Read Kernewek 2 Kroniklys 33 Bible Online

2 Kroniklys 33 - Kernewek bible

2 Kroniklys 33

¹Manasse o dewdhek bloedh pan dhallathas reynya, hag ev a reynyas pymthek blydhen ha dew-ugens yn Yerusalem.

²Ev a wrug an pyth o drog yn golok an ARLOEDH, war-lergh oberow kasadow an kenedhlow a wrussa an ARLOEDH aga fesya a-rag pobel Ysrael.

³Rag ev a dhastrehevis an tylleryow ughel re beu tennys yn-nans gans y das Hezekia, hag ev a dhrehevis alteryow dhe'n Baalim, hag a wrug Asherim. Ev a wordhyas oll lu an nev, ha'ga servya.

⁴Ev a dhrehevis alteryow yn chi an ARLOEDH, may lavarsa an ARLOEDH anodho, ‘Yn Yerusalem ow hanow a vydh bys vykken.’

⁵Ev a dhrehevis alteryow rag oll lu an nev yn dew glos chi an ARLOEDH.

⁶Ev a wre dh'y vebyon tremena dre dan yn nans mab Hinnom, hag a wre dewinieth ha pystri ha hus, hag a hwila kusul dhiworth nygromons. Ev a wrug droktraow pals yn golok an ARLOEDH, orth y brovokya dhe sorr.

⁷Ev a worras an imaj gravys re wrussa yn chi Duw, anodho may leveris Duw dhe Davydh ha dh'y vab Solomon, ‘Y'n chi ma, hag yn Yerusalem re dhewisis yn-mes a oll kordhow Ysrael, y hworrav ow hanow bys vykken.

⁸Nevra ny gemmerav troes Ysrael dhiworth an tir re apoyntis rag agas tasow, mar kwaytyons gul pup-tra a worhemmynnis dhedha, oll an lagha, an ordenansow, ha'n breusow res dre leuv Moyses.’

⁹Manasse a ledyas Yuda ha trigoryon Yerusalem yn stray, bys may hwrussons moy drog ages an kenedhlow a dhiswrussa an ARLOEDH a-rag pobel Ysrael.

¹⁰An ARLOEDH a gewsis dhe Manasse ha dh'y bobel, mes ny woslowsons.

¹¹Yndella an ARLOEDH a dhros er aga fynn kaslewydhyon lu myghtern Assyria, hag i a synsis Manasse avel prisner, ha gorra higenn yn y droen ha'y gelmi gans sprallow a vrons ha'y dhri dhe Babylon.

¹²Pan o yn ahwer ev a bysis favour an ARLOEDH y Dhuw hag yth omuvelhas yn fen a-rag Duw y dasow.

¹³Ev a bysis dhodho, ha Duw a gemmeras y bysadow hag a glewas y bledyans, hag a'n dros arta dhe Yerusalem ha'y dhaskorra dh'y ruvaneth. Ena Manasse a wodhya bos an ARLOEDH an gwir Dhuw.

¹⁴Wosa henna ev a dhrehevis fos tu a-ves rag sita Davydh, a'n howlsedhes dhe nans Gihon, owth hedhes dhe'n entrans Yet an Puskes; ev a's gorras a-dro dhe Ofel, hag a's drehevis dhe ughelder bras. Ev a worras ynwedh kaslewydhyon an lu yn oll an sitys kerys yn Yuda.

¹⁵Ev a dhug dhe-ves an duwow estren ha'n imaj gravys dhiworth chi an ARLOEDH, hag oll an alteryow re dhrehevis war venydh chi an ARLOEDH hag yn Yerusalem, hag ev a's tewlis dhe-ves an sita.

¹⁶Ev a ewnhas alter an ARLOEDH hag a offrynnas warnedhi sakrifisow kres ha grasow; hag ev a worhemmynnis dhe Yuda servya an ARLOEDH, Duw Ysrael.

¹⁷Byttegyns an bobel a besyas ow sakrifisow y'n tylleryow ughel, mes i a's gwrug unnsel dhe'n ARLOEDH aga Duw.

¹⁸Gweythresow erell Manasse, y bysadow dh'y Dhuw ha geryow an welesydhyon kewsys dhodho yn hanow an ARLOEDH Duw a Ysrael, yma an re ma yn kovadhow myghternedh Ysrael

¹⁹Y bysadow ha fatell dhegemmeras Duw y bledyans, oll y begh ha'y dhislelder, an tylleryow warnedha may trehevis tylleryow ughel ha drehevel an Asherim ha'n imajys gravys a-ragdha mayth omuvelhi, an re ma yw skrifys yn kovadhow an welesydhyon.

²⁰Ytho Manasse a goskas gans y dasow, hag i a'n ynkleudhyas yn y ji; ha'y vab Amon a reynyas yn y le.

²¹Amon o dew bloedh warn ugens pan dhallathas reynya, hag ev a reynyas diw vlydhen yn Yerusalem.

²²Ev a wrug an pyth o drog yn golok an ARLOEDH, par dell wrug y das, Manasse. Amon a sakrifia dhe oll an imajys gravys a wrussa Manasse, ha'ga servya.

²³Ny omuvelhas a-rag an ARLOEDH, dell omuvelhasa y das Manasse, mes an keth Amon ma a drespassas moy ha moy.

²⁴Y wesyon a vrasas er y bynn ha'y ladha yn y ji.

²⁵Mes pobel an tir a ladhas oll an re re vrassa erbynn myghtern Amon; ha pobel an tir a wrug y vab Yosia myghtern yn y le.