Read Kernewek 2 Kroniklys 31 Bible Online

2 Kroniklys 31 - Kernewek bible

2 Kroniklys 31

¹Pan veu oll henna gorfennys, oll Ysrael esa ena eth yn-mes dhe sitys Yuda hag a droghas an peulveyn, ha terri dhe'n dor an Asherim, ha distrui an tylleryow ughel ha'n alteryow der oll Yuda ha Benyamin hag yn Efraym ha Manasse, bys pan y's diswrussens oll. Ena pobel Ysrael a dhehwelis dh'aga sitys, pubonan dh'y berghennogeth y honan.

²Hezekia a apoyntyas an oferysi ha'n Levysi dh'aga rannow, rann ha rann, pubonan herwydh y servis, an oferysi ha'n Levysi rag offrynnow leskys hag offrynnow kres, dhe venystra ha dhe aswonn grasow ha gormola yn yetys tyldow an ARLOEDH.

³An myghtern a ros a'y bythow y honan rag an offrynnow leskys, offrynnow leskys an myttin ha'n gorthugher, ha'n offrynnow leskys rag an sabotys, an loeryow nowydh ha'n goelyow apoyntys, dell yw skrifys yn lagha an ARLOEDH.

⁴Ev a worhemmynnis dhe'n bobel trigys yn Yerusalem ri aga rann dhe'n oferysi ha'n Levysi, rag may hallens aga omri dhe lagha an ARLOEDH.

⁵Kettell lesas an ger, pobel Ysrael a ros yn palster kynsa froeth a ys, gwin, oyl, mel, hag a oll trevas an mes; hag i a dhug yn palster an dega a bup-tra.

⁶Mebyon Ysrael ha Yuda trigys yn sitys Yuda a dhros ynwedh dega a chatel ha deves, ha dega an taklow re bia sakrys dhe'n ARLOEDH aga Duw, ha'ga gorra yn kalsow.

⁷Y'n tressa mis i a dhallathas krugya an kalsow, hag i a's gorfennas y'n seythves mis.

⁸Pan dheuth Hezekia ha'n soedhogyon hag a welas an kalsow, i a vennigas an ARLOEDH ha'y bobel Ysrael.

⁹Hezekia a wovynnas orth an oferysi ha'n Levysi a-dro dhe'n kalsow.

¹⁰Azaria an arghoferyas, o a ji Sadok, a worthybis dhodho, ‘A-ban dhallathsons dri rohow yn chi an ARLOEDH, ni re'gan bo lowr dhe dhybri ha'n remenant yw lowr, rag an ARLOEDH re vennigas y bobel, ha'n kals bras ma yw an remenant.’

¹¹Hezekia a worhemmynnis may fe gwithvaow pareusys yn chi an ARLOEDH; hag i a's pareusis.

¹²Yn lel i a dhug ynno an kevrohow, an degedhow ha'n taklow re bia sakrys. An pennsoedhek neb a'n jevo charj warnedha o Konania an Levyas, gans y vroder Shimei avel an nessa dhodho;

¹³Yehiel, Azazia. Nahath, Asahel, Yerimoth, Yozabad, Eliel, Ysmakia, Mahath ha Benaya o gorwoelysi ow kweres Konania ha Shimei y vroder, apoyntys gans Hezekia an myghtern hag Azaria, pennsoedhek chi Duw.

¹⁴Kore mab Ymna an Levyas, gwithyas yet an howldrevel, a'n jevo charj a'n rohow bolonjedhek res dhe Dhuw, rag kevrenna an kevro gwrys dhe'n ARLOEDH ha'n offrynnow an moyha sans.

¹⁵Yth esa Eden, Minyamin, Yeshua, Shemaia, Amaria, ha Shekania orth y weres yn lel, yn sitys an oferysi, rag dyllo an kevrennow dh'aga breder, yowynk ha hen, herwydh an rannow.

¹⁶Gans henna an re rekordys seulabrys herwydh linyeth, tus worreydh a dri bloedh ha moy, oll a vedha owth entra chi an ARLOEDH a dhegemmeri pub dydh neppyth rag aga servis yn aga soedhow, herwydh aga rannow.

¹⁷An oferysi a veu omrolys herwydh chi aga thasow; ha'n Levysi a ugens bloedh ha moy, a veu omrolys yn aga soedhow, herwydh aga rannow.

¹⁸An oferysi a veu omrolys gans oll aga fleghigow, aga gwragedh, aga mebyon ha'ga myrghes, ewn rag oll an kuntelles; rag i o lel owth omwitha aga honan sans,

¹⁹ha rag mebyon Aron, an oferysi trigys y'n powdir yn tiredh pubonan a'ga threvow, gwer apoyntys herwydh aga hanow a lesranna rannow dhe bub gorreydh yn mysk an oferysi, ha dhe pubonan omrolys yn mysk an Levysi.

²⁰Hezekia a wrug hemma der oll Yuda; ev a wrug an pyth o da hag ewn ha lel a-rag an ARLOEDH y Dhuw.

²¹Pub ober a omgemmeras ev yn servis chi Duw, ha herwydh an lagha ha'n gorhemmynn, ow hwilas y Dhuw, ev a'n gwrug gans kolonn leun, hag ev a siwenis.