Read Kernewek 2 Kroniklys 36 Bible Online

2 Kroniklys 36 - Kernewek bible

2 Kroniklys 36

¹Pobel an tir a gemmeras Yehoahaz mab Yosia hag a'n gwrug myghtern yn le y das yn Yerusalem.

²Yehoahaz o tri bloedh warn ugens pan dhallathas reynya, hag ev a reynyas tri mis yn Yerusalem.

³Ena myghtern Ejyp a'n gordhellos a'y dron yn Yerusalem hag a worras trubyt war an tir a gans talent a arghans hag unn talent a owr.

⁴Myghtern Ejyp a wrug y vroder Elyakim myghtern war Yuda ha war Yerusalem, hag a janjyas y hanow dhe Yehoyakim; mes Neko a gemmeras y vroder Yehoahaz hag a'n dug dhe Ejyp.

⁵Yehoyakim o pymp bloedh warn ugens pan dhallathas reynya, hag ev a reynyas unnek blydhen yn Yerusalem. Ev a wrug an pyth o drog yn golok an ARLOEDH y Dhuw.

⁶Er y bynn y teuth Nebukadnessar myghtern Babylon, hag ev a'n kargharas rag y dhri dhe Babylon.

⁷Dres henna Nebukadnessar a dhros rann a'n lestri dhiworth chi an ARLOEDH dhe Babylon ha'ga gorra yn y balys yn Babylon.

⁸Gweythresow erell Yehoyakim, ha'n taklow kasadow a wrug, ha'n pyth a veu kevys er y bynn, skrifys yns yn Lyver Myghternedh Ysrael ha Yuda. Y vab Yehoyachim a reynyas yn y le.

⁹Yehoyakim o eth bloedh pan dhallathas reynya, hag ev a reynyas tri mis ha deg dydh yn Yerusalem. Ev a wrug an pyth o drog yn golok an ARLOEDH.

¹⁰Yn gwenton an vlydhen myghtern Nebukadnessar a dhannvonas ha'y dhri dhe Babylon, war-barth ha lestri drudh chi an ARLOEDH, hag a wrug y vroder Sedekia myghtern war Yuda ha Yerusalem.

¹¹Sedekia o unn vlydhen warn ugens pan dhallathas reynya, hag ev a reynyas unnek blydhen yn Yerusalem.

¹²Ev a wrug an pyth o drog yn golok an ARLOEDH y Dhuw. Ny omuvelhas a-rag an profoes Yeremia a gewsi a anow an ARLOEDH.

¹³Ev a rebellyas ynwedh erbynn myghtern Nebukadnessar, neb re wrussa dhodho gul ti re Dhuw; ev a galeshas y gilbenn ha kaleshe y golonn erbynn treylya dhe'n ARLOEDH, Duw Ysrael.

¹⁴Ynwedh oll an pennoferysi ha'n bobel o fest dislel, owth holya oll taklow kasadow an kenedhlow; hag i a dhefolas chi an ARLOEDH re wrussa y sakra yn Yerusalem.

¹⁵An ARLOEDH, Duw aga thasow, a dhannvonas ger dre leuv y gannasow arta hag arta, drefenn ev dhe berthi tregeredh war-tu ha'y bobel ha war-tu ha'y drigva;

¹⁶mes i a wre ges a gannasow Duw, ow tispresya y eryow, hag ow skornya y brofoesi, bys pan o gyllys konnar an ARLOEDH orth y bobel mar vras, ma nag esa remedi.

¹⁷Ev a dhros er aga fynn myghtern an Kaldeanys, hag ev a ladhas aga gwer yowynk gans an kledha yn chi aga sentri; ny'n jevo truedh naneyl war our yowynk na moren, na war henavek na krebogh; ev a's ros pub den oll yn y leuv.

¹⁸Oll lestri chi Duw, bras ha byghan, ha tresoryow chi an ARLOEDH, ha tresoryow an myghtern ha'y soedhogyon, oll an re ma ev a dhros dhe Babylon.

¹⁹I a loskas chi Duw, i a dorras dhe'n dor fos Yerusalem; i a loskas oll hy falesyow gans tan, hag a dhiswrug oll hy lestri drudh.

²⁰Ev a dhug yn divroedh an re re dhienksa a'n kledha, hag i eth ha bos gwesyon dhodho ha dh'y vebyon bys reyn ruvaneth Persia,

²¹may fo kewerys ger an ARLOEDH dre anow Yeremia, bys pan wrussa an tir resek termyn leun y sabotys. Oll an dydhyow may feu anannedhys, an tir a witha sabot, rag kollenwel deg blydhen ha tri ugens.

²²Yn kynsa blydhen Syrus myghtern Persia, ow kollenwel ger an ARLOEDH kewsys dre anow Yeremia, an ARLOEDH a wrug dhe spyrys Syrus myghtern Persia difuna, hag ev a dhannvonas kannas der oll y ruvaneth, hag yn skrif maga ta, ow leverel:

²³‘Yndellma y lever myghtern Syrus a Persia: An ARLOEDH, Duw an nev, re ros dhymmo oll ruvanethow an norvys, hag ev re worhemmynnis dhymm may treheffiv chi yn Yerusalem. Piw pynag yn agas mysk a oll y bobel, re bo ganso an ARLOEDH y Dhuw, hag es ev yn-bann.’