Read Kernewek 2 Kroniklys 3 Bible Online

2 Kroniklys 3 - Kernewek bible

2 Kroniklys 3

¹Solomon a dhallathas drehevel chi an ARLOEDH yn Yerusalem war venydh Moria, le may omdhiskwedhsa an ARLOEDH dh'y das Davydh, y'n tyller a dharbarsa Davydh war leur-drushya Ornan an Yebusyas.

²Ev a dhallathas drehevel y'n nessa dydh a'n nessa mis, yn peswora blydhen y reyn.

³An re ma yw an selyow a settyas Solomon rag drehevel chi Duw: an hys, yn kevelinyow a'n savon goth, o tri ugens kevelin, ha'n les ugens kevelin.

⁴An portal a-rag an chi o ugens kevelin y les a-dreus les leun an chi, ha'y ughelder o hwegh ugens kevelin. Ev a'n gorowras a-bervedh gans owr pur.

⁵Ev a bannellyas an chi meur gans prenn meryw hag a'n owras gans owr pur, hag a wrug palmys ha kadonyow warnodho.

⁶Ev a afinas an chi gans meyn drudh. An owr o owr dhiworth Parvaym.

⁷Ev a worowras an chi gans owr — an kebrow, an treudhow, an fosow, ha'n darasow; hag ev a gervyas cherubim war an fosow.

⁸Ev a wrug an tyller an moyha sans, y hys kemmys ha les an chi, ugens kevelin, ha'y les o ugens kevelin, ev a'n gorowras gans hwegh kans talent a owr pur.

⁹Poester an kentrow o unn shekel dhe hanter-kans shekel a owr. Ev a worowras an chambouryow a-wartha gans owr.

¹⁰Y'n tyller an moyha sans ev a wrug dew jerub kervys ha'ga gorowri gans owr.

¹¹Diwaskell an cherubim war-barth a ystynnas ugens kevelin, unn askell a unn cherubim, pymp kevelin y hys, a dochyas fos an chi, ha'y ben, pymp kevelin y hys, a dochyas askell an cherub arall;

¹²hag unn askell a'n nessa cherub, pymp kevelin y hys a dochyas fos an chi, ha'y ben, pymp kevelin y hys a dochyas askell an kynsa cherub.

¹³Diwaskell an dhew jerub ma a ystynnas ugens kevelin. An cherubim a sevis war aga dewdroes, a-dal an chi.

¹⁴Ev a wrug an groglenn a lien fin glas ha purpur ha rudhgogh hy liw, hag ynni ev a wias cherubim.

¹⁵A-rag an chi ev a wrug diw goloven, pymthek kevelin warn ugens aga ughelder, gans penn-koloven war pubonan anedha, pymp kevelin.

¹⁶Ev a wrug kadonyow a-dro dhedha ha'ga gorra war bennow an kolovenyow; hag ev a wrug kans greunaval ha'ga gorra war an kadonyow.

¹⁷Ev a settyas an kolovenyow a-rag an tempel, an eyl a-dhyghow ha'y gila a-gledh; an goloven a-dhyghow ev a henwis Yakin, ha'n goloven a-gledh ev a henwis Boaz.