Read Kernewek Ezra 1 Bible Online

Ezra 1 - Kernewek bible

Ezra 1

¹Yn kynsa blydhen Syrus myghtern Persia, may fe kollenwys ger an ARLOEDH dre anow Yeremia, an ARLOEDH a wrug spyrys Syrus myghtern Persia dhe dhifuna, may tannvonna gwarnyans der y wlaskor oll, hag ynwedh ev a'n gwrug yn skrif, ow leverel,

²‘Yndellma y lever Syrus myghtern Persia: An ARLOEDH Duw nev, re ros dhymm oll ruvanethow an norvys; hag ev re erghis dhymm drehevel dhodho chi yn Yerusalem, usi yn Yuda.

³Piwpynag eus yn agas mysk yn-mes a oll y bobel a yll mos yn-bann dhe Yerusalem usi yn Yuda ha drehevel chi an ARLOEDH, Duw Ysrael — ev yw an Duw usi yn Yerusalem — ro bo y Dhuw ganso.

⁴Ha pub treusvewer yn pub tyller may ma trigys, re'n gweresso gwer y dyller gans arghans, ha gans owr, ha gans gwara, ha gans chatel, war-barth gans an offrynnow bolonjedhek rag chi Duw usi yn Yerusalem.’

⁵Pennow teyluyow Yuda ha Benyamin ha'n oferysi ha'n Levysi a sevis, gans oll an re may hwrug Duw dh'aga spyrys difuna, dhe vones yn-bann ha drehevel chi an ARLOEDH usi yn Yerusalem.

⁶Hag oll aga hentrevogyon a's gweresas gans lestri a arghans, gans owr, gans gwara, ha gans chatel, ha gans rohow a bris, war-barth gans oll an offrynnow bolonjedhek.

⁷Ynwedh myghtern Syrus a dhros yn-mes lestri chi an ARLOEDH, a wrug Nebukadnessar aga dri yn-mes a Yerusalem, ha'ga gorra yn chi y dhuwow;

⁸Syrus myghtern Persia a's delivras yn charj Mithredath an alhwedhor, neb a wrug menegva anedha rag Sheshbassar, rewler Yuda.

⁹Hemm yw aga menegva: deg bolla warn ugens a owr, mil volla a arghans, naw warn ugens a lestri divers;

¹⁰deg bolla warn ugens a owr, bolla arghansek erell peswar kans ha deg, ha mil lester erell.

¹¹Oll an lestri a owr hag a arghans o pymp mil ha peswar kans. Sheshbassar a dhros oll an re ma yn-bann pan veu an dhivresow degys yn-bann dhiworth Babylon bys yn Yerusalem.