Read Kernewek 2 Kroniklys 34 Bible Online

2 Kroniklys 34 - Kernewek bible

2 Kroniklys 34

¹Yosia o eth bloedh pan dhallathas reynya, hag ev a reynyas unnek blydhen warn ugens yn Yerusalem.

²Ev a wrug an pyth o ewn yn golok an ARLOEDH, hag a gerdhas yn fordhow Davydh y das; ny dreylyas dhe denewen naneyl dhe'n dyghow na dhe'n kledh.

³Rag yn ethves blydhen y reyn, hag ev hwath maw, ev a dhallathas hwilas Duw Davydh y das, hag y'n dewdhegves blydhen, ev a dhallathas kartha dhiworth Yuda ha Yerusalem an tylleryow ughel, an Asherim, ha'n imajys gravys ha teudhys.

⁴Yn y lok i a dennas yn-nans alteryow an Baalim; ev a dhiswrug an alteryow a ynkys a sevi a-ughta. Ev a dorras yn-nans an Asherim ha'n imajys gravys ha'n imajys teudhys; ev a wrug polter anedha ha'y skoellya war vedhow an re re sakrifisa dhedha.

⁵Ev a loskas ynwedh eskern an oferysi war aga alteryow, hag a garthas Yuda ha Yerusalem.

⁶Yn sitys Manasse, Efraym, ha Simeon, bys Naftali ha bys yn aga magoryow oll a-derdro,

⁷ev a dorras dhe'n dor an alteryow, hag a vrewis an Asherim ha'n imajys gravys dhe bolter hag a dhistruis oll an alteryow ynkys der oll pow Ysrael. Ena ev a dhehwelis dhe Yerusalem.

⁸Yn etegves blydhen y reyn, pan garthsa an tir ha'n chi, ev a dhannvonas Shafan mab Asalia, Maaseya governour an sita, ha Yoagh mab Yoahaz, an kovadhor, rag ewnhe chi an ARLOEDH y Dhuw.

⁹I a dheuth dhe Hilkia an arghoferyas, hag a ros dhodho an arghans re bia dres yn chi Duw, a guntellsa an Levysi, gwithysi an treudhow dhiworth Manasse hag Efraym ha dhiworth an remenant a Ysrael, ha dhiworth Yuda ha Benyamin, ha trigoryon Yerusalem.

¹⁰I a'n dros dhe'n oberoryon a's tevo charj a'n ober yn chi an ARLOEDH, ha'n oberoryon ma, owth oberi yn chi an ARLOEDH a wrug devnydh anodho rag ewnhe ha daswul an chi.

¹¹I a'n ros dhe'n seri prenn ha dhe'n dhrehevoryon rag prena meyn treghys, ha prenn rag bynsow, ha kebrow rag an drehevyansow re assa myghternedh Yuda dhe goedha yn magoryow.

¹²An dus a wrug an ober yn lel. Warnedha y feu apoyntys Yahath hag Obadia, Levysi a vebyon Merari, ha Zekaria ha Meshullam, a vebyon an Kohathysi, dhe gevarwoedha. Levysi erell, oll anedha sleygh gans daffar menestrouthi,

¹³a's tevo gorweles war an re a dhegi an beghyow hag a gevarwoedha an re a oberi yn pub eghenn a servis; ha re a'n Levysi o skriforyon, soedhogyon, ha porthoryon.

¹⁴Hag i ow toen yn-mes an arghans re bia dres yn chi an ARLOEDH, Hilkia an oferyas a gavas lyver lagha an ARLOEDH, a via res dre leuv Moyses.

¹⁵Hilkia a leveris dhe Shafan an skrifennyas, ‘My re gavas lyver an lagha yn chi an ARLOEDH’; ha Hilkia a ros an lyver dhe Shafan.

¹⁶Shafan a dhros an lyver dhe'n myghtern, ha pella ev a dherivas dhe'n myghtern, ‘Oll an charj a's tevo dha servysi, ymons i orth y wul.

¹⁷I re worras yn-mes an arghans o kevys yn chi an ARLOEDH, hag i re'n ros yn leuv an worwelysi ha'n oberoryon.’

¹⁸An skrifennyas, Shafan an skrifennyas a dherivas dhe'n myghtern, ‘Hilkia an oferyas re ros dhymmo vy lyver.’ Ena Shafan a'n lennas dhe'n myghtern.

¹⁹Pan glewas an myghtern geryow an lagha, ev a skwardyas y dhillas.

²⁰Ena an myghtern a worhemmynnis dhe Hilkia, Ahikam mab Shafan, Abdon mab Mika, Shafan an skrifennyas, hag Asaya gwas an myghtern,

²¹‘Kewgh, hwila orth an ARLOEDH ragov vy ha rag an re yw gesys yn Ysrael hag yn Yuda, a-dro dhe eryow an lyver re beu kevys. Rag meur yw konnar an ARLOEDH yw diverys warnan, drefenn na withas agan tasow ger an ARLOEDH, dhe wul herwydh oll yw skrifys y'n lyver ma.’

²²Ytho Hilkia ha'n re re bia dannvenys gans an myghtern eth dhe'n brofoeses Hulda, gwreg Shallum mab Tokkath mab Hasra, gwithyas an dhillasva, esa trigys yn Yerusalem y'n Nessa Kwartron, hag i a gewsis dhedhi yndella.

²³Hi a leveris dhedha, ‘Yndellma y lever an ARLOEDH, Duw Ysrael: Lavar dhe'n gour a'gas dannvonas dhymmo,

²⁴Yndellma y lever an ARLOEDH: Otta, my a dhre terroesa war an tyller ma ha war y drigoryon, oll an mollothow yw skrifys y'n lyver a veu lennys a-rag myghtern Yuda.

²⁵Drefenn i dhe'm gasa ha leski sakrifisow dhe dhuwow erell, bys ma'm sorrsons gans oll oberow aga diwdhorn, ow honnar a vydh diverys war an tyller ma, ha ny vydh difeudhys.

²⁶Mes a-dro dhe vyghtern Yuda neb a'gas dannvonas rag hwilas orth an ARLOEDH, yndellma y leverowgh dhodho: Yndellma y lever an ARLOEDH, Duw Ysrael: A-dro dhe'n geryow re glewsys,

²⁷drefenn bos dha golonn medhel ha drefenn ty dhe omuvelhe a-rag Duw pan glewsys y eryow erbynn an tyller ma ha'y drigoryon, hag omuvelhe a-ragov, ha skwardya dha dhillas hag oela a-ragov, my re'th klewas, a lever an ARLOEDH.

²⁸My a'th kuntell dhe'th tasow ha ty a vydh kuntellys dhe'n vedh yn kres; ny wel dha dhewlagas oll an terroesa a dhegav war an tyller ma ha war y drigoryon.’ I a dhros an messaj tre dhe'n myghtern.

²⁹Ena an myghtern a dhannvonas ger hag a guntellas oll henavogyon Yuda hag a Yerusalem.

³⁰An myghtern eth yn-bann dhe ji an ARLOEDH gans oll gwer Yuda, trigoryon Yerusalem, an oferysi ha'n Levysi, oll an bobel, bras ha byghan; ev a lennas a-ragdha oll geryow lyver an kevambos re beu kevys yn chi an ARLOEDH.

³¹An myghtern a sevis yn y dyller hag a wrug kevambos a-rag an ARLOEDH, dhe holya an ARLOEDH, ow kwitha y worhemmynnow, y vreusow, ha'y ordenansow, gans golonn leun ha gans oll y enev, dhe oberi geryow an kevambos o skrifys y'n lyver ma.

³²Ena ev a wrug dhe bubonan esa yn Yerusalem hag yn Benyamin ambosa gul war y lergh. Trigoryon Yerusalem a wrug war-lergh kevambos Duw, Duw aga thasow.

³³Yosia a gemmeras dhe-ves oll an taklow kasadow a diredh an Ysraelysi, hag y hwrug dhe oll esa yn Ysrael servya an ARLOEDH aga Duw. Oll y dhydhyow, ny fallsons holya an ARLOEDH, Duw aga thasow.