakrans yn kynsa dydh an kynsa mis, hag yn ethves dydh an mis i a dheuth bys portal an ARLOEDH. Dre eth dydh i a sakras chi an ARLOEDH, hag yn hwetegves dydh an kynsa mis i a worfennas.

¹⁸Ena i eth a-ji dhe vyghtern Hezekia ha leverel, ‘Ni re lanhas chi an ARLOEDH oll, alter an offrynn leskys hag oll y lestri, ha moes bara an wolok hag oll hy daffar.

¹⁹Ni re bareusis ha sakra oll an daffar a veu skonys gans myghtern Ahaz der y reyn, pan ova dislel. Ymons i a-rag alter an ARLOEDH.’

²⁰Ena myghtern Hezekia a sevis yn-bann a-varr hag a guntellas soedhogyon an sita, hag eth yn-bann dhe ji an ARLOEDH.

²¹I a dhros seyth tarow, seyth hordh, seyth oen, ha seyth bogh avel offrynn pegh rag an wlaskor, rag an sentri ha rag Yuda. Ev a worhemmynnis dhe'n oferysi, mebyon Aron, aga offrynna war alter an ARLOEDH.

²²Ytho i a ladhas an terewi, ha'n oferysi a dhegemmeras an goes ha'y skoellya orth an alter; i a ladhas an hordhes ha'ga goes a veu skoellys orth an alter; i a ladhas an eyn ynwedh ha'ga goes a veu skoellys orth an alter.

²³Ena an boghes rag an offrynn pegh a veu dres a-rag an myghtern ha'n kuntelles, hag i a worras aga diwleuv warnedha.

²⁴An oferysi a's ladhas hag a wrug offrynn gans aga goes war an alter, rag gul dehwelyans a-barth oll Ysrael. Rag an myghtern a worhemmynnis may hwreller an offrynn leskys ha'n offrynn pegh a-barth oll Ysrael.

²⁵Ev a dhesedhas an Levysi yn chi an ARLOEDH gans symbalys, telynnow ha sowtris, herwydh gorhemmynn Davydh ha Gad, gwelesydh an myghtern ha Nathan an profoes; rag y feu an gorhemmynn dhiworth an ARLOEDH der y brofoesi.

²⁶An Levysi a sevis gans daffar menestrouthi Davydh, ha'n oferysi gans hirgern.

²⁷Hezekia a worhemmynnis mayth offrynner an offrynn leskys war an alter. Pan dhallathas an offrynn leskys, an gan dhe'n ARLOEDH a dhallathas ynwedh, ha'n hirgern gans daffar Davydh myghtern Ysrael.

²⁸Oll an kuntelles a wordhyas, an ganoryon a ganas, ha'n hirgern a sonas; hag oll a hemma a besyas bys pan veu diwedhys an offrynn leskys.

²⁹Pan veu an offrynn gorfennys, an myghtern hag oll esa ganso a blegyas dhe'n dor hag a wordhyas.

³⁰Myghtern Hezekia ha'n soedhogyon a worhemmynnis dhe'n Levysi may kannens gormola dhe'n ARLOEDH gans geryow Davydh ha'n gwelesydh Asaf. I a ganas gormola gans lowena, hag i a blegyas dhe'n dor hag a wormolas.

³¹Ena Hezekia a leveris, ‘Lemmyn sakrys owgh dhe'n ARLOEDH; dewgh nes, ha drewgh sakrifisow hag offrynnow grasyans rag chi an ARLOEDH.’ An kuntelles a dhros sakrifisow hag offrynnow grasyans hag oll a's tevo kolonn volonjedhek a dhros offrynnow leskys.

³²Niver an offrynnow leskys dres gans an kuntelles o deg tarow ha tri ugens, kans hordh, ha dew kans oen; oll an re ma o rag offrynn leskys dhe'n ARLOEDH.

³³An offrynnow sakrys o hwegh kans tarow ha tri mil dhavas.

³⁴Mes tanow o niver an oferysi ha ny yllons kroghena oll an offrynnow leskys; ytho aga breder an Levysi a's gweresas bys pan o an ober gorfennys ha bys pan o oll an oferysi erell sakrys, rag an Levysi o moy diwysyk ages an oferysi owth omsakra aga honan.

³⁵Yth esa myns bras a offrynnow leskys, war-barth gans blonek an offrynnow kres, hag yth esa offrynnow diwes rag an offrynnow leskys. Yndella servis chi an ARLOEDH a veu daswrys.

³⁶Hezekia hag oll an bobel a lowenhas drefenn an pyth a wrussa Duw a-barth an bobel; rag an dra re hwarvia yn uskis.