Read Kernewek 2 Kroniklys 35 Bible Online

2 Kroniklys 35 - Kernewek bible

2 Kroniklys 35

¹Yosia a solempnyas an pask yn Yerusalem; i a ladhas oen an pask y'n peswardhegves dydh a'n kynsa mis.

²Ev a apoyntyas an oferysi dh'aga soedhow ha'ga krevhe yn servis chi an ARLOEDH.

³Ev a leveris dhe'n Levysi esa ow tyski oll Ysrael hag o sakrys dhe'n ARLOEDH, ‘Gorrewgh an argh sans y'n chi a dhrehevis Solomon mab Davydh. Nyns yw res dhywgh y dhoen war agas diwskoedh. Lemmyn servyewgh an ARLOEDH agas Duw ha'y bobel Ysrael.

⁴Pareusiwgh herwydh agas chiow agas tasow herwydh agas rannow, owth holya dannvonadow skrifys Davydh myghtern Ysrael, ha dannvonadow skrifys y vab Solomon.

⁵Sevewgh y'n tyller sans herwydh bagasow chi agas tasow an bobel, unn rann dhe bub rann a ji tasow an Levysi.[18]

⁶Ledhewgh oen an pask, omsakrewgh, ha pareusiwgh a-barth agas breder, ow kul herwydh ger an ARLOEDH dre leuv Moyses.’

⁷Ena Yosia a ros rag oll an dus esa ena, eyn ha mynnigow a'n flokk rag offrynnow an pask bys y'n myns a dheg mil warn ugens, ha tri mil darow; yth o an re ma a bythow an myghtern.

⁸Y soedhogyon a ros a'ga bodh dhe'n bobel, dhe'n oferysi, ha dhe'n Levysi. Hilkia, Zakaria, ha Yehiel, penn-soedhogyon chi Duw, a ros dhe'n oferysi rag offrynnow an pask, dew vil, hwegh kans oen ha mynnik, ha tri hans tarow.

⁹Konania, ha'y vreder Shemaia ha Nethanel, ha Hashabia ha Yeiel ha Yozabad, pennow an Levysi, i ynwedh a ros dhe'n Levysi rag an pask, pymp mil oen ha mynnik ha pymp kans tarow.

¹⁰Pan veu an servis pareusis, an oferysi a sevis yn aga thyller, ha'n Levysi yn aga rannow herwydh gorhemmynn an myghtern.

¹¹I a ladhas eyn an pask, ha'n oferysi a skoellyas rann a'n goes a dhegemmersons a'ga diwla, ha'n Levysi a's diruskis.

¹²I a worras dhe dhenewen an offrynnow leskys, rag ma's kevrennens herwydh bagasow a jiow tasow an bobel, rag offrynna dhe'n ARLOEDH, dell yw skrifys yn lyver Moyses. Hag i a wrug an keth tra gans an terewi.

¹³I a rostyas an offrynnow yn pottow, yn chekys, hag yn padellow, ha'ga dri yn hast dhe oll an bobel.

¹⁴Wosa henna i a bareusis ragdha aga honan ha rag an oferysi drefenn bos an oferysi, mebyon Aron, fest bysi owth offrynna an offrynnow leskys ha'n rannow blonegek bys y'n nos; yndella an Levysi a bareusis ragdha aga honan ha rag an oferysi, mebyon Aron.

¹⁵Yth esa an ganoryon, mebyon Asaf, yn aga thyller, herwydh gorhemmynn Davydh, Asaf, Heman, ha Yeduthun gwelesydh an myghtern. Yth esa gwithysi an yetow orth pub yet; ny's tevo edhomm a woderri aga servis, rag aga breder, an Levysi a bareusis ragdha.

¹⁶Yndella oll servis an ARLOEDH a veu parys an jydh na, rag solempnya an pask ha rag offrynna offrynnow leskys war alter an ARLOEDH, herwydh gorhemmynn myghtern Yosia.

¹⁷An Ysraelitys esa ena a solempnyas an pask y'n prys na, ha goel an bara heb goell seyth dydh.

¹⁸Nevra ny via solempnys pask haval dhodho a-dhia dhydhyow an profoes Samuel; ny solempensa pask haval dhodho myghtern vytholl a Ysrael dell veu solempnys gans Yosia, gans an oferysi ha gans an Levysi, gans oll Ysrael esa ena, ha gans trigoryon Yerusalem.

¹⁹Y'n etegves blydhen a reyn Yosia an pask ma a veu solempnys.

²⁰Wosa oll hemma, pan wrussa Yosia pareusi an tempel, Neko myghtern Ejyp eth yn-bann rag batalyas yn Karkemish war an Ewfrates, ha Yosia eth yn-mes er y bynn.

²¹Mes Neko a dhannvonas kannasow dhodho ow leverel, ‘Pyth eus yntredhon ni, myghtern Yuda? Nyns av er dha bynn hedhyw, mes erbynn an chi ganso mayth esov ow patalyas, ha Duw re worhemmynnis dhymm fyski; astel sevel orth Duw, usi genev, rag ma na'th tiswrello.’

²²Mes ny vynna Yosia treylya dhiworto, mes ev a doellwiskas y honan[19] rag mayth omlattho er y bynn. Ny woslowas orth geryow Neko a anow Duw, mes ev a dheuth dhe vatalyas yn plen Megiddo.

²³An sethoryon a dewlis sethow orth an myghtern Yosia; ha'n myghtern a leveris dh'y wesyon, ‘Kemmerewgh vy dhe-ves, rag fest goliys ov.’

²⁴Yndella y wesyon a'n kemmeras yn-mes a'y jarett ha'n dugons dh'y nessa charett, ha'y dhri dhe Yerusalem. Ena ev a verwis, hag a veu ynkleudhys yn bedhow y dasow. Oll Yuda ha Yerusalem a gynis war-lergh Yosia.

²⁵Yeremia a gewsis kynvann war-lergh Yosia; hag oll an ganoryon ha'n kanoresow re gampoellas Yosia yn aga hynvannow bys y'n jydh ma. I a's gwrug ordenans yn Ysrael. Skrifys yns y'n Kynvannow.

²⁶Gweythresow erell Yosia ha'y oberow lel herwydh an pyth yw skrifys yn lagha an ARLOEDH,

²⁷ha'y weythresow, a'n dalleth dhe'n diwedh yw skrifys yn Lyver Myghternedh Ysrael ha Yuda.