Read Kernewek 2 Kroniklys 4 Bible Online

2 Kroniklys 4 - Kernewek bible

2 Kroniklys 4

¹Ev a wrug alter a vrons, ugens kevelin hy hys, ugens kevelin hy les, ha deg kevelin hy ughelder.

²Ena ev a wrug an mor a vetol teudhys; ev o rond, deg kevelin a amal dhe amal, ha pymp kevelin yn ughelder, unn linenn a dheg kevelin warn ugens a wrussa kylghya y gompas.

³Yn-danno yth esa furvow terewi oll a-derdro, deg dhe'n kevelin, ow kylghya an mor; yth esa dew rew a derewi, teudhys war-barth gans an mor y honan.

⁴Ev a sevi war dhewdhek oghen, tri war-tu ha'n gledhbarth, tri war-tu ha'n howlsedhes, tri war-tu ha'n dhyghowbarth, ha tri war-tu ha'n howldrehevel. An mor o settys warnedha, aga diwbedrenn war-tu an pervedh.

⁵Y dewder o dornva; y amal o gwrys avel amal hanaf, avel bleujenn lili; ev a synsi tri mil vath.[5]

⁶Ev a wrug ynwedh deg golghell, hag a worras pymp a-gledh ha pymp a-dhyghow, rag golghi. Ynna i a wolghas daffar an offrynn leskys, mes an mor o rag an oferysi dhe omwolghi.

⁷Ev a wrug deg kantolbrenn a owr herwydh an rewl, ha'ga gorra y'n tempel, pymp anedha dhe'n dhyghowbarth, ha pymp anedha dhe'n gledhbarth.

⁸Ev a wrug ynwedh deg moes ha'ga gorra y'n tempel, pymp a-dhyghow ha pymp a-gledh. Hag ev a wrug kans bason a owr.

⁹Ev a wrug klos an oferysi, ha'n klos bras ha darasow rag an klos, hag ev a worheras an darasow gans brons.

¹⁰Ev a settyas an mor y'n tenewen dyghow, y'n gornell an dhyghowbarth-howldrevel.

¹¹Huram a wrug an pottow, an reuvow, ha'n basonyow. Yndella Huram a worfennas an ober a omgemmeras rag myghtern Solomon yn chi Duw:

¹²an dhiw goloven, an dhew benn-koloven yn furv bolla war dopp an dhiw goloven, ha'n dhiw roesweyth rag kudha an dhew benn-koloven yn furv bolla war dopp an kolovenyow;

¹³an peswar kans greunaval rag an dhiw roesweyth, dew rew a reunavalow rag pub roesweyth, dhe gudha an dhew benn-koloven yn furv bolla;

¹⁴an deg karrigell, ha'n deg golghell war an karrigellow;

¹⁵an unn mor, ha'n dewdhek oghen yn-danno;

¹⁶An pottow, an reuvow, an kigveryow, hag oll an daffar ragdha: Huram-abi a's gwrug a vrons lentrus rag myghtern Solomon, rag chi an ARLOEDH.

¹⁷Yn plen an Yordan an myghtern a's teudhis y'n kowynnow a bri yntra Sukkoth ha Sereda.

¹⁸Solomon a wrug oll an traow ma, kals anedha; poes an brons o dres rekna.

¹⁹Yndella Solomon a wrug oll an daffar rag chi an ARLOEDH; an alter a owr, an moesow a owr rag bara an wolok,

²⁰an kantolbrennyer ha'ga lugern a owr pur dhe leski a-rag an sentri, herwydh an rewlow;

²¹an bleujennow, an lugern, ha'n evel a owr perfydh;

²²an gwelsigow-porv, an bollow, an padellow rag ynkys, ha'n padellow-tan, a owr pur. Hag entrans an chi, an darasow a-bervedh ow ledya dhe'n tyller an moyha sans ha darasow chi an sentri o a owr.